Fréttasafn

Sannkölluð jóla- og fjölskyldustemmning myndaðist á Hálsatorgi þegar kveikt var á ljósunum á vinabæjarjólatrénu frá Norrköping í Svíþjóð. Fjölmenni tók þátt í jóladagskránni, laufabrauðabakstri og fjöldasöng svo að nokkuð sé nefnt, og gerði sér veitingarnar að góðu.

Jólahátíð í Kópavogi verður á Hálsatorgi laugardaginn 28. nóvember og í nærliggjandi menningarstofnunum. Kópavogsbúum og öðrum gestum er meðal annars boðið að taka þátt í laufabrauðsbakstri, hlusta á jólasöngva, fræðast um jólaköttinn og tendra á jólaljósunum á vinarbæjarjólatré Kópavogsbúa. Undanfarin ár hefur myndast sannkölluð fjölskyldustemning þennan dag enda höfðar dagskráin til allra aldurshópa.

Lista- og menningarráð Kópavogs efnir til árlegrar ljóðasamkeppni undir heitinu „Ljóðstafur Jóns úr Vör“. Skilafrestur ljóða er til 11. desember næstkomandi.

Veitt verða vegleg verðlaun og mun verðlaunaskáldið fá til varðveislu í eitt ár göngustaf Jóns úr Vör sem á verður festur skjöldur með nafni skáldsins.

Jafnréttisnefnd Kópavogs boðar til opins kvennafundar vegna næstu bæjarstjórnarkosninga miðvikudaginn 25. nóvember. Fundurinn er haldinn í samstarfi við alla stjórnmálaflokka í bæjarstjórn Kópavogs með það að markmiði að auka hlut kvenna á vettvangi bæjarstjórnarmála.

Fyrsti hverfafundur Skipulags- og umhverfissviðs vegna endurskoðunar aðalskipulags Kópavogs og Staðardagskrár 21 fór fram í Hörðuvallaskóla í gær.

Stíllinn, hönnunarkeppni unglinga á landsvísu, verður haldin í Vetrargarðinum í Smáralind laugardaginn 21. nóvember frá kl. 13:00 – 18:00.

Kópavogsbær, Náttúrufræðistofa Kópavogs og VSÓ Ráðgjöf efna til kynningar á einkar nýstárlegri hugmynd um nýtingu á Þríhnúkagíg í þágu ferðamennsku og fræðslu um náttúru Íslands. Kynningin fer fram í Salnum í dag, miðvikudaginn 18. nóvember, kl. 17.00.

Nýtt íþróttamannvirki á félagssvæði HK í Fagralundi í Fossvogsdal var opnað í dag. Um er að ræða íþróttahús sem nýtist handknattleiks- og blakfólki HK auk nemendum Snælandsskóla. Félagsaðstaða HK hefur jafnframt verið stórlega bætt sem og aðkoma að húsunum.

Íbúum í Kópavogi er boðið að koma að stefnumótun um þróun byggðar og samfélags í tengslum við endurskoðun aðalskipulags Kópavogs og Staðardagskrár 21 fyrir Kópavog. Skipulags- og umhverfissvið efnir til þriggja opinna funda þar sem óskað verður eftir hugmyndum og tillögum frá íbúum bæjarins um Kópavog framtíðarinnar undir yfirskriftinni: „Í þannig bæ vil ég búa.“

Bæjarstjórn Kópavogs býður til kynningar á hugmyndum um nýstárlega nýtingu Þríhnúkagígs í þágu ferðamennsku og fræðslu um náttúru Íslands. Kynningin fer fram í Salnum í Kópavogi miðvikudaginn 18. nóvember kl. 17:00. Að fundinum standa bæjarstjórn Kópavogs, VSÓ Ráðgjöf og Náttúrufræðistofa Kópavogs. Fundurinn er opinn og allir eru velkomnir.

Sjá nánar frétt Náttúrufræðistofu.

Forvarnanefnd Kópavogs býður til ráðstefnu um forvarnir í Salnum 16. nóvember næstkomandi kl. 15–17:30 í tilefni af nýrri forvarnastefnu Kópavogs. Yfirskrift ráðstefnunnar er: „Er allt í lagi hjá okkur?" Á ráðstefnunni verður stefnan kynnt. Fulltrúar frá stofnunum, deildum og félagasamtökum í Kópavogi, sem þátt tóku í mótun hennar, flytja erindi ásamt gestafyrirlesurum.

Forvarnaráðstefna 2009 - dagskrá

Gunnsteinn Sigurðsson, bæjarstjóri í Kópavogi, og Ómar Stefánsson, formaður bæjarráðs, afhentu Mæðrastyrksnefnd Kópavogs styrk á dögunum sem var ákveðinn í bæjarstjórn í tilefni af 1000. fundi hennar í september. Styrkurinn nemur 1000 krónum á hvern fund sem haldinn hefur verið frá upphafi og er alls ein milljón króna.

Norræna bókasafnavikan verður 9. — 15. nóvember í Bókasafni Kópavogs. Þemað verður stríð og friður á Norðurlöndum. Upphafsatriðið er mánudaginn 9. nóvember kl. 18:00 í fundarsalnum Kórnum á Bókasafni Kópavogs. Þá verða lesin ljóðin Skandinavisk förstås eftir Benny Andersen Gamli Stál eftir Runeberg í þýðingu Matthíasar Jochumssonar.

Tónlistarsafn Íslands sýnir nokkra helstu jazz-, rokk- og blúsgítara landsins sem og helstu tegundir magnara sem notaðir voru í bransanum. Þetta er þriðja sýning Tónlistarsafnsins.

Brúðuleiksýning fyrir 2ja til 6 ára börn verður á Bókasafni Kópavogs 7. nóvember. Sýningin heitir Sólarsaga og er í flutningi Helgu Arnalds. Sýnt verður kl. 13:00 í Lindasafni, Núpalind 7, og kl. 15:00 í aðalsafni í Hamraborg 6a. Sýningin tekur 40 mínútur. Allir velkomnir meðan húsrúm leyfir. Aðgangur er ókeypis.

Kóparokk, tónlistarhátíð unglinga, fer fram í félagsmiðstöðinni Ekkó í Kársnesskóla föstudaginn 6. nóvember og hefst kl. 20:00.