Heiðursborgarar Kópavogs
Finnbogi Rútur Valdemarsson og Hulda Jakobsdóttir
Er liðin voru 21 ár frá því Kópavogur fékk kaupstaðarréttindi samþykkti bæjarstjórn Kópavogs á fundi sínum 8. október 1976, að velja sæmdarhjónin Finnboga Rút Valdemarsson og Huldu Jakobsdóttur, heiðursborgara bæjarins. Finnbogi og Hulda stóðu í fararbroddi þeirra sem börðust fyrir því að íbúarnir á hálsunum í Kópavogi fengju þau grundvallarmannréttindi að geta búið innan Seltjarnarneshrepps með öll eðlileg réttindi borgaranna en þar skorti mikið á.
Þegar Kópavogur varð sjálfstæður hreppur í ársbyrjun 1948 varð Finnbogi Rútur fyrsti oddviti þessa nýja hrepps. Og þegar Kópavogur fékk kaupstaðarréttindi 1955 varð Finnbogi fyrsti bæjarstjóri hins nýja kaupstaðar. Finnbogi var síðan bæjarstjóri til ársins 1957.
Hulda Jakobsdóttir eiginkona Finnboga tók við af honum sem bæjarstjóri á árinu 1957, fyrsta konan á Íslandi til að verða bæjarstjóri. Hulda var bæjarstjóri til ársins l962. Hjónin tóku áfram þátt í uppbyggingu bæjarins allt fram yfir 1975 er þau drógu sig í hlé frá vafstri bæjarmálanna.
Sigfús Halldórsson
Þriðji heiðursborgari bæjarins var svo valinn þann 22. mars 1994, en þá kaus bæjarstjórn Kópavogs Sigfús Halldórsson tónskáld heiðursborgara. Sigfús var búsettur í Kópavogi frá 1963 og alltaf á sama stað í Víðihvammi 16.
Sigfús var afkastamikið tónskáld og dáður af öllu landsmönnum fyrir lögin sín og eins og Sigurður Geirdal bæjarstjóri sagði í ávarpi sínu til Sigfúsar í hófi sem honum var haldið í tilefni heiðursborgaratilnefningarinnar að Kópavogur gæti ekki né vildi eigna sér tónskáldið og listamanninn Sigfús Halldórsson því hann væri allra landsmanna en ekki eins sveitarfélags.
Eftir Sigfús liggur mikill auður í tónlist hans og listaverkum og landsmenn allir ungir sem aldnir þekkja lögin hans enda orðin löngu sígild og sungin enn þá alls staðar þar sem fólk kemur saman í söng.
Jónas Ingimundarson
Fjórði heiðursborgari Kópavogs var valinn 22. nóvember 2011.
Jónas hefur frá árinu 1994 starfað sem tónlistarráðunautur Kópavogs og var einn helsti hvatamaður þess að Salurinn, tónlistarhús Kópavogs, var byggður en húsið var vígt í janúar 1999. Hann hefur unniið ómetanlegt starf í þágu tónlistar og menntunar í Kópavogi. Dugnaður hans, hæfileikar og listfengi hafi skapað honum nafn sem eins fremsta tónlistarmanns Íslendinga.
Jónas er fæddur á Bergþórshvoli í Vestur-Landeyjum í Rangárvallasýslu 30. maí 1944. Hann hóf tónlistarnám sitt eftir fermingu hjá frú Leopoldínu Eiríks en árin þar á eftir stundaði hann tónlistarnám við Tónlistarskólann í Reykjavík og framhalsnám við Tónlistarskólann í Vínarborg.
Hann lék á sínum fyrstu opinberu tónleikum árið 1967 en síðan þá hefur hann haldið fjölda tónleika hér heima sem og erlendis. Jónas var sæmdur Riddarakrossi hinnar íslensku fálkaorðu árið 1994 og Dannebrog orðunni árið 1996. Hann hefur einnig hlotið heiðursverðlaun VÍS, Íslandsbanka og DV og þá hlaut hann heiðursverðlaun Íslensku tónlistarverðlaunanna er þau voru í fyrsta sinn veitt árið 2001.