Fréttasafn
Fyrsta skóflustungan að nýju íþróttahúsi HK
Framkvæmdir eru hafnar við byggingu íþróttahúss og félagsaðstöðu HK í Fagralundi í Fossvogsdal. Gunnar I. Birgisson, bæjarstjóri Kópavogs, tók fyrstu skóflustunguna að íþróttamannvirkinu og pantaði við það tækifæri Íslandsmeistaratitla í samræmi við aðstöðuna.Byggingarsvæðið hefur verið vandlega girt af til að tryggja öryggi barna og ungmenna en stefnt er að því að ljúka framkvæmdum síðsumars 2009. Eykt ehf. skilaði hagstæðasta tilboðinu í byggingu íþróttahússins og stækkun og endurbætur á félagsaðstöðu HK og fól bæjarráð fyrirtækinu verkið. Tilboð Eyktar ehf. hljóðaði upp á kr. 488.253.993.
Íþróttahúsið nýtist handknattleiks- og blakfólki HK og verður með löglegum handboltavelli sem ætlaður er yngri flokkunum. Húsið nýtist auk þess Snælandsskóla fyrir íþróttakennslu og kemur í stað lítils íþróttasalar sem er sambyggður skólanum.
Félagsaðstaða HK stækkar verulega en byggt verður við hús sem tekið var í notkun í Fagralundi fyrir þremur árum. Þar verður meðal annars rúmlega 250 fermetra veitingasalur á efri hæð og þaðan verður hægt að fylgjast með æfingum og keppni í íþróttahúsinu. Búningsklefum fjölgar úr sex í níu og aðkoma verður bætt með torgi og fjölgun bílastæða.