Bólusetningar barna í leik- og grunnskólum.

Frá lögfræðideild, dags. 20. mars, lögð fram umsögn um fyrirspurn af fundi bæjarráðs þann 15. desember sl. að því er varðar bólusetningar barna í leik- og grunnskólum vegna kíghósta.

Lagt fram.

Bókun Karenar E. Halldórsdóttur:

"Ég þakka lögfræðingi Kópavogs fyrir greinagott og vandað svar.

Ég er hrygg yfir því að það sé ekkert sem Kópavogsbær má gera til þess að upplýsa foreldra og skólayfirvöld um mögulega smithættu af þeim sem ekki eru bólusettir fyrir t.d. Kíghósta. Bólusetning og "ekki bólusetning" er tilkynningarskyld til sóttvarnarlæknis sem hefur þessar upplýsingar og setur í sjúkraskrár. Erindi mitt vísaði í hvort leikskólar og skólar gætu óskað eftir upplýstu samþykki foreldra um hvort barn væri bólusett fyrir helstu smitsjúkdómum sem herja þá helst á óvarin ungabörn heima fyrir. Slíkt er bæjarfélaginu ekki heimilt. Þessar upplýsingar varða persónuverndarlög og hvílir þagnarskylda á heilbrigðisstarfsfólki um vernd sjúklinga.

Hafa skal samt í huga að lögin eru mannanna verk og vil ég hvetja Alþingi til að íhuga heimildir sveitarfélaga um upplýsingagjöf, á leikskólum og skólum, vegna bólusetninga til þess að vernda hagsmuni heildarinnar sem hlýtur að vera áframhald á því að bægja frá sem flestum smitsjúkdómum frá ungviði og lýð landsins."

Ása Richardsdóttir, Birkir Jón Jónsson og Margrét Júlía Rafndóttir taka undir bókun Karenar E. Halldórsdóttur.

Karen Halldórsdóttir lagði fram eftirfarandi fyrirspurn:

"Óska eftir því að kafað verði í þá hugmyndafræði að öll börn í leikskólum/skólum Kópavogs verði beðin um að framvísa bólusetningarvottorði vegna Kíghósta. Séu börn ekki bólusett fyrir þessum sjúkdómi, þá skuli aðrir foreldrar á leikskólum/skólum látnir vita af fjölda óbólusettra barna á þeim leikskólum sem þeirra börn eiga vist í. Tilfelli væru með nafnleynd en sett fram til að foreldrar annarra barna sér í lagi ungabarna viti af smithættu.

Foreldrum barna í Kópavogi verði einnig veitt fræðsla um mikilvægi bólusetninga almennt, sér í lagi í ljósi þess að um öryggi heildarinnar er að ræða. Slíkt mætti gera í samstarfi við embætti Landlæknis.

Óska eftir umsögn og mögulegri úrvinnslu/umsögn frá bæjarlögmanni og menntasviði.

Karen Halldórsdóttir"