|
Tónlistarsafn Íslands sett á fót í Kópavogi |
|
|
|
 Þorgerður Katrín Gunnarsdóttir menntamálaráðherra fyrir hönd menntamálaráðuneytisins og Gunnar I. Birgisson bæjarstjóri fyrir hönd Kópavogsbæjar undirrituðu í dag samning um stofnun og rekstur Tónlistarsafns Íslands í Kópavogi. „Söguleg stund,“ sagði Jónas Ingimundarson, píanóleikari og tónlistarráðunautur Kópavogs.
Undirskrift samninganna fór fram við hátíðlega athöfn í nýju húsnæði sem ætlað er undir safnið við Hábraut, gegnt Salnum, Tónlistarhúsi Kópavogs, og Listasafni Kópavogs - Gerðarsafni. Tónlistarsafninu er ætlað að vera þjónustu- og fræðslu- og miðlunarsetur fyrir tónlist sem þjónar almenningi, söfnum og stofnunum í landinu með upplýsingum um listgreinina.
Um stórviðburð er að ræða þar sem til verður stofnun til að halda utan um og miðla heilli listgrein. Þar með rætist draumurinn um samastað fyrir tónlistarsögu þjóðarinnar.
„Ég vil þakka menntamálaráðherra sérstaklega og starfsfólki menntamálaráðuneytisins fyrir samstarfið meðan á undirbúningi þessa máls hefur staðið,“ sagði Gunnar I. Birgisson. „Ríkið leggur til 30 milljónir króna í stofnkostnað og stendur straum af 40% af rekstrarkostnaði.“
Þorgerður Katrín var bersýnilega slegin eftir fréttir af alvarlegum veikindum forsætisráðherra og sagðist hún því vera fegin að koma í helg vé tónlistar og hlýða á fagra tóna, en Jónas Ingimundarson og Þóra Einarsdóttir söngkona fluttu nokkur íslensk sönglög við þetta tækifæri.
„Hér verða varðveittar menningarminjar,“ sagði ráðherra, „og okkur þótti sjálfsagt að leita til Kópavogs um það með hliðsjón af því hvernig þið hafið hlúð að tónlistinni hér í bænum.“
Menntamálaráðherra þakkaði sömuleiðis gott samstarf og sagði að fjármunir þeir, sem ríkið ætlaði til starfseminnar, myndu skila sér og það ríkulega í framtíðinni.
Stofnun Tónlistarsafns á sér nokkurn aðdraganda og hefur verið samin stofnskrá um það með hvaða hætti safnið skuli viða að sér, annast og miðla heimildum um tónlistararfinn:
• Að skrá og miðla hvers kyns upplýsingum og munum sem tengjast tónlist á Íslandi frá upphafi s.s. hljóðfærum, hljómtækjum, hljóðupptökum, nótum, bókum, myndum og munum.
• Að safna heimildum og gögnum um íslenska tónmenningu í formi frásagna, bréfa, viðtala, blaða- og tímaritsgreina, ævisagna og kvikmynda sem endurspegla íslenskan tónlistarheim.
• Að hafa frumkvæði að og stunda rannsóknir á sögu íslenskrar tónlistar/tónminja í samstarfi við fræðimenn á þessu sviði og skapa þeim jafnframt aðstöðu til vinnu sinnar eftir því sem kostur er. Safnið skal hafa frumkvæði að umsóknum um rannsóknarstyrki á sviði íslenskrar tónlistar.
• Að stuðla að miðlun sögu íslenskrar tónlistar, m.a. í formi fyrirlestra, námskeiðshalds og skólakynninga. Lögð skal sérstök áhersla á að nýta nýjustu aðferðir hverju sinni við miðlun efnisins.
• Að vera ráðgefandi á sviði tónlistar fyrir nemendur, skóla, einstaklinga og stofnanir sem til hennar kunna að leita á því sviði.
• Að leitast við að vera leiðandi og ráðgefandi í vörslu hljóðritana með íslensku efni, bæði útgefnu sem og hljóðritana í eigu stofnana og einstaklinga.
• Að tryggja almennt aðgang að og upplifun með nýjustu tækni.
Forstöðumaður Tónlistarsafns Íslands, sem verður opnað almenningi síðar á þessu ári, verður Bjarki Sveinbjörnsson, doktor í tónvísindum. |
