Fréttasafn

Yfir þrjú hundruð ljóð bárust í ljóðasamkeppnina Ljóðstafur Jóns úr Vör en samkeppnin er nú haldin í tólfta sinn. Frestur til að senda inn ljóð rann út 14. desember. Dómnefnd keppninna fer yfir ljóðin og verður handhafi ljóðstafsins kynntur til sögunnar á afmælisdegi Jóns úr Vör 21. janúar 2013. Á sama tíma verða úrslit kynnt í ljóðasamkeppni grunnskóla Kópavogs. Tilgangurinn er að vekja áhuga á íslenskri ljóðlist.

Íþróttaráði Kópavogs barst fjöldi tilnefninga frá bæjarbúum um íþróttakarl og íþróttakonu Kópavogs fyrir árið 2012 en frestur til að skila inn tilnefningum rann út 17. desember. Ráðið mun hafa tilnefningarnar til hliðsjónar við val sitt á íþróttafólki ársins. Að venju er upplýst um útnefninguna á íþróttahátíð í Salnum í byrjun janúar.

Það má með sanni segja að það sé að verða jólalegt í strætisvögnum höfuðborgarsvæðisins sem eru komnir í jólabúning. Eins og undanfarin ár eru vagnarnir skreyttir bæði að innan sem utan með jólateikningum frá leikskólabörnum á höfuðborgarsvæðinu. Dregið hefur verið úr hópi þeirra leikskóla sem sendu inn teikningar og mun einn leikskóli í hverju sveitarfélagi fá heimsókn í desember.

Ármann Kr. Ólafsson, bæjarstjóri í Kópavogi, tók fyrstu skóflustunguna að nýjum leikskóla í Austurkór í Kópavogi í dag. Leikskólabörn frá leikskólanum Baugi aðstoðuðu bæjarstjórann við verkið sem og Aðalsteinn Jónsson, formaður leikskólanefndar. Hinn nýi leikskóli verður um 870 fermetrar að stærð, sex deilda, með rými fyrir um það bil 124 leikskólabörn. Kostnaður nemur tæpum 307 milljónum króna.

Umtalsverðar breytingar hafa átt sér stað í lífríki og efna- og eðlisþáttum Þingvallavatns á undanförnum þremur til fjórum áratugum. Þetta er meðal þess sem fram kemur í nýlegri skýrslu Náttúrufræðistofu Kópavogs. „Þingvallavatn hefur hlýnað, styrkur nýtrats aukist í írennsli vatnsins, magn þörungasvifs í vatnsbolnum aukist og vaxtartímabil þeirra virðist hafa lengst, einkum um haustið,“ að því er segir í skýrslunni.

Kammerhópurinn Camerarctica heldur sína árlegu kertaljósatónleika í kirkjum nú rétt fyrir jólin. Þetta verður tuttugasta árið í röð sem Camerarctica leikur ljúfa tónlist eftir Mozart við kertaljós  og þykir mörgum ómissandi að koma úr miðri jólaösinni inn í kyrrðina og kertaljósin í rökkrinu.

Vinabæjarfundur fór fram í Færeyjum fyrir skemmstu er þær hittust Gunvá við Keldu, bæjarstjóri Klaksvíkur og Rannveig Ásgeirsdóttir, formaður bæjarráðs. Klaksvík og Kópavogur eru vinabæir og hafa átt góð og margvísleg samskipti undanfarin ár, m.a. í gegnum skólastarf bæjanna. Þær Gunvá og Rannveig skiptust á gjöfum og ræddu m.a. vinabæjarsamstarfið almennt.

Íþróttafélagið Glóð frá Kópavogi kom, sá og sigraði á íþróttahátiðinni Blumen á Kanarý, spænsku landsmóti, um helgina en í danshópnum eru 32 dansarar á aldrinum 49 til 80 ára. Sýningaratriði þeirra var valið besta atriðið í hópi dansara sem eru fimmtíu ára og eldri. Íþróttafélagið Glóð var stofnað árið 2004 og eru í því um 160 félagar sem flestir eru komnir á eftirlaun. Kópavogsbær styrkir félagið með því að leggja því til húsnæði undir æfingar.

Bæjarbúar geta nú í fyrsta sinn tilnefnt íþróttakarl og íþróttakonu Kópavogs fyrir árið 2012. Íþróttaráð hefur ár hvert útnefnt íþróttafólk ársins en mun nú hafa tilnefningar bæjarbúa til hliðsjónar við val sitt. Upplýst verður um útnefninguna á íþróttahátíð í Salnum í byrjun janúar.

Fimmtán ár eru nú frá því Gullsmári, félagsheimili aldraðra, Í Kópavogi var opnaður en í Kópavogi eru þrjú slík félagsheimili sem eru afar vel sótt. Bærinn fjármagnaði uppbygginguna sem nýtist félögum í Félagi eldri borgara í Kópavogi. Þessum tímamótum var fagnað í vikunni og færði Ármann Kr. Ólafsson bæjarstjóri heimilinu nýja kaffikönnu í afmælisgjöf.

Samanhópurinn hefur nú í desember ýtt úr vör hvatningarherferð þar sem mælst er til þess að fjölskyldan finni sér stundir til að verja tímanum saman. Á hverjum degi eru lagðar fram tillögur að samverustundum og í dag er til dæmis lagt til að ömmur og afar séu heimsótt. Kópavogsbær á fulltrúa í Samanhópnum

Mennta- og menningarmálaráðherra hefur friðað Hressingarhælið í Kópavogi en nýlega var gamli Kópavogsbærinn einnig friðaður. Þar með hafa tvö hús verið friðuð í bænum en þau eru bæði á Kópavogstúni. Bæjarstjórn ákvað nýverið að hefja endurbætur á þessum tveimur húsum en þau hafa verið í mikilli niðurníðslu undanfarin ár ekki síst Hressingarhælið.

Hæfingarstöðin Fannborg 6 og hæfingarstöðin Dalvegi 18 halda jólamarkaði núna í nóvember. Markaðurinn á Dalvegi verður haldinn á morgun, miðvikudag, frá kl. 10:00 til 18:00 en markaðurinn í Fannborg verður haldinn 30. nóvember frá klukkan 14:00 til 18:00. Þar verða til sölu listmunir sem starfsmenn hæfingarstöðvanna hafa búið til á árinu. Allir eru velkomnir.

Kópavogur, Garðabær og nýtt hestamannafélag í bæjarfélögunum sem verður til við sameiningu Gusts og Andvara, hafa gert með sér samkomulag um sameiginlega uppbyggingu fyrir hestamenn á Kjóavöllum  þar sem reisa á reiðskemmu, byggja keppnisleikvang og leggja reiðleiðir frá svæðinu. Samningurinn er þríhliða og byggir á framlagi allra samningsaðila til verkefnisins.

Fasteignagjöld af íbúðar- og atvinnuhúsnæði, vatnsskattur og sorphirðugjöld lækka í Kópavogi í upphafi næsta árs, samkvæmt tillögu meirihluta bæjarstjórnar að fjárhagsáætlun fyrir árið 2013. Tillagan var lögð fram til fyrri umræðu á bæjarstjórnarfundi síðdegis í dag.

Níu grunnskólar eru í Kópavogi og þar af er eldaður matur frá grunni í sjö þeirra. Fulleldaður matur er sendur í tvo skóla; Kársnesskóla og Snælandsskóla. Fyrirtækið Skólamatur eldar matinn og eru gerðar ríkar kröfur til hollustu og meðferðar matvæla. Matnum er haldið heitum í viðurkenndum hitaskápum og vel fylgst með hitastiginu. Á bilinu einn og hálfur til þrír tímar líða frá því maturinn er tekinn úr ofni og þar til hann er borinn á borð fyrir nemendur skólanna.

Lista- og menningarráð Kópavogs efnir í tólfta sinn til árlegrar ljóðasamkeppni undir heitinu Ljóðstafur Jóns úr Vör. Öllum skáldum er velkomið að senda ljóð í keppnina en skilafrestur rennur út 14. desember. Veitt verða vegleg verðlaun og fær verðlaunaskáldið auk þess til varðveislu, í eitt ár, göngustaf áletraðan með nafni sínu.

Mennta- og menningarmálaráðherra, Katrín Jakobsdóttir, hefur samþykkt tillögu Húsafriðunarnefndar um að friða gamla Kópavogsbæinn á Kópavogstúni. Bæjarráð Kópavogs fagnar friðuninni. Friðunarbréfið var undirritað 12. október og er þetta fyrsta húsið sem er friðað í Kópavogi. Friðunin nær til ytra byrðis húsasamstæðunnar, en elsta hús hennar var byggt á árunum 1902 til 1904.

Um hundrað fulltrúar fyrirtækja í Kópavogi sóttu í vikunni kynningarfund um nýjan samstarfsvettvang fyrirtækja og bæjarins um atvinnu-og markaðsmál. Fram kom í máli bæjarstjóra, Ármanns Kr. Ólafssonar, að markmiðið væri að efla atvinnulífið í bænum. Atvinnu- og þróunarráð Kópavogsbæjar hefur að undanförnu unnið að ítarlegum tillögum um þetta verkefni og verður fundað um næstu skref eftir helgi.

Bæjarráð óskar íslensku kvenna- og stúlknalandsliðunum í hópfimleikum hjartanlega til hamingju með Evrópumeistaratitlana. Þetta var bókað á fundi bæjarráðs í morgun. Kvennalið Gerplu í fimleikum er nú að landa titlinum sem landslið Íslands í annað sinn en stúlknaliðið er að vinna hann í fyrsta sinn. Fimleikastúlkur frá Gerplu eru í báðum liðunum og í kvennalandsliðinu eru einungis Gerplustúlkur.

Nemandi úr Hótel- og matvælaskólanum í Menntaskólanum í Kópavogi og hótelstjórnunarnemi úr César Ritz náminu sýndu frábæran árangur í árlegri nemakeppni AEHT (Evrópusamtaka hótel-, matvæla- og ferðamálaskóla) sem haldin var í Makedóníu dagana 8.-13. október síðastliðinn og komu heim með bronsverðlaun í eftirréttagerð.

Nýr leikskóli í Austurkór í Kópavogi, með rými fyrir 130 börn, verður tekinn í notkun í ársbyrjun 2014. Verksamningur milli Kópavogsbæjar og verktakafyrirtækisins Eyktar var undirritaður í dag af þeim Ármanni Kr. Ólafssyni bæjarstjóra og Pétri Guðmundssyni, forstjóra Eyktar. Kostnaður nemur tæpum 307 milljónum króna.

Forvarnarvika er nú hafin í Kópavogi en markmið hennar er að upplýsa unglinga um netfíkn, kynlíf og sambönd. Það eru foreldrar og forráðamenn í Kópavogi ásamt félagsmiðstöðvum og frístunda- og forvarnardeild bæjarins sem standa að fræðslunni. Fluttir verða fyrirlestrar um þessi málefni næstu daga og fer sá fyrsti fram í félagsmiðstöðinni Pegasus í dag. Allir eru velkomnir.

Samstarfssamningur um tímabundna varðveislu Náttúrufræðistofu Kópavogs á safnkosti Náttúruminjasafnsins var nýlega undirritaður af Hilmari J. Malmquist, forstöðumanni Náttúrufræðistofu Kópavogs og Margréti Hallgrímsdóttur, setts forstjóra Náttúruminjasafns Ísland. Undirbúningur á flutningi safnkostsins stendur yfir en þar á meðal eru votsýni, þurrsýni, berg- og steindasýni og uppstoppaðir gripir.

Tónleikar til heiðurs Ingibjörgu Þorbergs, eins ástsælasta tónskálds Íslendinga, fara fram í Salnum, fimmtudaginn 25. október, en þá verður hún 85 ára. Tónleikarnir eru styrktir af lista- og menningarsjóði bæjarins. Þeir hefjast kl. 19:00 og eru allir velkomnir á meðan húsrúm leyfir.

Félagsmiðstöðin Ekkó vann spurningakeppni félagsmiðstöðva í Kópavogi, Getkó, sem fram fór föstudagskvöldið 12. október. Fönix varð í öðru sæti og Igló í því þriðja. Úrslitakvöldið var mjög vel sótt og fengu keppendur hraustlega hvatningu frá sínu stuðningsfólki.

Bæjaryfirvöld í Kópavogi hafa í hyggju að efla samstarf bæjarins og fyrirtækja í bænum með nýjum sameiginlegum samstarfsvettvangi um atvinnu- og markaðsmál. Höfuðmarkmiðið er að efla atvinnulífið í bænum. Fyrirtæki í bænum verða boðuð til upplýsingafundar þann 1. nóvember nk. þar sem verkefnið verður kynnt nánar.

Borgardæturnar, Andrea Gylfadóttir, Ellen Kristjánsdóttir og Berglind Björk Jónasdóttir flytja Kópavogsbúum og nærsveitamönnum sína frábæru jóladagskrá þann 16. desember kl. 20:00.

Félagsmiðstöðin Fönix kom, sá og sigraði í undanúrslitakeppni Getkó, spuningakeppni félagsmiðstöðva Kópavogs, sem fram fór í húsakynnum Fönix í vikunni. Keppt verður til úrslita föstudaginn 12. október. Þar munu Ekkó og Fönix keppa um fyrsta sætið og Igló og Jemen um þriðja sætið.

Mánaðarskýrslur Kópavogsbæjar hafa nú verið gerðar aðgengilegri með því að setja þær inn í flettiforrit en ef smellt er á þær er hægt að fletta þeim á netinu eins og bók. Skýrslurnar eru gefnar út mánaðarlega en í þeim má finna ýmsan fróðleik um starfsemi bæjarins.

Þriðju tónleikarnir í tónleikaröðinni Líttu inn í hádeginu fara fram í Salnum fimmtudaginn 11. október kl. 12:15.  Að þessu sinni flytur þýski píanóleikarinn Thomas Hell rómantískt 19. aldar píanóverk op. 118 eftir Johannes Brahms og nokkrar etýður eftir György Ligeti.

Kvennakór Kópavogs efnir til tónleika til styrktar Mæðrastyrksnefnd Kópavogs sunnudaginn 14. október. Tónleikarnir fara fram í Digraneskirkju og hefjast kl. 16:00. Aðgangseyrir er 2.500 krónur.

Bæjarstjórn hefur ákveðið að hefja undirbúning þess að gerðar verði nauðsynlegar lagfæringar á Hressingarhælinu og Kópavogsbænum gamla á Kópavogstúni. Jafnframt hefur bæjarstjórn lýst yfir vilja til þess að í umræddum byggingum og á túninu verði fjölbreytt starfsemi með áherslu á menningu, listir, sögu, útivist og afþreyingu.

Ráðstefna um starf leikskóla fer fram í Salnum í Kópavogi 2. nóvember og er yfirskriftin: Það er leikur að læra. Leikskóladeild Kópavogsbæjar hefur veg og vanda að ráðstefnunni. Hún er öllum opin. Þátttökugjald er 4.000 kr

Kópavogur og Snæfellsnesbær takast á í Útsvari í Sjónvarpinu í kvöld. Þeir sem keppa fyrir hönd bæjarins eru Anna Lilja Þórisdóttir, Björn Stefánsson og Árni Tryggvason. Þátturinn hefst kl. 20:20.

Alþjóðlegi hjartadagurinn verður haldinn hátíðlegur í Kópavogi 30. september en bærinn býður þátttakendum í hjartahlaupinu ókeypis í sund. Þannig vill bærinn styðja við þennan góða málstað. Hjartavernd hefur hins vegar veg og vanda af hjartadeginum með ýmsum uppákomum.

Tónlistarsafn Íslands hefur flutt sýningu sína um Sveinbjörn Sveinbjörnsson, tónskáld og höfund íslenska þjóðsöngsins, til menningarhússins Hofs á Akureyri. Á sýningunni er hægt að sjá ýmsa persónulega muni úr eigu Sveinbjörns og fjölskyldu hans, fjölda ljósmynda, skjala og bréfa sem varpa ljósi á líf hans.

Félagsmiðstöðin Ekkó var sigursælust á íþróttamóti félagsmiðstöðva unglinga í Kópavogi sem fram fór í íþróttahúsinu Smáranum fyrir helgi. Hátt í 500 hundruð unglingar tóku þátt með einum eða öðrum hætti, ýmist með því að keppa eða styðja keppnisliðin. Keppt var í fjórum greinum, skák, kubb, kattspyrnu kvenna og karla.

Síðsumarsganga um Salahverfi fer fram laugardaginn 22. september en hún er skipulögð af umhverfis- og samgöngunefnd Kópavogsbæjar. Lagt verður af stað frá Lindakirkju kl. 11:00. Gangan mun taka um það bil klukkutíma. Allir velkomnir.

Ármann Kr. Ólafsson bæjarstjóri tók vel á móti Ragnari Má Garðarssyni kylfingi úr Golfklúbbi Kópavogs og Garðabæjar um helgina og færði honum blómvönd með góðum kveðjum frá bæjarstjórn. Ragnar gerði sér lítið fyrir og sigraði á Duke of York mótinu á Royal Troon vellinum í Skotlandi. Mótið er virt unglingamót en einungis landsmeistarar unglinga hafa rétt til að taka þátt.

Handavinnudagur var haldinn í félagmiðstöðinni Boðanum í síðustu viku.  Þar komu saman handavinnuhópar úr öllum félagsmiðstöðvunum. Skeggrætt var um saumaspor og prjónauppskriftir og skemmtu konur og einstakir karlar sér hið besta.

Ármann Kr. Ólafsson bæjarstjóri ýtti samgönguvikunni úr vör um helgina en markmiðið með henni er að hvetja fólk til umhgsunar um eigin ferðavenjur og virkja það til að nota vistvænni samgöngumáta s.s. almenningssamgöngur, hjól eða tvo jafnfljóta. Ýmsir viðburðir verða tileinkaðir vikunni í Kópavogi og á höfuðborgarsvæðinu

Foreldrar og börn í Lindahverfi létu hendur standa fram úr ermum í síðustu viku og hjálpuðust að við að byggja upp útikennslusvæði fyrir skólana í hverfinu. Svæðið er fyrir ofan Lindaskóla og leikskólann Núp, við enda Kópalindar. Slík útikennslusvæði hafa verið byggð upp víða í Kópavogi og hafa notið mikillar vinsældar.

Fimm hverfaráð hafa nú verið stofnuð í Kópavogi og verður starfi þeirra ýtt úr vör á  næstu dögum og vikum. Fyrsti fundur tveggja hverfaráða fór fram í bæjarstjórnarsal Kópavogs í dag þar sem Ármann Kr. Ólafsson bæjarstjóri fór yfir hlutverk þeirra. Markmiðið er að auka íbúalýðræði í bænum. 

Kópavogsbúar eru hvattir til að taka þátt í evrópsku samgönguvikunni sem hefst á sunnudag með hjólreiðaför sem endar í Árbæjarsafni. Hjólalest leggur af stað frá Hafnarfirði og Garðabæ og stoppar við Þinghólinn í Kópavogi kl. 12:25. Þar geta Kópavogsbúar bæst í hópinn. Ármann Kr. Ólafsson bæjarstjóri verður einnig með í för.