Málefni leikskóla. Bókun frá Birki Jóni Jónssyni.

Kynning frá fulltrúum menntasviðs vegna mönnunarvanda á leikskólanum Austurkór, sem óskað var eftir á fundi bæjarráðs þann 15.09.2016.

Lagt fram.

Bókun:

"Ég vil þakka starfsfólki Austurkórs og menntasviðs fyrir góða frammistöðu í starfi við erfiðar aðstæður. Mikilvægt er að menntasvið móti tillögur með það að markmiði að koma í veg fyrir mönnunarvanda í leikskólum bæjarins í náinni framtíð.

Birkir Jón Jónsson"

Bókun:

"Bæjarráð tekur undir bókun Birkis Jóns Jónssonar."

Kynning frá fulltrúum menntasviðs vegna mönnunarvanda á leikskólanum Austurkór, sem óskað var eftir á síðasta fundi bæjarráðs þann 15.09.2016.

Bæjarráð frestar málinu til næsta fundar.

Birkir Jón Jónsson lagði fram eftirfarandi bókun:

"Ég óska eftir því að á næsta fundi bæjarráðs verði fjallað um mönnunarvanda á leikskólanum Austurkór í Kópavogi og hvernig bregðast megi við til framtíðar litið. Óska er eftir því að fulltrúar menntasviðs komi á fundinn.

Birkir Jón Jónsson"

Hlé var gert á fundi kl. 10.15. Fundi var fram haldið kl. 10.20.

Fulltrúar meirihlutans í bæjarráði lögðu fram eftirfarandi bókun:

"Sjálfsagt að verða við beiðni um að ræða mönnun leiksskóla á næsta fundi bæjarráðs en um leið vill meirihluti bæjarráðs Kópavogs lýsa yfir furðu sinni á framsetningu frétta Ríkisútvarpsins og Ríkissjónvarpsins í kvöldfréttum í gær þann 14/9. Eins og fram kom í fréttinni þá eru 31 af 64 leikskólum í Reykjavík undirmannaðir en samt er eini leikskólinn í Kópavogi sem hefur þurft að senda börn heim látinn bera uppi fréttina nánast í beinni útsendingu. Austurkór er yngsti leikskólinn í Kópavogi og það er alltaf erfiðast að manna leiksskóla meðan þeir eru að slíta barnskónum auk þess sem þar komu upp langtímaveikindi starfsfólks í ágúst þannig að ekki var hægt að bregðast við fyrir þann tíma. Kópavogur er það sveitarfélag sem hefur lagt hvað mest af mörkum við að sporna við fækkun í stétt leikskólakennara á Íslandi. Fjöldi manns hefur stundað nám með styrk frá Kópavogi síðustu 2-3 ár og fékk Kópavogsbær Orðsporið fyrir aðgerðir við að hækka menntunarstig starfsmanna leikskóla og/eða fjölga leikskólakennurum í sínum leikskólum en verðlaunin eru veitt þeim sem skara framúr í málefnum leikskólanna. Að lokum er starfsfólki þakkað fyrir góð störf um leið og foreldrar geta treyst því að það munu allir leggjast á eitt til að leysa úr vanda leikskólans Austurkórs.

Theódóra Þorsteinsdóttir, Ármann Kr. Ólafsson, Karen Halldórsdóttir, Hjördís Ýr Johnson"