Svæði á náttúruminjaskrá
Í náttúruminjaskrá eru svæði sem flokkast sem “aðrar náttúruminjar” og skal forðast röskun þeirra eins og kostur er. Eftirfarandi tvö svæði sem staðsett eru að hluta í Kópavogi heyra undir þessa vernd. Lýsing á svæðunum er úr náttúruminjaskrá:
Bessastaðanes, Gálgahraun og fjörur frá Bala að Kársnesi
Verndarflokkur: Bæjarvernd og náttúruminjaskrá
Verndarforsendur: Auðugt fuglalíf og gróskumikil strandsvæði
Svæðið er í lögsögu Hafnarfjarðar, Garðabæjar, Kópavogs og sveitarfélagsins Álftanes. Svæðið sem heyrir undir náttúruminjaskrá er allt frá fjörunni við Bala í Hafnarfirði að Kársnesi í Kópavogi, Bessastaðanes allt og Lambhúsatjörn, Bessastaðatjörn, Skógtjörn og Kasthúsatjörn. Gálgahraun sem afmarkast af Álftanesvegi að sunnan, en hraunjöðrum að austan og vestan. Árið 2009 var Gálgahraun aftur á móti friðlýst svo það er ekki lengur á náttúruminjaskrá. Á svæðinu eru fjölbreyttar tjarnir, fjörur og grunnsævi með auðugu lífríki. Gálgahraun er tilkomumikið nútímahraun með lífauðugum sjávarfitjum. Hraunið er nyrsta tunga af rúmlega 10 km löngu hrauni sem komið er úr Búrfelli og svæðið allt er kjörið útivistarsvæði. Stærð svæðisins er alls um 184.000 m2.
Kópavogsleira nýtur einnig bæjarverndar. Leiran er um 21 ha að stærð og hún er þriðja til fjórða stærsta leiran á höfuðborgarsvæðinu. Kópavogsleira og tengd strandsvæði eru vernduð vegna grósku í fuglalífi. Á Kópavogsleiru og Álftanesi eru mikilvægir varp- og dvalarstaðir fyrir nær 30 staðbundnar fuglategundir. Svæðið er einnig mikilvægur viðkomustaður fyrir nær tíu farfuglategundir sem eiga leið um Ísland á vorin og haustin á ferð sinni milli Evrópu annars vegar og Kanada og Grænlands hins vegar. Vaðfuglar eru fjölbreyttasti hópur fugla á Kópavogsleiru. Mest áberandi eru rauðbrystingur, tildra, lóuþræll, tjaldur, heiðlóa og stelkur. Minna er af sanderlu, sandlóu, sendlingi og jaðröku. Allir þessir vaðfuglar trítla um leiruna þegar lágsjávað er og tína upp í sig fjöru- og leirudýr. Auk vaðfugla er töluvert um endur. Á veturna má oft sjá urtönd, rauðhöfðaönd, skúfönd, toppönd og hávellu. Á vorin og haustin sést til grágæsa og margæsa. Margæs er farfugl sem verpir á sumrin í Kanada og á Grænlandi en hefur vetrardvöl á Írlandi. Kópavogsleira ásamt Álftanesi er eini viðkomustaður margæsar á Suðvesturlandi. Svæðið er því alþjóðlega mikilvægt fuglabúsvæði.
Elliðaárdalur
Elliðaárdalur er í lögsögu Reykjavíkur og Kópavogs. Svæðið sem er á náttúruminjaskrá er vatnasvið Elliðaár í Elliðaárdal, frá upptökum í Elliðavatni allt til ósa. Svæðið státar af fjölbreyttu náttúrufari og er kjörið útivistarsvæði í þéttbýli. Alls er svæðið um 62.000 m2 að stærð.