Tillaga bæjarfulltrúa Theódóru S. Þorsteinsdóttur um að hafin verði undirbúningur að gerð hverfisskipulags fyrir hvern bæjar/hlutahvert hverfi í Kópavogi.

Frá sviðsstjóra umhverfissviðs, dags. 18.10.2022, lögð fram umsögn varðandi hverfisskipulag.

Bæjarráð hafnar tillögu Theódóru S. Þorsteinsdóttur með þremur atkvæðum, gegn atkvæði Theódóru S. Þorsteinsdóttur og hjásetu Helgu Jónsdóttur.

Fundarhlé hófst kl. 9:33, fundi fram haldið kl. 9:55.

Bókun:

"Með hverfisskipulagi er mögulegt að setja fram framtíðarsýn hverfa með heildstæðri skipulagsáætlun sem nær yfir mörg minni svæði sem annars hafa verið skipulögð sem sjálfstæðar einingar og byggð upp á mismunandi tímabilum. Þar koma fram vísar að framtíðarþróun og leiðir að betri hverfum fyrir bæjarbúa alla.



Markmiðið með hverfisskipulagi er að móta stefnu um breytingar á húsnæði, fjölgun íbúða, samgöngur, græn svæði og styrking á verslun og þjónustu í hverfum. Einnig að fegra umhverfið og hvetja til heilsueflandi athafna. Með gerð hverfisskipulags er aðalskipulagið fært nær íbúum. Tekið er mið af þörfum þeirra sem búa og starfa í hverfinu, og innviðir hverfisins, starfsemi og notkun þess skilgreint með auknu samráði. Hverfisáætlanir ná engan veginn utan um markmið hverfisskipulags.

Þess vegna þykir undirritaðri miður að ekki sé vilji til þess að hefja faglegan undirbúning að hverfisskipulagi."

Theódóra S. Þorsteinsdóttir

Bókun:

"Tek undir bókun Theódóru S. Þorsteinsdóttur."

Sigurbjörg E. Egilsdóttir.


Fundarhlé hófst kl. 10:00, fundi fram haldið kl. 10:19.

Bókun:

"Með byggðarkönnun, hverfisáætlun, rammaskipulagi og vandaðri deiliskipulagsvinnu byggðri á aðalskipulagi, samráði við íbúa um framtíðarsýn og mannlíf í hverfum, nást meginmarkmiðin sem bæjarfulltrúar Viðreisnar og Pírata tiltaka í bókun sinni. Að auki tekur þessi nálgun skemmri tíma og tilkostnaður er minni."

Orri V. Hlöðversson

Hjördís Ýr Johnson

Andri S. Hilmarsson

Ásdís Kristjánsdóttir

Helga Jónsdóttir

Bergljót Kristinsdóttir

Fundarhlé hófst kl. 10:22, fundi fram haldið kl. 10:42.

Tillaga:

"Lagt er til að lokið verði við vinnu við gerð hverfisáætlana í Kópavogi sem unnið hefur verið að frá árinu 2014, með hverfisáætlanir fyrir Kársnes og Digranes í forgangi. Jafnframt verði sett í forgang vinna við deiliskipulag Borgarlínu og hafnarsvæðis á Kársnesi."

Orri V. Hlöðversson

Hjördís Ýr Johnson

Andri S. Hilmarsson

Ásdís Kristjánsdóttir

Helga Jónsdóttir

Bergljót Kristinsdóttir

Bæjarráð samþykkir tillöguna með fjórum atkvæðum gegn atkvæði Theódóru S. Þorsteinsdóttur.



Bókun:

"Það eru engar upplýsingar sem liggja fyrir um hvort byggðarkönnun, hverfisáætlun, rammaskipulag og deiliskipulagsvinna sé ódýrari leið en vinna við gerð á heildstæðu hverfisskipulagi. Áætluð fjölgun íbúða á Kársnesinu eru 1.390 samkvæmt nýju aðalskipulagi. Hverfisáætlanir kveða ekki á um fastar byggingarheimildir. Með gerð hverfisskipulags er aftur á móti hægt að móta stefnu um hvar fjölgun íbúða mun eiga sér stað, samgöngur, græn svæði og styrkingu á verslun og þjónustu í hverfinu. Þá einfaldar hverfisskipulag íbúum að sækja um breytingar á fasteignum sínum og lóðum, s.s. að byggja kvisti, svalir, eða viðbyggingar og fleira. Með tilkomu hverfisskipulags er byggðin þróuð í takt við breyttar áherslur í samfélaginu og unnið að því að gera hverfin vistvænni og sjálfbærari."

Theodóra S. Þorsteinsdóttir

Sigurbjörg Erla Egilsdóttir

Fundarhlé hófst kl. 10:51, fundi fram haldið kl. 11:01

Bókun:

"Það kemur skýrt fram í minnisblaði skipulagsfulltrúa að um er að ræða tímafreka og mjög kostnaðarsama vinnu. Að öðru leyti vísum við til fyrri bókunar."

Orri V. Hlöðversson

Hjördís Ýr Johnson

Andri S. Hilmarsson

Ásdís Kristjánsdóttir

Fundarhlé hófst kl. 11:02, fundi fram haldið kl. 11:05.

Bókun:

"Sá kostnaður sem vísað er til í minnisblaði skipulagsfulltrúa snýr aðeins að gerð hverfisáætlunar en ekki kemur fram hver kostnaðurinn er við gerð rammaskipulags, byggðakönnunar og allrar þeirrar deiliskipulagsvinnu sem þarf að fara fram ef ekki er unnið hverfisskipulag."

Theodóra S. Þorsteinsdóttir

Sigurbjörg Erla Egilsdóttir

Frá bæjarfulltrúa Theodóru S. Þorsteinsdóttur, dags. 23.08.2022, lögð fram tillaga um að hafinn verði undirbúningur að gerð hverfisskipulags fyrir hvern bæjarhluta/hvert hverfi í Kópavogi.

Bæjarráð vísar erindinu til umsagnar sviðsstjóra umhverfissviðs.