Okkar Kópavogur

Okkar Kópavogur er samráðsverkefni íbúa og bæjarins um forgangsröðun og úthlutun fjármagns til smærri nýframkvæmda- og viðhaldsverkefna í bænum.  

 
Okkar Kópavogur hefst að nýju 1. október 2019 með hugmyndasöfnun og lýkur með kosningu í byrjun árs 2020. 200 milljónum verður varið í framkvæmdir.

Þetta er í þriðja sinn sem ráðist er í verkefnið Okkar Kópavogur. Framkvæmdaáætlanir þeirra verkefna sem voru kosin áfram árin 2016 og 2018 má sjá í listanum hér til hægri. Nánari upplýsingar eru veittar í Þjónustuveri Kópavogsbæjar eða í gegnum netfangið okkarkopavogur(hjá)kopavogur.is.

Markmið verkefnisins er að hvetja íbúa til að taka þátt í málefnum sem varða nærumhverfi þeirra, fá þá til að leggja fram hugmyndir og forgangsraða og útdeila fjármagni í smærri framkvæmdir á vegum bæjarins með íbúakosningu.

Verkefnið í heild sinni er í þremur liðum; hugmynd, kosning og framkvæmd. Þátttaka í verkefninu er valkvæð og vinnsla þeirra upplýsinga sem safnast byggir á samþykki þátttakenda sem gefið er við innskráningu með rafrænum skilríkjum. Samtals fara allt að 100 hugmyndir áfram í kosningu, og þær hugmyndir sem verða kosnar fara í framkvæmd árin 2020 og 2021.

Gögnum sem safnast við vinnsluna verður eytt að lokinni úrvinnslu.

  • Hugmynd

    Í fyrsta hluta verkefnisins, hugmyndainnsetningu, gefst íbúum og öðrum gestum tækifæri til að leggja fram hugmyndir að verkefnum sem þeir vilja sjá framkvæmd í bænum. Innsetning hugmynda stendur yfir frá 1. til 21. október 2019. Hugmyndum er hægt að koma á framfæri með tvenns konar hætti. Annars vegar á íbúafundum og hins vegar í gegnum hugmyndakerfi verkefnisins.

    Allt að sjö hugmyndir frá hverjum íbúafundi fara í kosningu. Við hvetjum íbúa til að fjölmenna á íbúafundina og koma sínum hugmyndum á framfæri.

    Hugmyndir íbúa þurfa vera á bæjarlandi og innan þéttbýlis. Þær geta varðað leik- og afþreyingarsvæði íbúa, vistvænar samgöngur, bætta lýðheilsu eða umhverfið almennt. Hugmyndin verður að falla að stefnu bæjarins og getur ekki verið háð samráði eða samningaviðræðum við aðrar stofnanir eða sveitarfélag.

    Mikilvægt er að hugmyndin sé skýr og lýsandi, þannig að aðrir eigi auðvelt með átta sig á því sem um er að ræða. Koma þarf fram um hvað verkefnið snýst og hvar nákvæm staðsetning er. Greinargóð lýsing auðveldar mat og því hvort hún nái athygli annarra íbúa ef hún kemst í kosningu. Starfsmenn Kópavogsbæjar geta óskað eftir nánari skýringum um hverja hugmynd.

    Aðstoð og nánari upplýsingar eru veittar í Þjónustuveri Kópavogsbæjar í síma 441 0000 eða í tölvupósti á netfangið okkarkopavogur(hjá)kopavogur.is

    Þeir sem einhverra hluta vegna geta ekki notað hugmyndakerfið eða mætt á íbúafundi en vilja taka þátt í verkefninu geta sent hugmyndir sínar á netfangið okkarkopavogur(hjá)kopavogur.is

  • Íbúafundir

    Fimm íbúafundir verða haldnir og byrja þeir allir kl. 17:00 og lýkur 18:30

    Í Salaskóla fyrir íbúa í Linda- og Salaskólahverfunum fimmtudaginn 3. október.

    Í Snælandsskóla fyrir íbúa í Snælands- og Álfhólsskólahverfunum mánudaginn 7. október.

    Í Kópavogsskóla fyrir íbúa í Kópavogs- og Smáraskólahverfunum fimmtudaginn 10. október.

    Í Kársnesskóla við Vallargerði fyrir íbúa í Kársnesskólahverfinu þriðjudaginn 15. október.

    Í Vatnsendaskóla fyrir íbúa í Hörðuvalla- og Vatnsendaskólahverfunum fimmtudaginn 17. október

  • Skilyrði

    Hugmyndir íbúa þurfa vera á bæjarlandi og innan þéttbýlis. Þær geta varðað leik- og afþreyingarsvæði íbúa, vistvænar samgöngur, bætta lýðheilsu eða umhverfið almennt. Hugmyndin verður að falla að stefnu bæjarins og getur ekki verið háð samráði eða samningaviðræðum við aðrar stofnanir eða sveitarfélag.

    Verkefnin þurfa að uppfylla eftirfarandi skilyrði til að komast í kosningu:

    • Vera til fjárfestinga en ekki rekstrar.
    • Varða umhverfi á bæjarlandi.
    • Kostnaður einstakra verkefna sé ekki lægri en 1 milljón og ekki hærri en 25 milljónir kr.
    • Líftími fjárfestingar skal vera að lágmarki fimm ár.
    • Tillagan á að samræmast skipulagi eða stefnu Kópavogsbæjar.
    • Vera á fullu forræði Kópavogsbæjar og getur ekki verið háð samráði eða samningaviðræðum við aðrar stofnanir eða sveitarfélag.

    Mikilvægt er að hugmyndin sé  skýr og lýsandi, þannig að aðrir eigi auðvelt með átta sig á því sem um er að ræða. Koma þarf fram um hvað verkefnið snýst og hvar nákvæm staðsetning er. Greinargóð lýsing auðveldar mat og því hvort hún nái athygli annarra íbúa ef hún kemst í kosningu. Starfsmenn Kópavogsbæjar geta óskað eftir nánari skýringum um hverja hugmynd.

    Matshópur, skipaður fjölbreyttum hópi starfsmanna bæjarins, fer yfir innsendar hugmyndir út frá skilyrðum verkefnisins og stillir upp til kosninga fyrir hvert hverfi.

  • Kosning

    Annar hluti verkefnisins snýr að forgangsröðun og úthlutun fjármagns með kosningu, kosningarnar fara fram í byrjun árs 2020. Allt að 100 hugmyndir fara í kosningu en að hámarki 20 í hverju hverfi. 

    Allir íbúar, 16 ára á árinu og eldri, með skráð lögheimili í Kópavogi geta kosið verkefni áfram, aðeins er hægt að kjósa verkefni í einu hverfi. Hægt er að kjósa áfram verkefni fyrir þá upphæð sem hverju hverfi hefur verið úthlutað. Einnig er hægt að gefa einu verkefni tvöfalt vægi með því að merkja það með hjarta. 

    Kosning fer fram á kosningavef þar sem notandi auðkennir sig með öruggum hætti með innskráningarþjónustu island.is, með Íslykli eða rafrænum skilríkjum, og þar er atkvæði dulkóðað. Aldrei er hægt að tengja atkvæðið við einstakling. 

    Í verkefninu fara 200 milljónir til framkvæmda, verkefni sem íbúar kjósa áfram eftir hugmyndasöfnun. Kópavogi er skipt upp í fimm hverfi. Hvert hverfi fær 10 milljónir í grunnupphæð til framkvæmda og eftir standa 150 milljónir kr. sem skiptast á milli hverfanna í hlutfalli við íbúafjölda hvers hverfis. 

  • Framkvæmd

    Framkvæmdir verkefna úr niðurstöðu kosninga fara fram á tímabilinu vorið 2020 til haustsins 2021.

    Hægt verður að fylgjast með stöðu framkvæmda hér á síðunni. 

    Framkvæmdum á verkefnum sem voru kosin áfram af íbúum árið 2018 er senn að ljúka. Framkvæmdaáætlun er aðgengileg hér.

  • Spurt og svarað

    Hér má nálgast algengustu spurningar og svör sem hafa vaknað við framkvæmd verkefnisins.

Síðast uppfært 01. október 2019