Athugasemdir frá Íþróttafélaginu Gerplu vegna nýsamþykktra reglna um ferðastyrki og afrekssjóð

Málið var tekið fyrir á 132. fundi íþróttaráðs, á 1280. fundi bæjarstjórnar var málinu vísað að nýju til efnislegrar meðferðar í íþróttaráði með eftirfarandi bókun:

Önnur mál fundargerðir

"Bæjarstjórn óskar samhljóða eftir að erindi frá íþróttafélaginu Gerplu sem tekið var fyrir undir 19. lið fundargerðar íþróttaráðs verði aftur tekið til umfjöllunar á næsta fundi Íþróttaráðs og skoðað nánar."

Málið er því lagt fyrir íþróttaráð að nýju.

Íþróttaráð samþykkir að leitað verði eftir samráði við önnur bæjarfélög um að vinna að því að samræma reglur bæjarfélaga um ferða- og afreksstyrki með þeim hætti að styrkir miðist ávalt við lögheimili iðkandans. Með því er hægt að tryggja að styrkurinn renni ávalt til þeirra sem eiga lögheimili í bæjarfélaginu og á sama tíma komið í veg fyrir að hægt sé að fá styrk frá fleiri en einu bæjarfélagi eða að lenda í þeirri stöðu að fá jafnvel engan styrk.

Íþróttaráð samþykkir einnig að á meðan sú samráðsvinna stendur yfir verði gerðar eftirfarandi breytingar á 1. og 2. grein á reglum um ferðastyrki og afrekssjóð:

1. grein í reglum um ferðastyrki íþróttaráðs

Var áður: „Ferðastyrkir vegna landsliðsferða íþróttafólks eru veittir til þeirra sem eiga lögheimili í Kópavogi“.

En verður nú: „ Ferðastyrkir vegna landsliðsferða eru veittir til iðkenda íþróttafélaga í Kópavogi. Íþróttafélög sem bjóða upp á íþróttagreinar sem ekki eru stundaðar í Kópavogi geta einnig sótt um styrk til íþróttaráðs vegna iðkenda sem eiga lögheimili í Kópavogi“.

2. grein í reglum um Afrekssjóð íþróttaráðs.

Var áður: „Að styrkja afreksíþróttafólk sem á lögheimili í Kópavogi“.

En verður nú:

„a) Að veita afreksíþróttafólki í íþróttafélögum í Kópavogi fjárhagslegan styrk vegna æfinga og/eða keppni, og þannig búa þeim sem besta aðstöðu til að stunda íþrótt sína.

b) Að veita afreksíþróttafólki styrk sem á lögheimili í Kópavogi en getur ekki stundað sína íþrótt í bæjarfélaginu“.

Jafnframt samþykkir íþróttaráð að breyta 3. grein í reglum um ferðastyrki eftirfarandi:

Var áður: „Umsókn um ferðastyrk iðkenda þarf að berast frá sérsambandi til íþróttadeildar. Í umsókninni þarf að koma fram ferðakostnaður. Styrkir eru ávallt greiddir að ferð lokinni gegn framvísun afrits af flugfarseðli/farseðlum“.

En verður nú: „Umsókn um ferðastyrk iðkenda þarf að berast frá íþróttafélagi, deild félags eða sérsambandi til íþróttadeildar. Í umsókninni þarf að koma fram ferðakostnaður. Styrkir eru ávallt greiddir að ferð lokinni gegn framvísun afrits af flugfarseðli/farseðlum“.

Lagt fram erindi frá Íþróttafélaginu Gerplu, dags. 24. apríl 2023, þar sem félagið óskar eftir því að íþróttaráð endurskoði nýsamþykktar reglur um ferðastyrki og afrekssjóð.

Íþróttaráð þakkar Gerplu fyrir erindið. Ekki stendur til að breyta nýsamþykktum reglum, en þær eru teknar til endurskoðunar árlega. Í því sambandi verða heildaráhrif metin og samtal átt við önnur sveitarfélög.

Bókun:

"Það eru ekki góð vinnubrögð að Íþróttaráð skuli ekki taka tillit til þeirra athugasemda sem koma fram í bréfi frá íþróttafélaginu Gerplu en þar kemur fram að þeir iðkendur hjá íþróttafélaginu fái ekki afreks og ferðastyrki þegar þeir eru valdir til þátttöku í landsliðum nema þeir eigi lögheimili í Kópavogi. Þessi breyting um lögheimili sem að sett var inn í reglugerðina á seinni stigum mun hafa þær afleiðingar að þeir íþróttamenn sem búa í öðru bæjarfélagi en keppa fyrir félag í Kópavogi geta ekki sótt um þessa styrki.

Þetta var ekki markmiðið á vinnufundi Íþróttaráðs 16.mars 2023 þar sem reglugerð um afrekssjóð var endurskoðuð."

Leó Snær Pétursson.

Bókun:

"Því er vísað á bug að ekki hafi verið vandað til verka eða tekið tillit til athugasemda og ólíkra sjónarmiða. Sérstakur vinnufundur fór fram hjá ráðinu þar sem breytingar voru ræddar á reglunum. Í kjölfarið voru breytingar á reglunum ræddar og svo lagðar fyrir íþróttaráð og samþykktar án athugasemda eins og sjá má í 130. fundargerð íþróttaráðs."

Sverrir Kári Karlsson

Elísabet Berglind Sveinsdóttir

Sunna Guðmundsdóttir

Gunnar Gylfason

Thelma Bergmann Árnadóttir