Íþróttahöllin Kórinn við Vallakór formlega opnuð
Kórinn, nýja íþrótta- og tónleikahöllin við Vallakór í Vatnsendahverfi, var tekin í notkun við hátíðlega athöfn í dag. Gunnar I. Birgisson bæjarstjóri og Ómar Stefánsson, formaður bæjarráðs, klipptu á borðann ásamt Þorgerði Katrínu Gunnarsdóttur menntamálaráðherra.Rúmu ári eftir að Eyrún Harpa Einarsdóttir, fyrirliði 5. flokks kvenna hjá Breiðabliki, tók fyrstu skóflustunguna að fullkominni knattspyrnuhöll og fjölnotasal við Vallakór í Vatnsendalandi er húsið risið og tilbúið til notkunar.
Um það bil 300 manns tóku þátt í hátíðlegri opnun á Kórnum í dag en það nafn varð hlutskarpast í samkeppni um heiti á höllina. Nafnið vísar til hverfisins en minnir einnig á að húsið er musteri líkama og sálar og margradda hljóðfæri sem hýsir margs konar starfsemi, íþróttaiðkun, tónlistarflutning, ráðstefnuhald og sýningar.
Með þessu húsi er hafin uppbygging heilsu-, íþrótta- og fræðaseturs í Kópavogi í samræmi við samning Kópavogsbæjar og Knattspyrnu Akademíu Íslands. Um er að ræða fyrsta áfangann að miklum framkvæmdum í þágu fræðslu og íþrótta á svæðinu. Seinni áfangar fela í sér íþróttasal með búningsklefum, skólahús, sundlaug og knattspyrnuvelli utanhúss.
- Þjónar þörfum íbúa í efri byggðum Kópavogs og nærliggjandi byggðum á sviði íþróttamála
- Þjónar starfsemi Knattspyrnu Akademíu Íslands og helstu samstarfsaðilum hennar
- Verði miðstöð starfstengdrar sérfræði- og rannsóknarstarfsemi á sviði íþrótta og lýðheilsu í samvinnu við framhaldsskóla á svæðinu
Stefnt er að því að setrið verði aflstöð þekkingar á sviði:
- Íþrótta-, afreks- og líkamsþjálfunar
- Lýðheilsu
- Heilbrigðisfræða
- Forvarna og fræðslu
- Almenningsíþrótta
- Rannsókna
- Stærð hússins 10.998 m2 ásamt 3.459 m2 tengibyggingu
- Rúmmál 192.951 m3
- Húsið er fulleinangrað og hitað með fullkominni lofthitun/loftkælingu
- Knattspyrnuvöllurinn er 105 x 68 m að stærð
- Field Turf gervigras frá Metrathon, 60 mm einsþráða (monofibre), fyllt með sandi og grænu gúmmíi efst
- Undir gervigrasinu eru lagnir til hitunar og kælingar
- Húsið uppfyllir alla keppnisstaðla Alþjóða knattspyrnusambandsins FIFA
- Lofthæð 20 m undir bita í mæni og meira en 10 m yfir hliðarlínur
- Frjálsíþróttaaðstaðan er þrjár 100 m brautir beggja vegna vallarins og fjórar 70 m brautir til endanna, lögð 15 mm þykku rauðu gerviefni frá Field Turf
- 120 lampar (natríum og kvikasilfur) lýsa höllina upp
- Lýsing uppfyllir alþjóðlegar kröfur FIFA og sjónvarpsstöðva vegna útsendinga
- Í húsinu er sambyggt hljóð- og brunakerfi
- Í lofti eru gataðar stálplötur til hljóðeinangrunar og loftræsting um gafla og þak
Dagskráin:
• Kynning - Gunnar I. Birgisson bæjarstjóri
• Ávarp fulltrúa byggingarverktaka hallarinnar – ÍSTAK
• Ávarp Ómars Stefánssonar, formanns bæjarráðs
• Ávarp Knattspyrnu Akademíu Íslands – Logi Ólafsson
• Ávarp KSÍ – Geir Þorsteinsson
• Greint frá samkeppni um nafn á höllina
• Húsið blessað – séra Gunnar Sigurjónsson
• Menntamálaráðherra – Þorgerður Katrín Gunnarsdóttir
• Knattspyrnuleikir 4. fl. kvenna og 5. fl. karla HK–Breiðablik
Að lokinni dagskrá var gestum boðið upp á hressingu.
Ístak varð hlutskarpast í alútboði um byggingu knatthússins og hefur unnið frábært verk á skömmum tíma. VA arkitektar sáu um hönnun, Conis um burðarþol og lagnir, Raftákn um raflagnir, Verkfræðistofa Snorra Ingimarssonar um brunahönnun, Línuhönnun um hljóðvist og VGK – Hönnun um loftræstingu.
Kynningarbæklingur um Kórinn
439 Kb (Ljósmyndir: Krissý)
