Fyr­ir starfs­fólk

Starfsfólk hefur greiðan aðgang að ýmsum upplýsingum er varða starf þeirra, samskipti, hagnýtar upplýsingar svo og fræðslu. Miðlæg upplýsingasíða nefnist Torgið, þar er hægt að finna starfsmannahandbók sem er upplýsinga handbók fyrir starfsfólk, Fræðslutorg sem er miðlægt fræðslukerfi svo og tengil inn á samskiptamiðilinn Viva Engage þar sem allar innri fréttir og tilkynningar eru birtar.

Allt starfsfólk Kópavogsbæjar getur skoðað ýmsar nytsamlegar upplýsingar á mannauðsvef og í appi Kjarna, t.d.

• skráð ýmsar eigin starfsmannaupplýsingar
• sótt um heilsuræktarstyrk
• sótt persónulegar upplýsingar

Með þessum möguleika gefst starfsfólki tækifæri til þess að sækja og breyta eigin upplýsingum án aðkomu yfirmanna, svo og starfsfólki launadeildar og sparar þannig bæði tíma og fyrirhöfn allra.

Þinn næsti yfirmaður svarar frekari spurningum við upphaf starfs hjá Kópavogsbæ.

Ný Mannauðsstefna Kópavogsbæjar var samþykkt 2024. Mannauðsstefnan styður við framfylgd Stefnu Kópavogsbæjar sem saman stendur af hlutverki, framtíðarsýn, gildum og yfirmarkmiðum úr Heimsmarkmiðum Sameinuðu þjóðanna um sjálfbæra þróun. Þá hefur mannauðsstefnan gildi Kópavogsbæjar að leiðarljósi og styður við markvissa notkun þeirra og innleiðingu á starfsstöðum Kópavogsbæjar.

Meginmarkmið mannauðsstefnunnar er þríþætt:

1. Gott að vinna – Starfsfólk vinni saman sem ein liðsheild á einum vinnustað.
2. Gott að vera – Öllu starfsfólki líði vel á sínum vinnustað.
3. Gott að vaxa – Starfsfólk hefur tækifæri til starfsþróunar og nýsköpunar í starfi.

Nálgast má kynningu á mannauðsstefnunni hér að neðan.

Kópavogsbær hefur samþykkt stefnu gegn einelti, kynbundinni áreitni, kynferðislegri áreitni og ofbeldi (EKKO) á vinnustöðum sveitarfélagsins. Jafnframt hafa verið gefnar út leiðbeiningar til starfsfólks hvað varðar tilkynningar um mál og tilkynningarblað. Einnig upplýsingar um óformlega meðferð mála og framkvæmd frumkvæðisathugana.

Myndband um EKKO

Í eineltisteymi sitja:

Amanda K. Ólafsdóttir skrifstofustjóri, skrifstofu sviðsstjóra
Sigríður Þrúður Stefánsdóttir mannauðsstjóri

ATVIK slysaskráningakerfi heldur utan um þau atvik, slys og hættur sem komið geta upp við störf hjá Kópavogsbæ. Starfsfólk og stjórnendur nýta kerfið sem vettvang til að koma í veg fyrir slys og ógnir.

Starfsfólk getur ýmist tekið mynd af QR kóða eða smellt á eftirfarandi hlekk til þess að skrá sig inn í ATVIK. Innskráning fer fram með rafrænum skilríkjum.

Í ATVIK getur starfsfólk Kópavogsbæjar skráð slys/næstum því slys eða slys á börnum. Einnig er hægt að tilkynna ógn, áreitni eða einelti sem starfsfólk verður fyrir.

Þegar atvik er skráð (slys, slys á barni eða hættu í umhverfinu) fær stjórnandi þeirrar stofnunar tilkynningu um atburðinn. Stjórnandi vinnur að úrbótum eins og hægt er hverju sinni. Ef tilkynnt er um einelti, áreitni eða ógn fær mannauðsstjóri sem fulltrúi í eineltisteymi tilkynningu og vinnur málið í framhaldi af því með eineltisteymi bæjarins.

Reglulega eru haldin námskeið um Atvik fyrir stjórnendur, öryggisverði, öryggistrúnaðarmenn og öryggisnefndir stofnana. Sjá nánar í Fræðslutorgi.

Kópavogsbær hefur sett sér það markmið að vera slysalaus vinnustaður. Til að svo megi verða þarf að efla öryggisvitund starfsmanna og stuðla að öflugri öryggismenningu.

Kópavogsbær leggur áherslu á að öryggi starfsmanna, nemenda og annarra þjónustuþega sé í fyrirrúmi og að leita allra leiða til að efla öryggi. Forvarnir og góð vinnubrögð skapa öruggara umhverfi sem fyrirbyggi óhöpp og slys.

Öryggisstefna bæjarins felur meðal annars í sér að á öllum vinnustöðum séu virkar öryggisnefndir og starfsmenn bæjarins vinni eftir samþykkt um öryggismál.