Auðbrekka, reitur 3. Byggingaráform.

Í samræmi við gr. 4 í skipulagsskilmálum Auðbrekka - þróunarsvæði, deiliskipulag svæða 1, 2 og 3 sem tók gildi 23. maí 2016 eru lögð fram að nýju byggingaráform ASK arkitekta fyrir hönd lóðarhafa fyrir svæði 3 dags. í ágúst 2016. Í gr. 4 í skipulagsskilmálum deiliskipulags Auðbrekku kemur m.a. fram að áður en aðalteikningar eru lagðar fyrir byggingarfulltrúa til afgreiðslu þurfa hönnuðir að leggja byggingaráform sín (frumdrög) fyrir skipulagsnefnd til afgreiðslu.

Samþykkt. Skipulagsnefnd telur að framlögð byggingaráform fyrir svæði 3 vera í samræmi við þau viðmið sem sett er fram í samþykktu deiliskipulagi fyrir Auðbrekku þróunarsvæði, svæði 1, 2 og 3 sem tók gildi 23. maí 2016 og veitir lóðarhöfum heimild til að skila gögnum til byggingarfulltrúa.

Theódóra Þorsteinsdóttir, Andrés Pétursson, Jón Finnbogason, Kristinn Dagur Gissurarson og Júlíus Hafstein samþykktu tillöguna.

Sigríður Kristjánsdóttir og Ása Richardsdóttir sátu hjá við afgreiðslu málsins. Ása lagði fram eftirfarandi bókun: "Margt í fyrirhuguðum áformum virkar mjög spennandi fyrir komandi íbúa. Þó er miður að sjá að göngu/hvíldargata, sem líkt er við Parísargötu, í gögnum málsins, mun lítt njóta sólar og virðist ekki hönnuð svo, að almenningur geti nýtt og notið. Græn og opin svæði skipta afar miklu máli, í þessu hverfi sem öðrum. Ég sit hjá við afgreiðslu málsins Ása Richardsdóttir."

Fundarhlé kl 16:40

Fundi framhaldið kl 16:45

Bókun frá Theódóru Þorsteinsdóttur, Andrési Péturssyni, Jóni Finnbogasyni, Kristni Degi Gissurarsyni og Júlíusi Hafstein: "Umræddur göngustígur er hannaður sérstaklega breiður til þess að auka birtumagn. Sitt hvorum megn við umræddan göngustíg eru sólrík torg sem hugsuð eru sem dvalarstaður."

Í samræmi við gr. 4 í skipulagsskilmálum Auðbrekka - þróunarsvæði, deiliskipulag svæða 1,2 og 3 eru lögð fram byggingaráform ASK arkitekta fyrir svæði 3 dags. í ágúst 2016.

Frestað.