Verkefnið Virkni og vellíðan býður eldri bæjarbúum í Kópavogi upp á fjölbreytta og heilsueflandi hreyfingu nærri heimili þeirra. Markmiðið er að efla líkamlega, andlega og félagslega heilsu og stuðla að virkni og vellíðan á efri árum.
Hefðbundin starfsemi fer fram á sex stöðum í Kópavogi. Annars vegar eru æfingar í íþróttahúsunum Fífunni, Kórnum og Digranesi í samstarfi við íþróttafélög bæjarins. Hins vegar er boðið upp á æfingar í félagsmiðstöðvunum Gjábakka, Gullsmára og Boðaþingi. Á öllum stöðum eru æfingar tvisvar í viku undir leiðsögn þjálfara.
Fyrirkomulag Virkni og Vellíðan byggir á hópþjálfun undir leiðsögn þjálfara 2–3 sinnum í viku í um 30 - 45 mínútur í senn.
Áhersla er lögð á fjölbreytta þjálfun í samræmi við ráðleggingar um hreyfingu fyrir eldra fólk. Æfingarnar innihalda meðal annars:
- Styrktaræfingar.
- Þolæfingar.
- Liðleikaæfingar.
- Jafnvægisæfingar.
Þjálfarar útbúa æfingaáætlanir og aðlaga æfingar að líkamlegri getu hvers og eins.
Hefðbundnar æfingar fara fram í:
- Breiðablik – Fífunni
- HK – Kórnum
- Íþróttahúsinu Digranesi
- Félagsmiðstöðvunum Gjábakka, Gullsmára og Boðaþingi.
Staðsetning valæfinga getur verið breytileg milli anna. Nánari upplýsingar um hvar þær fara fram eru auglýstar í upphafi hverrar annar.
Auk reglulegra æfinga tvisvar í viku býður Virkni og vellíðan upp á fjölbreyttar valæfingar. Valæfingarnar eru opnar öllum Kópavogsbúum og því ekki skilyrði að vera skráður þátttakandi í Virkni og vellíðan til að taka þátt.
Framboð valæfinga er breytilegt milli anna og geta þátttakendur valið úr mismunandi námskeiðum og æfingum eftir því sem í boði er hverju sinni. Greitt er sérstaklega fyrir valæfingar og er þátttökugjald mismunandi eftir námskeiðum.
Markmið valæfinga er:
- Kynna fjölbreytt hreyfiúrræði og heilsueflingu.
- Auka áhuga og hreyfigleði.
- Efla félagslegt umhverfi og samveru.
Meðal þess sem hefur verið í boði er:
- Zumba
- Línudans
- Kínaskák
- Quigong
- Jóga
- Bandvefslosun
- Golf
- Æfingar í fimleikasal Gerplu.
Kynningartímar á fjölbreyttri hreyfingu innan bæjarins eru einnig reglulega í boði fyrir þátttakendur í Virkni og vellíðan.
Virkni og vellíðan leggur áherslu á heilsulæsi þátttakenda og býður reglulega upp á fræðslufyrirlestra sem fara fram bæði í félagsmiðstöðvunum eða tónlistarhúsinu Salnum í Kópavogi.
Fyrirlestrar geta til dæmis verið um:
- Næringu
- Svefn
- Geðheilsu
- Húmor
- Heilsu og vellíðan
Á hverri önn eru einnig haldnir ýmsir skemmtilegir viðburðir fyrir þátttakendur, sem dæmi jólahlaðborð á haustin og Götuganga Virkni og Vellíðan á vorin.
Haustönn stendur yfir í fjóra mánuði. Önnin hefst um miðjan eða lok ágúst og er fram í miðjan desember.
Vorönn stendur yfir í fimm mánuði. Önnin hefst í byrjun janúar og lýkur eftir fyrstu vikuna í júní.
Greitt er fyrir heila önn í einu.
- Haustönn: 20.000 kr.
- Vorönn: 25.000 kr.
Hægt er að skrá sig með því að senda tölvupóst á virkniogvellidan@kopavogur.is eða með skráningarhlekknum hér að ofan.
Nánari upplýsingar
Ef þú hefur spurningar eða vilt fá nánari upplýsingar geturðu sent skilaboð á Facebook-síðu Virkni og vellíðan. Þar geturðu einnig fylgst með starfinu og því sem er á döfinni.