Fréttasafn

Framsóknarflokkurinn fær einn bæjarfulltrúa, Sjálfstæðisflokkurinn fjóra, Samfylkingin þrjá, Vinstri græn einn, Næst besti flokkurinn einn og Listi Kópavogsbúa einn, samkvæmt lokatölum úr Kópavogi.

Alls 14.704 greiddu atkvæði. Auðir seðlar voru 915 og ógildir 55. Kjörsókn var 68,8%.

Samkvæmt fyrstu tölum í Kópavogi er meirihlutinn í bæjarstjórn fallinn. Þegar 12.804 atkvæði hafa verið talin er Framsóknarflokkurinn með 841 atkvæði eða 7% atkvæða. Sjálfstæðisflokkurinn er með 3.617 atkvæði eða 30,2% atkvæða.

Gunnsteinn Sigurðsson bæjarstjóri hefur undirritað og samþykkt, fyrir hönd bæjastjórnar Kópavogs, Evrópusáttmála um jafna stöðu karla og kvenna. Bærinn skuldbindur sig þar með formlega til þess að virða grundvallarregluna um jafnrétti karla og kvenna. Kópavogur er sjöunda bæjarfélagið hér á landi til að staðfesta sáttmálann.

Sumaráætlun Strætó tók gildi um helgina en líkt og undanfarin ár breytist tíðni strætóferða á níu strætóleiðum í samræmi við minni eftirspurn á sumrin.Vagnar á leiðum 1, 2, 3, 4, 6, 11, 12, 14 og 15 munu aka á 30 mínútna tíðni í sumar, í stað 15 mínútna. Sú breyting verður jafnframt á leið 18 að ekið verður upp og niður Grensásveg milli Bústaðavegar og Miklubrautar í stað þess að aka allan Bústaðaveginn.

Samningur um félagsaðstöðu Siglingafélagsins Ýmis að Naustavör 20 var undirritaður í vikunni. Gunnsteinn Sigurðsson, bæjarstjóri Kópavogs, og Birgir Ari Hilmarsson, formaður Ýmis, rituðu undir samninginn. Félagar í Ými eru rúmlega 200 og segir Birgir að önnur siglingafélög horfi hýru auga til aðstöðunnar í Kópavogi.

Tveir skólar í Kópavogi fengu í maímánuði grænfánann, alþjóðlega viðurkenningu fyrir starf sitt að umhverfismennt og menntun til sjálfbærrar þróunar. Leikskólinn Arnarsmári fékk grænfánann afhentan í fyrsta sinn 18. maí og Snælandsskóli fékk viðurkenninguna afhenta 21. maí og það í fjórða sinn.

Kópavogsbær hefur gert samning við lánshæfismatsfyrirtækið Reitun ehf. um greiningu og mat á lánshæfi sveitarfélagsins gagnvart fjárfestum á skuldabréfamarkaði. Gunnsteinn Sigurðsson, bæjarstjóri Kópavogs, og Ólafur Ásgeirsson, framkvæmdastjóri Reitunar, skrifuðu undir samninginn í vikunni.

Bæjarfulltrúar Kópavogs plöntuðu 55 reynitrjám í Guðmundarlundi í gær í tilefni af 55 ára afmæli Kópavogsbæjar. Bragi Michaelsson, formaður Skógræktarfélags Kópavogs, stjórnaði verkinu. Hann segir að skógræktarfélagið hafi í lok dags boðið öllum vinnufúsum höndum grillaðar pylsur og gos.

Gerða Björg Hafsteinsdóttir og Þorsteinn Ingimarsson hafa verið ráðin í störf atvinnufulltrúa hjá Kópavogsbæ. Þau eru ráðin samkvæmt samningi Kópavogsbæjar, Vinnumálastofnunar og félagsmálaráðuneytis.

Kópavogsdagar, árleg menningarhátíð Kópavogs, tókust vel og sýndu bæjarbúar þeim fjölbreyttu viðburðum sem þar voru í boði mikinn áhuga. Listamenn buðu gestum og gangandi að heimsækja vinnustofur sínar, tónleikar voru haldnir og sýningar af ýmsu tagi voru opnaðar.

Sýning Magnúsar Árnasonar listamanns, Af lifun, var opnuð í Náttúrufræðistofu Kópavogs um helgina. Sýningin er hluti af menningardagskrá Kópavogsdaga. Magnús sagði í samtali við Morgunblaðið á föstudag að sýningin væri hluti af náttúrufræðisafninu. Fólk vissi því ekki hvort það væri að horfa á listaverk eða safngrip.

Leikskólinn Kópahvoll fagnaði 40 ára afmæli sínu 11. maí. Af því tilefni var foreldrum, systkinum, ömmum og öfum boðið til veislu í skólanum. Boðið var upp á veitingar, söng og listsýningu og skrautlegur trúður kom og sýndi listir sínar.

Fjölmenni var í Smáralind í Kópavoginum dag og hlýddi á ellefu kóra flytja Fúsalög, lög eftir Sigfús Halldórsson tónskáld. Tónleikarnir voru hluti af menningarhátíð Kópavogs sem stendur nú yfir.

Ellefu kórar munu í dag, fimmtudag, sameina raddir sínar og syngja Fúsalög, lög eftir hinn ástsæla Sigfús Halldórsson tónskáld í Vetrargarðinum í Smáralind. Tónleikarnir standa yfir frá kl. 13.00 til 15.00 og eru allir hjartanlega velkomnir. Tónleikarnir eru hluti af árlegri menningarhátíð Kópavogsbæjar, Kópavogsdaga, sem nú stendur yfir.

Knattspyrnudeild Breiðabliks hlaut í dag jafnréttisviðurkenningu Kópavogsbæjar. Í umsögn jafnréttisnefndar bæjarins segir að Breiðablik hafi frá upphafi verið í fararbroddi í knattspyrnu kvenna og að það sé eina félagið sem hafi verið með á Íslandsmóti kvenna í knattspyrnu óslitið frá upphafi.

Viðurkenningin var afhent við hátíðlega athöfn í Salnum í Kópavogi í dag.

Ragnar Axelsson ljósmyndari var í kvöld útnefndur heiðurslistamaður Kópavogsbæjar fyrir árið 2010. Í umsögn lista-og menningarráðs Kópavogs segir meðal annars að Ragnar, eða Raxi eins og hann er kallaður, hafi fyrir löngu fest sig í sessi sem einn fremsti fréttaljósmyndari Íslands.

Sjö framboð bjóða fram í Kópavogi fyrir sveitarstjórnarkosningarnar 29. maí 2010. Frestur til að skila inn framboðslistum rann út 8. maí kl. 12.00. Yfirkjörstjórn Kópavogs hefur lýst því yfir að framboðin séu öll gild.

Kópavogsdagar, árleg menningarhátíð Kópavogsbæjar, hófust í dag með opnun sýningarinnar, Fúsi á ýmsa vegu, sem sett hefur verið upp í Tónlistarsafni Íslands á Kópavogsholti til heiðurs listamanninum Sigfúsi Halldórssyni. Kópavogsdagar eru í ár sérstaklega tileinkaðir Sigfúsi en hann hefði orðið 90 ára í haust. Sigfús bjó í Kópavogi í áratugi, hann er fyrsti heiðurslistamaður bæjarins og þriðji heiðursborgarinn.

Í sumar býður Íþrótta- og tómstundaráð Kópavogs úrval námskeiða fyrir börnin í bænum. Allir eiga því að geta fundið eitthvað við sitt hæfi. Hægt er að nálgast nánari upplýsingar á sérstakri vefsíðu sem nú hefur verið tekin í gagnið og má finna slóðina hér.

Nú stendur yfir átakið „Hjólað í vinnuna“ á vegum Íþrótta- og Ólympíusambands Íslands en meginmarkmiðið er að vekja athygli á hjólreiðum sem heilsusamlegum, umhverfisvænum og hagkvæmum samgöngumáta. Íþrótta- og tómstundaráð Kópavogsbæjar fagnar átakinu og hvetur bæjarbúa til þátttöku.

Lindaskóli sigraði Skólahreysti í ár og af því tilefni færðu bæjarstjóri Kópavogs, Gunnsteinn Sigurðsson, og Árni Þór Hilmarsson, framkvæmdastjóri fræðslusviðs Kópavogsbæjar, sigurliðinu viðurkenningarskjal frá bænum og tíu þúsund króna inneign í íþróttavöruversluninni Intersport í Kópavogi.

Á vef Námsmatsstofnunar er komin skýrsla um árangur íslenskra grunnskóla í samræmdum könnunarprófum 4., 7. og 10. bekkja árið 2009. Enn á ný er árangur grunnskólanna í Kópavogi yfir meðallagi landsmeðaltals. Tveir grunnskólar, Snælandsskóli og Lindaskóli, náðu prófeinkunnum yfir landsmeðaltali í öllum þeim fögum sem prófað var í og Kópavogsskóli náði prófeinkunnum yfir landsmeðaltali í 6 af 7 prófgreinum.