Fréttasafn

Vegin gæðavísitala þjónustu Strætó bs. hefur aldrei verið hærri frá stofnun byggðasamlagsins en nú, að því er fram kemur í niðurstöðum þjónustumats sem fram fór fyrir áramót. Skýrist það einkum af því að ánægja farþega með hitastig og innanþrif vagna mælist meiri en áður, stundvísi og aksturlag hefur batnað og viðmót vagnstjóra mælist nú mun betra en áður.

Börn í heilsuleikskólanum Urðarhóli í Kópavogi og nemendur Kársnesskóla tóku í morgun formlega í notkun aðstöðu í skógarlundi á Kópavogstúni sem hefur hlotið nafnið Ævintýraskógur. Komið hefur verið upp eldstæði og vönduðum bekkjum skammt frá gamla Kópavogsbýlinu og skólagörðunum sem notað verður við útikennslu í skólunum.

Gerður Kristný (Guðjónsdóttir) rithöfundur hlaut Ljóðstaf Jóns úr Vör fyrir ljóð sitt „Strandir“ í árlegri ljóðasamkeppni lista- og menningarráðs Kópavogs. Gerður Kristný er áttundi handhafi verðlaunanna frá stofnun samkeppninnar árið 2002.

Jón Yngvi Jóhannsson bókmenntafræðingur heimsækir Bókasafn Kópavogs, Hamraborg 6a, fimmtudaginn 28. janúar kl. 17:15 í þeim tilgangi að gera úttekt á bókaútgáfunni um síðustu jól.

Allir velkomnir, enginn aðgangseyrir.

Gunnsteinn Sigurðsson, bæjarstjóri í Kópavogi, og Gunnar Geir Gunnarsson, framkvæmdastjóri umferðaröryggissviðs Umferðarstofu, undirrituðu í morgun samstarfssamning um öryggisáætlun fyrir Kópavogsbæ.

Álagningarseðlar vegna fasteignagjalda í Kópavogi árið 2010 hafa verið sendir út. Álagningin byggist á fasteignamati húsa og lóða, sem tekur meðal annars mið af stærð þeirra, notkun og lóðarhlutastærð. Nánari upplýsingar er að finna hér.

HK er 40 ára og í tilefni af því verður haldin fjölskylduafmælishátíð í Fagralundi laugardaginn 23.janúar og árshátíð um kvöldið í Digranesi. HK var stofnað 26. janúar 1970.

Næstkomandi fimmtudag, 21. janúar 2010, verður greint frá niðurstöðum og veitt verðlaun í ljóðasamkeppninni Ljóðstafur Jóns úr Vör sem lista- og menningarráð Kópavogs efnir til á hverju ári. Verðlaunin eru ávallt afhent á afmælisdegi Jóns úr Vör (1917–2000). Eins og fyrri ár fer verðlaunaafhendingin fram í Salnum, Tónlistarhúsi Kópavogs, og hefst kl. 20:00.

Dómnefnd ljóðasamkeppni lista- og menningarráðs Kópavogsbæjar,sem kennd er við listaskáldið Jón úr Vör, hefur lokið störfum. Að þessu sinni fór hún yfir um það bil 300 ljóð sem bárust samkeppninni. Tilkynnt verður um sigurvegarann, sem hlýtur Ljóðstaf Jóns úr Vör, í Salnum fimmtudaginn 21. janúar 2010, á afmælisdegi Jóns úr Vör.

Nýr kafli í húsnæðismálum aldraðra á höfuðborgarsvæðinu hefst um næstkomandi páska þegar fyrri áfangi nýs hjúkrunarheimilis verður tekinn í notkun við Boðaþing í Kópavogi ásamt samtengdri þjónustumiðstöð. Fulltrúar frá Kópavogsvæ og Sjómannadagsráði, eiganda Hrafnistuheimilanna, undirrituðu í dag rammasamning um rekstur á svæðinu.

Gunnsteinn Sigurðsson, bæjarstjóri í Kópavogi, og Ómar Stefánsson, formaður bæjarráðs, undirrituðu í gær fyrir hönd Kópavogsbæjar vegna Sundlaugar Kópavogs og Sundlaugarinnar í Versölum samning við Sporthúsið um kaup hennar á 800 árskortum í sund á árinu 2010. Þröstur Jón Sigurðsson skrifaði undir samninginn fyrir hönd Sporthallarinnar ehf. sem rekur Sporthúsið við Dalsmára 9–11.

Rústaflokkur Hjálparsveitar skáta Kópavogi er lagður af stað á hamfrarasvæðin á Haítí sem hluti af Íslensku alþjóðabjörgunarsveitinni. Jarðskjálfti, sem mældist 7,3 stig á Richters kvarða, reið yfir eyjuna klukkan 21:53 að íslenskum tíma í gærkvöld og olli miklu tjóni.

Atvinnu- og upplýsinganefnd Kópavogsbæjar efnir til ráðstefnu um aðgerðir á vegum Kópavogsbæjar gegn langtímaatvinnuleysi. Ráðstefnan verður haldin laugardaginn 16. janúar næstkomandi í fundarsal bæjarstjórnar Kópavogs, Fannborg 2, kl. 13.00 – 17.00.

Vegna gríðarlegrar eftirspurnar hefur Björn Thoroddsen ásamt mörgum af helstu gítarsnillingum landsins ákveðið að endurtaka tónleikana í Salnum frá því í byrjun nóvember síðastliðnum þar sem færri komust að en vildu. Tvennir tónleikar eru í boði, 22. og 23. janúar kl. 21.

Dagatal með sorphirðudögum í Kópavogi hefur verið birt á heimasíðu bæjarins. Litapunktar á dagatali sem fylgir korti af bænum sýna á hvaða dögum tæmt verður. Enn fremur eru endurvinnslustöðvar Sorpu og grenndargámar merktir inn á kortið.

Athugasemdir eða ábendingar skulu berast Áhaldahúsi Kópavogs í síma 5701660.

Sorphirðudagatal 2010

Þátttöku Kópavogs er lokið í Útsvari, spurningakeppni sjónvarpsins milli sveitarfélaga, en lið Fljótsdalshéraðs vann sigur í hörkuviðureign með 5 stiga mun í gærkvöld.

Að vanda verður HK með sína árlegu þrettándagleði í Fagralundi miðvikudaginn 6. janúar.

Alfreð Finnbogason, knattspyrnumaður úr Breiðabliki, og Erna Björk Sigurðardóttir, knattspyrnukona úr Breiðabliki, voru kjörin íþróttakarl og íþróttakona Kópavogs fyrir árið 2009. Gunnsteinn Sigurðsson bæjarstjóri og Ómar Stefánsson, formaður bæjarráðs, afhentu viðurkenningarnar.

Fjölmennt var og góðmennt að vanda á áramótabrennum í Kópavogi. Kestir voru hlaðnir við Smárahvammsvöll og Heimsenda. Fóru hátíðahöld hið besta fram og án vandræða.

Bæjarstjórn Kópavogs og starfsfólk bæjarins árnar bæjarbúum og landsmönnum öllum gleðilegs og farsæls nýs árs.

Sorphirðudagatal Kópavogs fyrir árið 2010 er væntanlegt innan skamms og verður birt hér á heimasíðunni. Beðist er velvirðingar á töfunum.

Eins og undanfarin ár munu starfsmenn Áhaldahúss Kópavogs aðstoða Kópavogsbúa við að fjarlægja jólatré sín.

Íþrótta- og tómstundaráð Kópavogs efnir til íþróttahátíðar í Salnum, tónlistarhúsi Kópavogs, á morgun, þriðjudaginn 5. janúar kl. 18:00. Á hátíðinni verður lýst kjöri á íþróttakonu og íþróttakarli Kópavogs 2009. Flokkur ársins verður útnefndur og afhentir afreksstyrkir auk þess sem íþróttafólki verða veittar viðurkenningar fyrir unnin afrek.

Íþróttahátíðin er opin almenningi.