Gróður og garðar
Skógræktarsvæði
Gildi skógræktar og landgræðslu er ótvírætt. Auk þess sem skógarnir eru og verða fjölsótt og skemmtileg útivistarsvæði, er með skógrækt og landgræðslu verið að bæta landið, binda jarðveg og bæta andrúmsloftið. Um 650 ha landssvæðis í Kópavogi er skilgreint fyrir skógrækt og skiptast svæðin milli heimalandsins og upplandsins.
Eiginleg skógrækt í landi Kópavogs hófst árið 1990 með Landgræðsluskógaverkefni, sem er samstarfsverkefni skógræktarfélaganna, Skógræktarfélags Íslands, Landgræðslu ríkisins og Landbúnaðarráðuneytis. Markmið verkefnisins er að auka landgæði með því að rækta útivistarskóga á lítt eða ógrónu landi. Kópavogsbær hefur styrkt verkefnið og hefur framkvæmd þess að mestu verið í höndum garðyrkjustjóra og vinnuskóla Kópavogs, í náinni samvinnu við Skógræktarfélag Kópavogs og umhverfisráðs Kópavogs. m
Uppgræðsluverkefni
Töluverð uppgræðsla hefur verið í landi Kópavogs á undanförnum áratugum. Landgræðsla ríkisins hefur verið með uppgræðslu í beitarhólfinu á Miðdalsheiði norðan Suðurlandsvegarins síðastliðin 5 ár en það var samstarfsverkefni Kópavogs, Reykjavíkur, Mosfellsbæjar, Seltjarnarness og Orkuveitu Reykjavíkur. Félagasamtökin Gróður fyrir fólk í landnámi Íslands (GFF) í samvinnu við Vinnuskóla Kópavogs hafa unnið að uppgræðslu á ýmsum stöðum s.s. við Bolaöldu og Sandskeið og í Bláfjöllum og Lækjarbotnum. Störf þeirra hafa aðallega falist í að stinga niður rofabörð, sá í jarðveginn og dreifa hrossataði. Hrossatað úr hesthúsum Gusts hefur verið notað í þessum tilgangi á undanförnum árum.
Græni trefillinn og Græni stígurinn
Græni trefillinn er samheiti yfir skógræktar,- uppgræðslu- og útivistarsvæði ofan byggðar höfuðborgarsvæðisins. Með markvissi skógrækt í Græna treflinum er unnið að því að bæta aðstöðu íbúa til útivistar, bæta skjól og jafnframt að græða upp land þar sem þess er þörf. Stefnt er að því að Græni trefillinn verði heildstætt fallegt útivistarsvæði sem nær allt frá Kaldárseli í suðri og til Mógilsá í norðri og að skógarmörkum á heiðum austur af höfuðborgarsvæðinu. Mörk Græna trefilsins liggja um Heiðmörk í Reykjavík á mörkum sveitarfélaganna og þaðan að Guðmundarlundi í Vatnsendahlíð og svo til Garðabæjar.
Græni stígurinn verður um 50 km langur malbikaður göngu- og hjólreiðastígur í gegnum græna trefilinn og um 2 km hans verða innan lögsögu Kópavogs. Með uppbygginu hans er leitast við að auka enn frekar aðgengi fólks að upplandinu og bæta útivistarmöguleika íbúa.