Fréttasafn

Bæjarráð Kópavogs samþykkti í gær að veita Skottunum, nýjum regnhlífasamtökum félaga og samtaka innan kvennahreyfingarinnar, hundrað þúsund króna styrk vegna fyrirhugaðrar dagskrár í tilefni af kvennafrídeginum 24. október 2010. Þá verða liðin 35 ár frá fyrsta kvennafrídeginum.

Árleg sumarhátíð Vinnuskóla Kópavogs fór fram í vikunni og tókst með eindæmum vel. Um 915 ungmenni á aldrinum 14 til 16 ára hafa starfað við hin ýmsu störf hjá vinnuskólanum í sumar og lýkur þeirri vinnu í næstu viku.

Til að auðvelda Kópavogsbúum að koma ábendingum sínum eða tillögum á framfæri við bæinn hefur verið sett upp nýtt ábendingakerfi á vefsíðu bæjarins. Sá sem sendir inn ábendingu ýtir á hnappinn á forsíðunni efst til hægri en á honum stendur: Ábendingar til Kópavogsbæjar.

Bæjarráð Kópavogs hefur samþykkt fyrir sitt leyti samning við breska útgáfu- og sýningarfyrirtækið Mercator Media um að Íslenska sjávarútvegssýningin verði haldin í Fífunni og Smáranum í Kópavogi dagana 22. til 24. september 2011.

Uppskeruhátíð Skapandi sumarstarfa fer fram á morgun og á miðvikudag. Annað kvöld flytja nokkrir ólíkir tónlistarhópar tónlistaratriði í Salnum og hefjast tónleikarnir kl. 20.00. Á miðvikudagskvöld verður opið hús í Molanum, frá kl. 20.00, þar sem verkefni sumarsins verða kynnt, svo sem fatahönnun, dans, ljósmyndun og jafningjafræðsla. Allir eru velkomnir og aðgangur er ókeypis.

Börn og bróðurdóttir Wilhelms Ernst Beckmann, tréskurðarlistamanns og fyrsta bæjarlistamanns Kópavogs, færðu í dag Bókasafni Kópavogs að gjöf listaverk, skartgripi, málverk og bækur sem áður voru í eigu listamannsins.

Alls 11.185 gestir heimsóttu Náttúrufræðistofu Kópavogs á árinu 2009 og er það enn eitt aðsóknarmetið í sögu safnsins. Til samanburðar var fjöldinn 10.207 árið á undan. Um þriðjungur gesta voru leikskóla- og grunnskólabörn sem komu í skipulagðar heimsóknir og nutu leiðsagnar starfsmanna Náttúrufræðistofu.

Bæjarráð samþykkti í síðustu viku að veita Hrefnuveiðimönnum ehf. leyfi til að reka veitingaskip, Hrafnreyði KÓ 100, í Kópavogshöfn. Forsvarsmenn Hrefnuveiðimanna hyggjast í næsta mánuði hefja þriggja til sex tíma skemmtisiglingar frá Kópavogshöfn um Faxaflóa. Um borð verða í boði veitingar, aðallega hrefnukjöt.

Bæjarráð samþykkti í gær tillögur skólanefndar um ráðningu tveggja nýrra aðstoðarskólastjóra í Kópavogi. Annars vegar var samþykkt að ráða Ólínu Þorleifsdóttur í starf aðstoðarskólastjóra Kópavogsskóla. Hins vegar var samþykkt að ráða Björgu Baldursdóttur í starf aðstoðarskólastjóra Smáraskóla.

Íslenski safnadagurinn verður sunnudaginn 11. júlí og af því tilefni verður leiðsögn um sumarsýningar Gerðarsafns, listasafns Kópavogs. Leiðsögnin hefst kl. 15.00 og er öllum opin.

Um fimmtíu börn á tólfta og þrettánda aldursári hafa í sumar sótt stuttmynda- og margmiðlunarnámskeið Íþrótta- og tómstundaráðs Kópavogsbæjar (ÍTK).

Listmálarinn Hafsteinn Austmann hefur fært Kópavogsbæ olíumálverk að gjöf sem þakklætisvott fyrir að halda yfirlitssýningu á verkum sínum í Gerðarsafni í vor. Guðrún Pálsdóttir, bæjarstjóri Kópavogs, veitti gjöfinni viðtöku í Gerðarsafni fyrir helgi.

Íslenski safnadagurinn verður haldinn sunnudaginn 11. júlí og af því tilefni fara fram umræður og fræðsla í Náttúrufræðistofu Kópavogs í tengslum við sýningu Magnúsar Árnasonar listamanns, Af lifun. Dagskráin hefst stundvíslega kl. 15.00 með fyrirlestri Dr. Hilmars J. Malmquist um kúluskít.

Ný stjórn Strætó bs. kom saman á fundi í dag og skipti með sér verkum. Formaður stjórnar verður Guðrún Ágústa Guðmundsdóttir, bæjarfulltrúi í Hafnarfirði. Aðrir í stjórn eru eftirtaldir: Kjartan Örn Sigurðsson frá Álftanesi, Stefán Snær Konráðsson frá Garðabæ, Hjálmar Hjálmarsson frá Kópavogi, Hafsteinn Pálsson frá Mosfellsbæ, Einar Örn Benediktsson frá Reykjavík og Sigrún Edda Jónsdóttir frá Seltjarnarnesbæ.

Alls fengu 495 fjölskyldur í Kópavogi fjárhagsaðstoð hjá Félagsþjónustunni á árinu 2009 samanborið við 396 fjölskyldur árið á undan. Jafngildir það 25% aukningu. Þetta kemur fram í ársskýrslu Félagsþjónustu Kópavogs fyrir árið 2009. Þar segir að eftirspurn eftir félagslegri ráðgjöf og fjárhagsaðstoð hafi aukist í kjölfar efnahagshrunsins á Íslandi í október 2008.

Tvær sumarsýningar verða í Gerðarsafni, listasafni Kópavogs, frá 3. júlí til 29. ágúst. Á neðri hæð safnsins verður sýningin Gerður og Gurdjieff en á efri hæðinni verður sýningin Lífshlaup Kjarvals og fleiri úrvalsverk í einkasafni Þorvaldar og Ingibjargar. Safnið er opið alla daga, nema mánudaga, frá kl. 11.00 til 17.00.