Fréttasafn

Bæjarráð Kópavogs hefur samþykkt að Kópavogsbær greiði fyrir sex mánaða bókasafnskort og sömuleiðis þriggja mánaða kort til að stunda líkamsrækt, hvort heldur er í sundlaugum bæjarins eða líkamsræktarmiðstöðvum, fyrir Kópavogsbúa sem eru á atvinnuleysisbótum og ekki njóta samsvarandi styrkja frá stéttarfélagi.

Bjarni Harðarson, fyrrverandi alþingismaður, er væntanlegur í Bókasafn Kópavogs fimmtudagskvöldið 19. febrúar til að tala um íslenska fyndni. Heimsókn hans er liður í röð erinda um húmor og fyndni sem haldin eru í bókasafninu.

Gunnar I. Birgisson, bæjarstjóri í Kópavogi, og Hjörleifur B. Kvaran, forstjóri Orkuveitu Reykjavíkur, hafa gengið frá samkomulagi um samstarf við sameiginlegar framkvæmdir, götulýsingu og rafmagnskaup fyrir stofnanir sveitarfélagsins af Orkuveitunni.

Jafnréttisstofa hefur gefið út dagatal í tilefni 30 ára afmælis samnings um afnám allrar mismunar gagnvart konum eða Kvennasáttmálans sem var samþykktur af allsherjarþingi Sameinuðu þjóðanna 18.desember 1979. Myndin er frá afhendingu dagatalsins í Hörðuvallaskóla.

Stúlkur í grunnskólum í Kópavogi sóttu bæði gull og silfur á Íslandsmót grunnskólasveita í skák í stúlknaflokki. Salaskóli sigraði en Hjallaskóli varð í öðru sæti.

Tómstunda- og menningarsvið Kópavogsbæjar fer með umboð sveitarfélagins vegna greiðslu kostnaðar af tónlistarkennslu í öðru sveitarfélagi. Tónlistarnemendur í Kópavogi þurfa að sækja um námsvist í öðru sveitarfélagi í samræmi við reglur sem hafa verið birtar á heimasíðu bæjarfélagsins.

Lífshlaupið, sem hófst í dag, er hvatningar- og átaksverkefni Íþrótta- og Ólympíusambands Íslands. Lífshlaupið höfðar til allra landsmanna og er ætlað að skapa skemmtilega stemningu og auka félagsandann á vinnustöðum.

Vegna uppfærslu á tölvukerfi bæjarskrifstofa Kópavogs verður lokað í innheimtu og bókhaldi bæjarins á morgun, föstudaginn 6. febrúar.

Dagur leikskólans 6. febrúar er nú haldinn hátíðlegur öðru sinni. Yfirskrift dagsins í leikskólum Kópavogs er að „varpa ljósi á barnið í leikskólanum“ eins og fram kemur í auglýsingu þeirra um þennan dag.

Fyrsta úthlutun úr Skákstyrktarsjóði Kópavogs fer fram í mars næstkomandi en umsóknarfrestur rennur út í lok febrúarmánaðar.

SAFT vakningarverkefni um jákvæða og örugga notkun barna og unglinga á netinu er að hefjast í grunnskólum Kópavogs í samvinnu Heimilis og skóla og forvarnarnefndar Kópavogs. SAFT er skammstöfun fyrir samfélag, fjölskyldu og tækni.