Erindi frá leikskólastjórum - Undirbúningstímar sérkennara

Lagt fram til upplýsinga að beiðni bæjarfulltrúa Péturs Hrafns Sigurðssonar erindi frá leikskólastjórum um undirbúningstíma sérkennslu í leikskólum Kópavogs dags. 5. október sl.

Lagt fram.

Bókun:

"Undirritaður telur ófært að Kópavogsbær taki aukinn fjölda undirbúningstíma sérkennara í leikskólum sem samið var um í kjarasamningum af úthlutuðum sérkennslutímum barna. Þetta verður til þess að börn sem þurfa á sérkennsluúrræðum að halda í leikskólum bæjarins munu fá færri tíma en áður. Það verða því þau sem síst skyldi, börnin sem þurfa á sérkennsluúrræðum að halda, sem í raun niðurgreiða kostnað Kópavogsbæjar vegna kjarasamninga."

Pétur H. Sigurðsson.


Bókun:

"Við úthlutun undirbúningstíma í Kópavogi er gert ráð fyrir 12 tímum á deild að lágmarki, óháð fjölda fagmenntaðra starfsmanna. Auk þess er gert ráð fyrir fjölgun undirbúningstíma umfram 12 tíma, í samræmi við fjölda fagmenntaðra samkvæmt nýjum kjarasamningi FL. Undirbúningstímar vegna sérkennslu hafa fram til þessa verið hluti af úthlutun til sérkennslu og hefur sama leið verið farin í öðrum sveitarfélögum samkvæmt fyrirliggjandi upplýsingum. Við útfærslu úthlutunar til sérkennslu verður leitað leiða til að tryggja að aukinn fjöldi undirbúningstíma komi ekki niður á þjónustu við börn.

Málinu var vísað til menntasviðs til úrvinnslu frá leikskólanefnd og unnið er að því að aðlaga úthlutunarmódel. Leikskólar Kópavogs búa við afar góða úthlutun til sérkennslu og einstaklega vel er búið að börnum sem þurfa á sérkennslu að halda."

Ármann Kr. Ólafsson


Bókun:

"Ég tek undir bókun Ármanns."

Karen E. Halldórsdóttir

Bókun:

"Ég tek undir bókun Ármanns."

Hjördís Ýr Johnson

Bókun:

"Ég tek undir bókun Ármanns."

Birkir Jón Jónsson


Bókun:

"Fram hefur komið að áætlanir Kópavogsbæjar geri ekki ráð fyrir öðru en að aukinn fjöldi undirbúningstíma sérkennara verði tekinn af sérkennslutímum barna."

Pétur H. Sigurðsson

Erindi vísað til úrvinnslu til menntasviðs.