Gunnarshólmi, Grænt ehf. Umsagnarbeiðni vegna umsóknar um nýtt rekstrarleyfi íbúðagisting fl.III

Frá lögfræðideild, dags. 10. janúar, lagt fram bréf Sýslumannsins á höfuðborgarsvæðinu, dags. 9. janúar, þar sem óskað er umsagnar um umsókn Grænt ehf., kt. 680114-1530, um nýtt rekstrarleyfi fyrir gististað í flokki III, að Gunnarshólma, 203 Kópavogi, skv. 10. gr. laga nr. 85/2007 um veitingastaði, gististaði og skemmtanahald og 23. gr. rgl. nr. 585/2007. Samkvæmt 1. tl. 4. mgr. 10. gr. laga nr. 85/2007 staðfestir sveitarstjórn, sem umsagnaraðili, að afgreiðslutími og staðsetning staðar sem umsókn lýtur að sé innan þeirra marka sem reglur og skipulag sveitarfélagsins segja til um.

Hvað staðsetningu varðar er ekki gert ráð fyrir atvinnustarfsemi skv. gildandi skipulagi, en í 6.2. gr. skipulagsreglugerðar nr. 90/2013 kemur þó fram að minniháttar atvinnustarfsemi sem samrýmist búsetu eftir því sem nánar er kveðið á um í stefnu skipulags sé heimil. Bæjarráð samþykkir með fimm atkvæðum að veita jákvæða umsögn með vísan til minnisblaðs lögfræðideildar og staðfestir að umfang rekstrarleyfisins samrýmist stefnu skipulags.