Fyrirspurn frá bæjarfulltrúum Vina Kópavogs varðandi úthlutunarreglur á byggingarrétti

Frá bæjarlögmanni, dags. 23.08.2022, lagt fram svar við fyrirspurn bæjarfulltrúa Vina Kópavogs frá 15.07. 2022 um lóðaúthlutanir og úthlutunarreglur á byggingarrétti.

Lagt fram.

Bókun:

"Svör bæjarins kristalla þá framkvæmd skipulags í Kópavogi undanfarna tvo áratugi að þeir sem kaupa húsnæði til niðurrifs fá heimild til að skipuleggja íbúðauppbyggingar á einstökum reitum á þróunarsvæðum á Kársnesinu og í Digranesi. Með þessari aðferðafræði verður sú meginskylda bæjaryfirvalda að stuðla að hagkvæmri nýtingu lands og landgæða, tryggja vernd landslags, náttúru og menningarverðmæta og koma í veg fyrir umhverfisspjöll og ofnýtingu, með sjálfbæra þróun að leiðarljósi, útundan. Þetta er enn til áréttingar á því hversu mikilvægt er að bæjaryfirvöld eigi samráð við íbúa um gerð hverfisskipulags og leiðarljós í þeirri vinnu."

Helga Jónsdóttir

Bókun:

"Ég tek undir bókun bæjarfulltrúans Helgu Jónsdóttur."

Bergljót Kristinsdóttir.

Fundarhlé hófst kl. 11:35, fundi fram haldið kl. 12:01

Bókun:

"Við höfnum þeirri fullyrðingu að Kópavogsbær hafi afsalað sér skipulagsvaldi til þróunar- eða byggingaraðila í Kópavogi undanfarna tvo áratugi. Skipulagsvaldið er og verður alltaf hjá sveitarfélaginu. Undirrituð taka undir mikilvægi þess að víðtækt samráð sé haft við íbúa á öllum stigum skipulagsgerðar, nú sem fyrr."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Bókun:

"Kópavogsbær hefur síðustu áratugi unnið samkvæmt stefnu sem fram kemur í aðalskipulagi eins og lög gera ráð fyrir. Auk þess hafa hverfisáætlanir verið unnar í samráði við íbúa, síðast árið 2015. Þar að auki var unnin lýsing fyrir svæðið þar sem þróunarreit vestast á Kársnesi var skipt upp í 13 áfanga.

Á því kjörtímabili voru haldnir 48 opnir íbúafundir og þar af 8 opnir íbúafundir á Kársnesi.

Allt var þetta unnið í samræmi við meginmarkmið aðalskipulags Kópavogs og svæðisskipulag höfuðborgarsvæðisins um þéttingu byggðar. Þar með talið hagkvæm nýting lands og landgæða, vernd og sjálfbæra þróun.

Nú hefur hins vegar nýtt aðalskipulag tekið gildi og því eðlilegt að nýtt hverfisskipulag verði unnið í samráði við íbúa, rétt eins og áður. Undirrituð telur að bæjarstjórn sé sammála um þá vegferð."

Theodóra S. Þorsteinsdóttir

Erindinu er vísað til umsagnar bæjarlögmanns.