Fréttasafn

Samkomulag um vináttubæjarsamband milli Kópavogsbæjar og Wuhan-borgar í Hubei-héraði í Kína var undirritað í Gerðarsafni árdegis. Gunnar I. Birgisson bæjarstjóri og Ómar Stefánsson, formaður bæjarráðs, undirrituðu viljayfirlýsinguna fyrir hönd Kópavogs en Peng Lemin, aðalframkvæmdastjóri fastanefndar Wuhan-borgar, fyrir hönd Wuhan.

Kínversk menningarhátíð í Kópavogi hefst á morgun, laugardaginn 29. september. Mikið verður um dýrðir víða um bæinn næstu níu dagana eða allt til sunnudagsins 7. október. Loftfimleikar, listmunir, þjóðlagatónlist, fornminjar, flugdrekar, bókmenntir, kvikmyndir, ljósmyndasýning, málþing og fjölskylduhátíð – sem sagt eitthvað fyrir alla. Smelltu hér til að sjá nánari upplýsingar um dagskrá hátíðarinnar.

ÓB-ráðgjöf býður foreldrum barna í leikskólum Kópavogs námskeið sem ber nafnið Núll til sex ára - Uppeldi barna frá fæðingu til sex eða sjö ára aldurs. Eru þessi námskeið foreldrunum að kostnaðarlausu.

Hjólalest í tilefni af Evrópskri samgönguviku hafði viðkomu í Kópavogi um helgina á leið úr Hafnarfirði í Reykjavík. Reiðhjólafólk úr Kópavogi slóst með í för við Gerðarsafn. Þar var þorstanum svalað áður en haldið var í Nauthólsvík í nöpru veðri til að hjóla með öðrum hjólalestum að Ráðhúsi Reykjavíkur.

Heimsmeistaraskáksveit Salaskóla í Kópavogi fjórtán ára og yngri gerði víðreist um Namibíu í ferð sem hún fór í boði Þróunarsamvinnustofnunar Íslands. Sveitin sýndi listir sínar og tefldi við unga heimamenn. Sem við var að búast höfðu heimsmeistararnir nokkra yfirburði.

Bæjarráð Kópavogs hefur samþykkt aðgerðaáætlun leikskólanefndar í því skyni að auka stöðugleika í starfsmannahaldi, laða starfsfólk að leikskólum bæjarfélagsins og auka fagþekkingu í leikskólum Kópavogsbæjar.

Samanlögð reynsla, þekking og hæfileikar fulltrúa Kópavogs í spurningakeppninni Útsvar í Ríkissjónvarpinu dugði ekki gegn snörpu liði Hveragerðis. Þrátt fyrir tap í fyrsta þætti spurningaleiksins á liðið enn möguleika á að komast áfram. Fjögur stigahæstu tapliðin fá annað tækifæri. Kópavogsliðið hlaut 70 stig og tapaði aðeins með 4.

Salurinn, tónlistarhús Kópavogs, fær öflugan bakhjarl í Sparisjóði Kópavogs næstu tvö árin. Efling menningarmála hefur verið eitt af helstu markmiðum Sparisjóðsins í fjölda ára. Carl H. Erlingsson sparisjóðsstjóri, Unnur Guðríður Indriðadóttir markaðsfulltrúi, Vigdís Esradóttir, forstöðumaður Salarins, og Gunnar I. Birgisson bæjarstjóri undirrituðu styrktarsamninginn.

Kópavogsbær auglýsir til úthlutunar byggingarrétt fyrir íbúðarhús í Vatnsendahlíð í Kópavogi. Þar er mikið og fagurt útsýni. Þaðan sér yfir Elliðavatn og Heiðmörk og allt að Hengilssvæðinu, Vífilsfelli og Bláfjöllum til austurs og hluta af Kópavogi og Reykjavík til norðurs og vesturs með útsýni yfir Esjuna, Akrafjall og til sjávar.

Gissur Páll Gissurarson tenórsöngvari hlaut 500 þúsund króna styrk úr Styrktarsjóði Önnu Karólínu Nordal. Þetta er í sjötta sinn sem úthlutað er úr styrktarsjóðnum í Salnum í Tónlistarhúsi Kópavogs.

Unnur Stefánsdóttir leikskólastjóri Heilsuleikskólans Urðarhóls og frumkvöðull heilsustefnunnar hefur hætt störfum. Unnur hefur störf hjá RV-ráðgjöf sem framkvæmdastjóri Heilsustefnunnar. Sigrún Hulda Jónsdóttir tekur við starfi leikskólastjóra en hún er einn af stofnendum stefnunnar.

Myndin er tekin við skólastjóraskiptin.

Gunnar I. Birgisson bæjarstjóri heimsótti Læknavaktina, Smáratorgi 1, þar sem fimm sérfræðingar í heimilislækningum taka á móti sjúklingum sem þurfa umönnun utan dagvinnutíma. Um 60 þúsund manns leita árlega á Læknavaktina auk þess sem læknar hennar fara í 7 þúsund vitjanir og veita símaráðgjöf.

Athugasemdir við hugmyndir að skipulagi á hafnarsvæði á Kársnesi bárust frá alls 1674 einstaklingum og samtökum, þar af 1117 af Kársnesinu sjálfu. Langflestar athugasemdir bárust eftir að bæjarráð Kópavogs ákvað að framlengja athugasemdafrestinn til 3. september.

Þróunarsamvinnustofnun Íslands og Kópavogsbær bjóða heimsmeistaraliði Salaskóla í skólaskák ásamt tveimur fararstjórum til Namibíu í því skyni að vekja athygli á íþróttinni. Flogið verður til Windhoek, höfuðborgar Namibíu, með viðkomu í London miðvikudag 12. september.

Umhverfisráð Kópavogs stendur fyrir stuttri göngu um Kársnes á árlegum umhverfisdegi bæjarins fimmtudaginn 6. september næstkomandi.

Nýlega var Margrét Magnúsdóttir ráðin leikskólastjóri í leikskólann Baug við Baugakór. Baugur er nýr leikskóli sem áformað er að taki til starfa í september.
Margrét var áður aðstoðarskólastjóri í Fífusölum.