Fréttir

Tilkynningar

Viðburðir

02.04.2024 kl. 10:00 - Bókasafn Kópavogs

Hannyrðaklúbburinn Garn og gaman

Hannyrðaklúbburinn Garn og gaman hittist alla þriðjudaga á 2. hæð aðalsafns kl. 10. Heitt á könnunni og öll velkomin! Nánari upplýsingar veitir Gréta Björg Ólafsdóttir, gretabjorg@kopavogur.is Fylgist með í Facebook-hópnum Hannyrðaklúbburinn Garn og gaman | Bókasafn Kópavogs
03.04.2024 kl. 14:00 - Bókasafn Kópavogs

Hannyrðaklúbburinn Kaðlín

Hannyrðaklúbburinn Kaðlín hittist alla miðvikudaga á 2. hæð aðalsafns. Heitt á könnunni og allir velkomnir! Nánari upplýsingar veitir Gréta Björg Ólafsdóttir, gretabjorg@kopavogur.is Fylgist með í Facebook-hópnum Hannyrðaklúbburinn Kaðlín | Bókasafn Kópavogs.
03.04.2024 kl. 16:00 - Bókasafn Kópavogs

Bókmenntaklúbburinn Hananú!

Nanna Rögnvaldardóttir mun heimsækja bókmenntaklúbbinn Hananú miðvikudaginn 3. apríl kl. 16:00 og fjalla um skáldsögu sína Valskan. Valskan er fyrsta skáldsaga Nönnu Rögnvaldardóttur sem áður hefur skrifað fjölda bóka um matargerð og matarsögu. Frásögnina byggir hún á lífi formóður sinnar, Valgerðar Skaftadóttur, sem fædd var árið 1762. Heimildum og skáldskap er fléttað saman svo úr verður grípandi saga um harða lífsbaráttu en líka óvæntar lausnir, þrautseigju og ástir. Léttar veitingar, öll velkomin. Bókmenntaklúbburinn Hananú! hittist í Huldustofu á 3. hæð aðalsafns.  Annan hvern miðvikudag hittist á bókasafninu fremur siðprúður hópur fólks og ræðir hinar fögru orðlistir. Komið bara og gangið í bæinn, tölum um bækur – og Hananú! Fylgist með í Facebook-hópnum Bókmenntaklúbburinn Hananú | Bókasafn Kópavogs.
03.04.2024 kl. 12:15 - Bókasafn Kópavogs

Leslyndi með Fríðu Ísberg

Leslyndi hverfist um yndislestur og uppáhaldsbækur. Þjóðþekktir rithöfundar stíga á stokk og deila eftirlætishöfundum og bókakveikjum með gestum. Ævintýri og ástarsögur, dagbækur og draumráðningar, sígildar sögur og samtímaverk, orðið er frjálst. Fríða Ísberg kemur í heimsókn á Bókasafn Kópavogs í upphafi aprílmánaðar og segir frá nokkrum af sínum uppáhaldsbókum. Aðgangur er ókeypis og öll hjartanlega velkomin á meðan húsrúm leyfir. Viðburðurinn er styrktur af lista- og menningarráði Kópavogsbæjar. _______________________Fríða Ísberg er fædd árið 1992. Hún lauk stúdentsprófi frá Menntaskólanum við Hamrahlíð, og grunnprófi í heimspeki og meistaraprófi í ritlist við Háskóla Íslands. Fyrsta útgefna verk Fríðu er ljóðabókin Slitförin sem kom út árið 2017 hjá bókaforlaginu Partusi. Fyrir ljóðahandritið fékk Fríða nýræktarstyrk frá Miðstöð íslenskra bókmennta en í umsögn dómnefndar um bókina segir meðal annars: „Slitförin er safn ljóða sem fjalla á ágengan hátt um togstreituna við að brjótast undan áhrifavöldum bernskunnar og finna leiðina að eigin sjálfi. Leiðarstef verksins er sársaukinn sem sprettur úr nístandi sorg milli barns og foreldris. Ljóðin taka pláss, sýna afstöðu og grípa lesendur föstum tökum.“ Sama ár og Slitförin kom út hlaut Fríða þriðju verðlaun í keppninni um Ljóðstaf Jóns úr Vör. Árið 2018 kom út smásagnasafnið Kláði. Ungt fólk er í aðalhlutverki í flestum sögunum enda fjallar Fríða um málefni eigin kynslóðar í bókinni. Sögurnar gerast í nútímanum í Reykjavík en persónur þeirra eiga það sameiginlegt að klæja bæði í og undan ýmsum viðfangsefnum samtíma síns, meðal annars kynjamisrétti. Fyrir bókina hlaut Fríða tilnefningu til Bókmenntaverðlauna Norðurlandaráðs árið 2020 og bókin hlaut Fjöruverðlaunin í flokki fagurbókmennta. Kláði hefur verið þýdd á nokkur erlend tungumál. Önnur ljóðabók Fríðu Leðurjakkaveður kom út árið 2019 hjá Forlaginu en þar tekst Fríða á við togstreitu þess að berskjalda sig eða setja upp harðan skráp og vera töffari.  Fyrsta skáldsaga Fríðu er Merking (2021). Bókin er margradda vísindaskáldsaga en þar er tekist á við pólaríseringu, fordóma og samkennd. Merking hlaut Verðlaun starfsfólks bókaverslanna og  Fjöruverðlaunin í flokki fagurbókmennta og hefur verið þýdd á fjölda erlendra tungumála. Fríða er hluti af sex kvenna skáldahópi sem kallar sig Svikaskáld. Saman hafa þær gefið út þrjár ljóðabækur; Ég er ekki að rétta upp hönd (2017), Ég er fagnaðarsöngur (2018) og Nú sker ég netin mín (2019) auk einnar skáldsögu Olíu (2021). Fríða hefur einnig birt ljóð í ýmsum tímaritum, innlendum og erlendum. Þá skrifar hún bókmenntarýni fyrir Times Literary Supplement og var einn af ritstjórum Meðgöngumála, smásagnaseríu Partusar. Í byrjun árs 2022 hlaut Fríða Ísberg Íslensku bjartsýnisverðlaunin 2021 og 2023 hlaut hún sænsku Per Olav Enquist verðlaunin sem veitt eru veitt ungum höfundum sem eru að skapa sér nafn í Evrópu og hafa verið veitt árlega síðan 2004. 
04.04.2024 kl. 20:30 - Salurinn

Páll Óskar

Á upphafsárum Af fingrum fram var Páll Óskar Hjálmtýsson tíður gestur Jóns Ólafssonar og þeir hafa farið með sitt prógramm víða, m.a. til Danmerkur þar sem þeir fylltu fagran sal af góðu fólki.  Páll Óskar er listamaður á heimsmælikvarða og Íslendingar einfaldlega elska Palla sinn!  Hann er frábær söngvari og metnaðarfullur í list sinni eins og plötur hans og tónleikar bera vitni um. Allt fyrir ástina, Þú komst við hjartað í mér og lögin úr Rocky Horror eru dæmi um eitthvað sem gæti ratað inn á prógrammið þetta kvöld. Jón Ólafs snýr aftur með spjalltónleikaröðina sína, Af fingrum fram. Röðin hefur fyrir löngu fest sig í sessi hjá tónlistarunnendum landsins en Jón hefur á síðastliðnum fimmtán árum fengið til sín yfir 50 listamenn og hafa fleiri en 30.000 áhorfendur hrifist og hlegið með á þessum einstöku kvöldum Í Salnum.
04.04.2024 kl. 15:00 - Bókasafn Kópavogs

Lesið á milli línanna

Á fundinum 4. apríl tökum við fyrir bókina Að eilífu ástin eftir Fríðu Bonnie Andersen. Ung íslensk alþýðustúlka brýst til mennta í fatahönnun í París á fjórða áratug síðustu aldar. Þar upplifir hún frjálslynda strauma millistríðsáranna, sogast inn í hringiðu hins ljúfa lífs og kynnist dimmum sölum bak við djúprauð flauelstjöld.Á endanum hrekst hún aftur til Íslands þar sem líf hennar fléttast saman við líf ljósmóðurnema úr betri borgarastétt. Á meðan síðari heimsstyrjöldin er í algleymingi eiga sér stað mikil og afdrifarík átök í lífi þessara kvenna. Bókaklúbburinn hentar öllum hressum konum sem vilja hittast, lesa á milli línanna og spjalla um yndislestur á léttu nótunum. Lesin er ein bók á mánuði sem er svo rædd fyrsta fimmtudag í mánuði á fundum klúbbsins. Allar konur velkomnar á meðan húsrúm leyfir. Hlökkum til að hitta ykkur! Fylgist með í Facebook-hópnum Lesið á milli línanna | Bókasafn Kópavogs. Hjartanlega velkomnar!
04.04.2024 kl. 10:00 - Bókasafn Kópavogs

Sjálfsmildi | Foreldramorgunn

Anna Dóra Frostadóttir sálfræðingur mun fjalla um samkennd í eigin garð og mikilvægi þess að mæta sjálfum sér á erfiðum augnablikum með mildi, umhyggju og skilningi. Anna Dóra er sérfræðingur í klínískri sálfræði, félagsráðgjafi og núvitundarleiðbeinandi. Hún sinnir greiningu og almennri sálfræðimeðferð fullorðinna á stofu og leiðir hópnámskeið. Sérsvið hennar eru þunglyndi, kvíði og streita. Hún vinnur jafnframt með áföll og annan tilfinningavanda daglegs lífs. Foreldramorgunninn fer fram í Huldustofu á 3. hæð aðalsafns. Foreldramorgnar eru frábært tækifæri fyrir foreldra og ung börn þeirra til að hittast og eiga rólega stund saman á safninu. Fylgist með í Facebook-hópnum Foreldramorgnar | Bókasafn Kópavogs.  Ókeypis aðgangur og öll velkomin.
04.04.2024 kl. 17:00 - Bókasafn Kópavogs

Vorverkin í garðinum

Steinn Kárason, garðyrkjumeistari og M.Sc. í umhverfisfræðum, fjallar um trjá- og runnaklippingar og vorverkin í garðinum Viðburðurinn fer fram í Huldustofu á 3. hæð aðalsafns. Aðgangur ókeypis og öll velkomin á meðan húsrúm leyfir.
05.04.2024 kl. 13:00 - Bókasafn Kópavogs

Hugleiðsla

Hugleiðsla með Thelmu Björk Jónsdóttir á aðalsafni Bókasafns Kópavogs  „Leggjum inn á andlega bankann.“ Gestir sitja á stólum og Thelma leiðir tímann í gegnum öndun, möntrur, tónheilun (og jákvæð inngrip). Tilgangurinn er að auka hamingjuna, virkja okkar innra ljós og eiga stund út af fyrir sig. Hver tími er 30 mín og það er frítt inn. Föstudaga kl. 13:00. Thelma Björk Jónsdóttir er menntaður fatahönnuður, listgreinakennari, jóga- og hugleiðslukennari og með diplóma í jákvæðri sálfræði. Öll velkomin á meðan húsrúm leyfi.
06.04.2024 kl. 11:30 - Bókasafn Kópavogs

Lesið fyrir hunda

Bókasafn Kópavogs ásamt Vigdísi, vinum gæludýra á Íslandi, býður börnum að lesa fyrir hunda sem hafa fengið sérstaka þjálfun í að hlusta á upplestur. Skráning fer fram á eyrun.osk@kopavogur.is  Viðburðurinn er hugsaður fyrir 5-12 ára börn sem eru byrjuð að lesa sjálf. Lestrarstundin er ekki ætluð börnum sem glíma við hundahræðslu heldur er markmiðið að auka öryggi við lestur, ekki síst hjá þeim sem eiga við lestrarörðugleika að stríða. Hundurinn hjálpar barninu að slaka á, gagnrýnir ekki lesturinn og leiðréttir ekki barnið.
06.04.2024 kl. 13:00 - Náttúrufræðistofa Kópavogs

Fuglaskoðun í Kópavogsdal

Í tilefni af komu lóunnar, vorboðans okkar ljúfa, býður Náttúrufræðistofa Kópavogs upp á fuglaskoðun í Kópavogsdal. Leiðsögnin byrjar við andapollinn, vestast í Kópavogsdalnum en þar tekur. Sölvi Rúnar Vignisson, fuglafræðingur, á móti áhugasömum náttúruskoðurum á öllum aldri og segir frá þeim fuglum sem þar ber fyrir sjónir. -----Á þessum tíma árs leggja fuglar, sem eiga vetursetu á öðrum slóðum, leið sína til Íslands til að ala afkvæmi sín og dvelja sumarlangt. Meira en helmingur þeirra 80 tegunda sem verpa á Íslandi eru farfuglar. Þeir koma að vori og fara að hausti. Staðfuglar eru svo þeir sem halda kyrru fyrir og þreyja veturinn á Íslandi en telur sá hópur 34 tegundir Frábært tækifæri fyrir forvitna að koma og fræðast um náttúruna í nærumhverfinu! Komið klædd eftir veðri og með sjónauka ef þið hafið tök á. Hlökkum til að sjá ykkur öll.
07.04.2024 kl. 16:00 - Salurinn

Hjördís Geirs

Syngjandi í 65 ár Afmælistónleikar í tilefni af löngum og farsælum ferli söngkonunnar ástsælu Hjördísar Geirs. Hún fagnar þeim tímamótum á 80 ára afmælinu sínu í Salnum ásamt góðum gestum og verður stiklað á stóru yfir söngferilinn undanfarin 65 ár. Söngkona Hjördís Geirs hefur starfað í tónlistarbransanum á Íslandi sleitulaust í 65 ár og er enn að...og því ber að fagna. Hjördís steig fyrst á svið árið 1959 með Hljómsveit Gissurar Geirs og hefur verið að síðan þá, sungið með hinum ýmsu hlómsveitum, stjórnað sinni eigin, starfað sem skemmtanastýra á Spáni og skemmt um allt land. Hjördís fagnar þessum tímamótum á 80 ára afmælinu sínu og fær til sín góða gesti ásamt því að fjölskyldumeðliðir stíga á stokk og hefja upp raust sína. Fram koma auk Hjördísar: Benni Sig., Gísli Magna, Hera Björk, Ólafur Bachmann og Þórdís Petra ásamt Kvennakórnum Seljurnar og hljómsveit undir stjórn Pálma Sigurhjartar skipuð þeim Róberti Þórhallssyni bassaleikara, Sigurgeir Sigmunds gítarleikara og Einari Val Scheving trommuleikara.
Fleiri viðburðir

Hafðu samband

 

Hringdu í 441 0000

ef þig vantar aðstoð, svör eða nánari upplýsingar. Opnunartími Þjónustuversins er mánudaga - fimmtudaga frá 8 - 16 en frá 8 - 13 á föstudögum.

Hringja

 

Sendu okkur póst

Við tökum á móti ábendingum og fyrirspurnum í gegnum tölvupóst. Smelltu á merkið hér að ofan til að senda okkur póst.

Senda póst

 

Þarftu að senda viðkvæm gögn á öruggan hátt til Kópavogsbæjar

Notendur geta sent Kópavogsbæ viðkvæmar skrár eftir að þeir hafa auðkennt sig með rafrænum skilríkjum.

Gögnum er eytt úr Signet transfer eftir að viðkomandi hefur sótt þau.

Signet