Fréttasafn

Fjármála- og stjórnsýslusvið Kópavogsbæjar hefur mótað stefnu sem byggist á þremur meginstoðum, samvinnu, fagmennsku og heiðarleika. Bæklingur um stefnuna kom út í dag en í honum er fjallað um hlutverk sviðsins, framtíðarsýn, gildi, markmið, aðgerðir og árangursmælikvarða.

Ómar Stefánsson, formaður bæjarráðs í Kópavogi, afhenti í dag MS-félagi Íslands fyrir hönd bæjaryfirvalda 2 milljóna króna styrk til stækkunar á húsnæði fyrir dagvist félagsins.

Bæjarstjórn Kópavogsbæjar hefur samþykkt innkaupareglur, sem taka gildi 1. mars næstkomandi, til að stuðla að vönduðum og hagkvæmum innkaupum og til að tryggja gæði vöru, þjónustu og verka.

Bæjarráð hefur samþykkt tillögu dómnefndar um að ganga til samninga við Eykt ehf. um að reisa íþróttamannvirki í Fagralundi í Fossvogsdal. Þar verður reist nýtt íþróttahús og félagsaðstaða HK stækkuð og stórbætt.

Bæjarráð Kópavogsbæjar hefur samþykkt tímabundna fjárveitingu til sjálfseignarstofnunarinnar Sunnuhlíðar, sem er hjúkrunarheimili aldraðra í Kópavogi, þar sem ekki hefur tekist á síðastliðnum tveimur mánuðum að manna vaktir að fullu.

Leikskólanefnd telur heppilegast eins og sakir standa að Kópavogsbær taki við rekstri á leikskólanum Hvarfi sem einkaaðilar hafa rekið á grundvelli þjónustusamnings við bæinn. Bæjarráð hefur staðfest afgreiðslu leikskólanefndar.

Þemadagar verða haldnir í öllum félagsmiðstöðvum ÍTK 18., 20. og 22 febrúar næstkomandi. Viðfangsefnin eru margvísleg og grundvallast á fróðleik og verklegri þátttöku. Forstöðumenn og starfsfólk í samvinnu við unglingana útfæra viðfangsefnin.

Einingaverksmiðjan Borg ehf. í Kópavogi auglýsir ranglega í dagblöðum í dag að starfsemi hennar rúmist innan heimilda fyrirliggjandi starfsleyfis. Af því tilefni sendi Kópavogsbær fjölmiðlum yfirlýsingu.

Eistneski kammerkórinn Eesti Filharmoonia Kammerkoor heldur tónleika í Tíbrá tónleikaröðinni í Salnum á sunnudagskvöld kl. 20 í tilefni af því að 90 ár eru síðan eistneska þjóðin varð sjálfstæð. Þessi víðfrægi og margverðlaunaði kór flytur Íslendingum jafnframt þjóðargjöf í þakkarskyni fyrir að viðurkenna fyrstir þjóða endurheimt sjálfstæði Eista árið 1991.

Ástin blómstrar í Bókasafni Kópavogs á fimmtudögum fram í miðjan mars. Þá verða haldnir fyrirlestrar um fyrirbærið frá ýmsum sjónarhornum.

Gunnar I. Birgisson, bæjarstjóri í Kópavogi, opnaði nýja 700 fm heilsuræktarstöð World Class á 15. hæð í nýja turninum við Smáratorg í dag. Fjölmenni var við opnunina.

Yfirskrift Dags leikskólans var: „Við bjóðum góðan dag – alla daga!“ Þessi einkunnarorð gáfu ýmsum leikskólum innblástur fyrir verkefni dagsins, t.d. í Álfaheiði urðu þau uppspretta fjölþjóðlegrar umfjöllunar.

Árangur nemenda í grunnskólum í Kópavogi í samræmdum prófum 10. bekkjar er uppörvandi í samanburði við meðalárangur allra skóla í Suðvesturkjördæmi.

Dagur leikskólans 6. febrúar er nú haldinn hátíðlegur í fyrsta sinn á Íslandi. Haldið verður upp á daginn með margvíslegum hætti í öllum leikskólum Kópavogs. Meðal annars hefur verið gefið út veggspjald til að vekja athygli á starfinu í leikskólunum.

Kópavogsbær hefur fest kaup á mannauðs- og launalausnum í SAP viðskiptahugbúnaði frá AppliCon.

Dagur leikskólans verður haldinn hátíðlegur í fyrsta sinn 6. febrúar næstkomandi. Tilgangurinn er að vekja athygli almennings á þýðingu leikskóla fyrir börn og auka áhuga á starfinu. Á forsíðu heimasíðu Kópavogsbæjar er tengill á upplýsingabækling sem gefinn var út í þessu tilefni.

Sjaldan hefur verið eins fjölbreytt dagskrá í Salnum í Tónlistarhúsi Kópavogs eins og nú í febrúar. Allir ættu að finna eitthvað við sitt hæfi: Pétur og úlfurinn, Nosferatu-kvikmyndatónleikar, Trio Lurra, Adapter og Ásgerður Júníusdóttir, Hnúkaþeyr, Camilla Söderberg, Bryndís Halla og Anna Guðný, Jussi Björling dagskrá o.s.frv. o.s.frv. Miðasala er hafin.