Fyrirspurn vegna bólusetningar viðkvæmra hópa

Lögð var fram eftirfarandi fyrirspurn:

"Undirrituð óska eftir upplýsingum um stöðu bólusetningar vegna Covid-19 meðal skjólstæðinga Kópavogsbæjar sem tilheyra viðkvæmum hópum og aðstoðarfólks þeirra. Eftir hvaða reglum og verkferlum er unnið og hver er áætlunin um bólusetningar viðkvæmra hópa? Hefur orðið misbrestur þar á sbr. fréttaflutning um helgina og ef svo er hvernig stendur til að bregðast við því?

Sigurbjörg Erla Egilsdóttir

Kristín Sævarsdóttir

Donata H. Bukowska

Andrés Pétursson"

Eftirfarandi svar var lagt fram af starfsmönnum velferðarsviðs:

Heilsugæslan á höfuðborgarsvæðinu óskaði eftir því að sveitarfélögin myndu taka saman lista yfir einstaklinga sem búa á heimilum fatlaðs fólks og á hjúkrunarheimilum í viðkomandi sveitarfélagi. Í ljósi takmarkaðs magns bóluefnis var í framhaldi skipaður hópur til að forgangsraða einstaklingum úr þeim hópi; a) þá íbúa á heimilum fatlaðs fólks sem eru með hjúkrunarþarfir og b) þá íbúa sem búa á herbergjasambýlum.

Í desember óskaði NPA miðstöðin eftir því við heilsugæsluna að einstaklingar með NPA myndu vera í ákveðnum forgangi með bólusetningu. Heilsugæslan óskaði í framhaldi eftir því að sveitarfélögin myndu senda inn lista yfir notendur NPA.

Búið er að bólusetja alla þá sem eru í forgangshópi fatlaðs fólks á höfuðborgarsvæðinu þ.e. íbúa á heimilum fatlaðs fólks sem eru með hjúkrunarþarfir og þá sem búa í herbergjasambýlum. Næsti hópur í forgangi eru 70 ára og eldri. Þá liggur það einnig fyrir að það eigi að klára að bólusetja þá sem eru búsettir á heimilum fatlaðra á höfuðborgarsvæðinu. Hvort þeir komi á undan eða eftir þeim sem eru 70 ára er heilsugæslunnar að ákveða.