|
|
Forsíða  Framkvæmdir / Skipulag Umhverfismál Staðardagskrá 21
|
Staðardagskrá 21 Kópavogi |
|
|
|
|
Staðardagskrá 21 fyrir Kópavogsbæ var í fyrsta skipti gerð árið 2003. Nú er hafin vinna við endurskoðun á Staðardagskránni og stefnt er á að vinnu við hana ljúki um áramótin 2009- 2010.
Hægt er að senda okkur athugasemdir og ábendingar á umhverfismal@kopavogur.is eða skipulag@kopavogur.is
Kópavogur um langa framtíð
- Staðardagskrá 21 fyrir Kópavogsbæ
Með Staðardagskrá 21 fyrir Kópavog skipar bærinn sér í hóp þeirra sveitarfélaga hér á landi sem mótað hafa sér áætlun og framtíðarsýn um sjálfbæra þróun. Áætlunin á rót sína að rekja til heimsráðstefnu Sameinuðu Þjóðanna um umhverfi og þróun, sem haldin var í Ríó de Janeiro í Brasilíu árið 1992. Þar samþykktu um 180 þjóðir framkvæmdaáætlun um sjálfbæra þróun í heiminum, Dagskrá 21 (Agenda 21) og var Ísland eitt þeirra.
Staðardagskrá 21
Staðardagskrá 21 (Local Agenda 21) er sá hluti Dagskrár 21 sem snýr að sveitarstjórnum. Henni er ætlað að vera heildaráætlun sveitarstjórna um þróun samfélagsins fram á 21. öldina. Áætlunin snýst ekki eingöngu um umhverfismál í venjulegum skilningi heldur er henni ætlað að taka jafnframt tillit til efnahagslegra og félagslegra þátta. Í Staðardagskrá 21 er kveðið á um samráð við íbúana á hverjum stað, m.a. með þátttöku atvinnulífs og félagasamtaka.
Sjálfbær þróun
Í skýrslu Brundtlandnefndarinnar, sem birtist árið 1987 í bókinni Sameiginleg framtíð vor (Our Common Future), var sjálfbær þróun skilgreind á eftirfarandi hátt:
Sjálfbær þróun er þróun sem gerir okkur kleift að mæta þörfum okkar, án þess að stefna í voða möguleikum komandi kynslóða á að mæta þörfum sínum.
Í hugmyndafræði sjálfbærrar þróunar er ástand umhverfisins skoðað í samhengi við efnahagslega og félagslega þróun og leitað leiða til að auka auð og velferð mannkyns án þess að það skaði grunngæði jarðar.
Staðardagskrá 21 í íslenskum sveitarfélögum
Árið 1998 var komið á fót sameiginlegu verkefni umhverfisráðuneytis og Sambands íslenskra sveitarfélaga um Staðardagskrá 21, í því skyni að styðja sveitarfélögin í að koma á Staðardagskrárstarfi. Þegar þetta er skrifað hafa 16 sveitarstjórnir samþykkt sína fyrstu útgáfu af SD21, 8 vinna að henni, auk Kópavogs. Samtals hafa 53 sveitarfélög tengst starfinu með einum eða öðrum hætti en þau telja alls 268.688 íbúa, eða 93,86% landsmanna.
Staðardagskrá 21 í Kópavogi
Stöðumat
Vinna við Staðardagskrá 21 hófst hjá Kópavogsbæ í árslok 1999 með stöðumati þar sem tilgreind var staðan í þeim málaflokkum sem þá var áformað að Staðardagskrá Kópavogs næði til. Stöðumatið var unnið af starfsmönnum allra sviða en umsjón með gerð þess var í höndum umhverfisráðs og sá bæjarskipulag um framkvæmd og ritstjórn. Stöðumatið lá fyrir í byrjun árs 2001.
Íbúaþing
Eins og fram kom hér að ofan var lögð áhersla á það í Dagskrá 21 að sveitarfélögin virkjuðu almenning við gerð Staðardagskrár 21. Í febrúar 2001 var haldið íbúaþing um Staðardagskrá 21 í Kópavogi. Þetta var fyrsta íbúaþingið sem haldið var hér á landi en fleiri sveitarfélög hafa síðan fylgt í kjölfarið. Í framhaldi af íbúaþinginu varð jafnframt til samráðshópur um SD21 sem tók þátt í ferlinu áfram.
Tenging við aðalskipulag
Aðalskipulag Kópavogs 2000-2012 var samþykkt vorið 2002. Vinnan við mótun stefnu og markmiða vegna aðalskipulags var langt komin þegar vinnu við Staðardagskrá 21 var ýtt úr vör. Þar sem aðalskipulag er framtíðarsýn hvers sveitarfélags og hefur jafnframt lögbundinn sess, var þess gætt að samræmi ríkti milli þessara tveggja áætlana. Það má því segja að Staðardagskrá 21 fyrir Kópavog sé að hluta til aðgerðaáætlun fyrir aðalskipulagið vegna þess að þar eru skilgreindar tímasettar leiðir að markmiðum og ábyrgðaraðilar tilgreindir. Þetta er tvímælalaust einn helsti styrktur Staðardagskrár 21 fyrir Kópavog og bendir margt til þess að fleiri sveitarfélög muni, hvað þetta varðar, feta í fótspor Kópvogs.
Vinna með ráðum, nefndum og embættismönnum
Ráð og nefndir, ásamt lykilstarfsmönnum, tóku virkan þátt í mótun stefnu, markmiða og leiða í Staðardagskrárvinnunni og stóð ferlið frá hausti 2001 til vors 2002. Þá var ákveðið að leggja Staðardagskrána til hliðar og ljúka stefnumótunarferlinu að kosningum liðnum. Sá þráður var tekinn upp haustið 2002 í ráðum og nefndum og lýkur þeirri vinnu hér, með samþykkt meðfylgjandi plaggs. Það skal þó ítrekað að vinnu við Staðardagskrá 21 lýkur í raun aldrei heldur þurfa öll sveitarfélög að halda áfram að feta þessa braut í átt að sjálfbærri þróun, skref fyrir skref.
Eftirfylgni
Hér eru tilgreind fjölmörg verkefni sem nú verða sett í viðeigandi farveg og gert er ráð fyrir að þau verði að mestu unnin innan stjórnkerfis bæjarins. Á hverju hausti verða haldnir samráðsfundir yfirmanna sviða og annarra lykilstarfsmanna til að meta hvað hefur áunnist og varða leiðina áfram í viðkomandi málaflokkum.
Fyrsta endurskoðun stefnu og markmiða er áformuð árið 2006 og mun þá tengjast næstu endurskoðun Aðalskipulags.
Grænt bókhald
Liður í eftirfylgni Staðardagskrár 21 er að komið verður á svokölluðu Grænu bókhaldi fyrir Kópavogsbæ en stöðugt fleiri sveitarfélög, bæði hér á landi og erlendis, taka upp þessa leið til að vakta helstu umhverfisþætti. Í fyrstu er gert ráð fyrir að skilgreindar verði lykiltölur í 5 þáttum sem verða metnir og fylgst með reglulega. Í framhaldinu er síðan hægt að fjölga þeim lykiltölum eftir því sem bæjaryfirvöld vilja stefna að. Gerð verður grein fyrir niðurstöðum lykiltalna í ársskýrslu bæjarins.
Sjálfbær þróun í Kópavogsbæ
Nú þegar hefur uppbygging og þróun í Kópavogsbæ verið í samræmi við margar viðmiðanir sjálfbærrar þróunar. Þar má m.a. nefna eftirfarandi:
- Þétt byggð og þar með mjög góð nýting lands.
- Blöndun aldurs- og þjófélagshópa í hverfum.
- Lítil skólahverfi.
- Tengsl, maður, náttúra, t.d. með stíg meðfram ströndinni, hesthúsum og reiðleiðum innan bæjarins og fræðsluskiltum
- Áhersla á fjölbreytt atvinnulíf og atvinnuhverfi.
Bæjaryfirvöld í Kópavogi hyggjast halda áfram á sömu braut við að efla bæinn og byggja hann upp með það að leiðarljósi að íbúar bæjarins geti um langa framtíð búið við heilbrigði og góð lífsgæði og verði búin aðstaða til að njóta frístunda og samveru í sátt og jafnvægi við umhverfi sitt. Samþykkt Staðardagskrár 21 er mikilvægt skref í þessa átt. Með þessu skrefi gera bæjaryfirvöld samning við komandi kynslóðir Kópavogsbúa.
Kópavogur um langa framtíð - Staðardagskrá 21 fyrir Kópavogsbæ
Aðalskipulagsuppdráttur
Sveitarfélagsuppdráttur
|
|
