Viljayfirlýsing um uppbyggingu lífsgæðakjarna

Dagskrármál að beiðni bæjarstjóra.

Umræður.

Bæjarstjórn samþykkir framlagða viljayfirlýsingu um uppbyggingu lífsgæðakjarna með 6 atkvæðum, gegn atkvæðum Theódóru S. Þorsteinsdóttur, Sigurbjargar E. Egilsdóttur, Kolbeins Reginssonar, Helgu Jónsdóttur og Bergljótar Kristinsdóttur.

Bókun:

"Umræða í bæjarráði sýndi að ekki var samstaða um málið. Eftir sem áður var send út fréttatilkynning um að bæjarráð hefði samþykkt að vísa áfram til samþykktar drögum að viljayfirlýsingu við Aflvaka Þróunarfélag um uppbyggingu 5.000 íbúða lífsgæðakjarna á jörðinni Gunnarshólma. Það er óviðunandi og ámælisvert að bæjarstjóri, ásamt fjárfestum, kynni málið fyrir hönd Kópavogsbæjar áður en umræðu um það og afgreiðslu í bæjarstjórn er lokið."

Bergljót Kristinsdóttir

Helga Jónsdóttir

Kolbeinn Reginsson

Sigurbjörg Erla Egilsdóttir

Theódóra S. Þorsteinsdóttir


Bókun:

"Á næstu 15 árum fjölgar 65 ára og eldri um 70% og verða þá 85.000 talsins. Þetta kallar á stórátak í uppbyggingu húsnæðis og fjölbreyttrar þjónustu fyrir fólk á efri árum. Það er mat meirihluta bæjarstjórnar Kópavogs að þeirri þörf sem framundan er verði ekki mætt innan núverandi aðalskipulags. Á svæðinu sem um ræðir er stefnt að heildstæðri nálgun og bættri þjónustu fyrir fólk á 3. og 4. æviskeiðinu. Allt verkefnið miðast við að bæta lífskjör þessa vaxtandi samfélagshóps og stuðla að sjálfstæðri búsetu í heilsusamlegu umhverfi með áherslu á útivist, félagsleg tengsl og fjölbreyttri afþreyingu.

Með samþykkt þessarar viljayfirlýsingar verður farið í rannsóknir m.t.t. vatnsverndar, hraunflæðis og jarðhræringa. Það er grundvallarforsenda fyrir uppbyggingu á svæðinu að vatnsvernd sé tryggð."



Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Sigrún Hulda Jónsdóttir

Elísabet Sveinsdóttir


Bókun:

"Samkvæmt mannfjöldaspá hagstofunnar er gert ráð fyrir að landsmönnum 65 ára og eldri fjölgi á næstu 15 árum um 42% samkvæmt miðspá eða 44% samkvæmt háspá. Það er fjölgun um 25.000-27.000 manns á landsvísu. Gefið að rúmlega 10% landsmanna búi í Kópavogi má gera ráð fyrir fjölgun um hátt í 3000 íbúa 65 ára og eldri í Kópavogi. Þeirri þörf er vel rúmlega hægt að mæta innan núverandi aðalskipulags Kópavogs. Það er ekki matsatriði heldur staðreynd."

Bergljót Kristinsdóttir

Helga Jónsdóttir

Kolbeinn Reginsson

Sigurbjörg Erla Egilsdóttir

Theódóra S. Þorsteinsdóttir


Bókun:

"Það liggur fyrir að 65 ára og eldri verða 85.000 eftir fimmtán ár. Skortur er á hjúkrunarrýmum í dag og húsnæðisskortur ríkir á höfuðborgarsvæðinu. Uppbygging á Gunnarshólma er hugsuð sem ein lausn til að mæta þeim áskorunum sem blasa við."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Sigrún Hulda Jónsdóttir

Elísabet Sveinsdóttir


Bókun:

"Áætlað er að íbúum 65 ára og eldri á höfuðborgarsvæðinu fjölgi um 16.000-18.000 næstu 15 árin. Í skipulagi sveitarfélaga á höfuðborgarsvæðinu eru áætlaðar yfir 58 þúsund íbúðir innan núverandi vaxtamarka sem jafngildir heimili fyrir um 148.000 nýja íbúa. Það er því augljóst að meira en nóg er af tækifærum til þess að byggja upp raunverulega lífsgæðakjarna fyrir eldra fólk í bland við aðra byggð á höfuðborgarsvæðinu."

Bergljót Kristinsdóttir

Helga Jónsdóttir

Kolbeinn Reginsson

Sigurbjörg Erla Egilsdóttir

Theódóra S. Þorsteinsdóttir



Bókun:

"Mikilvægt er að standa vel að uppbyggingu þjónustu, hjúkrunarrýma og íbúða fyrir eldra fólk enda er mikil fjölgun í þeim hópi fyrirséð á næstu árum. Tillagan sem hér um ræðir er þó slæmur kostur. Hún er á skjön við bæði Aðalskipulag Kópavogs, Svæðisskipulag höfuðborgarsvæðisins og samþykkt um verndarsvæði vatnsbóla. Allar samþykktar áætlanir fyrir höfuðborgarsvæðið fela í sér áherslu á blandaða byggð með ólíka aldursdreifingu og fjölbreytta þjóðfélagshópa innan sama hverfis, enda felur slíkt í sér bæði meiri samfélagsleg gæði og betri nýtingu innviða."

Sigurbjörg Erla Egilsdóttir

Theódóra S. Þorsteinsdóttir


Fundarhlé hófst kl. 18:55, fundi fram haldið kl. 19:40.

Frá bæjarstjóra, lögð fram uppfærð drög að viljayfirlýsingu um uppbyggingu lífsgæðakjarna.Bæjarráð frestaði málinu á fundi sínum þann 18.01.2024.

Sjá afgreiðslu undir lið 1.

Lögð fram drög að viljayfirlýsingu um uppbyggingu lífsgæðakjarna.

Sigurður Stefánsson framkvæmdastjóri Aflvaka þróunarfélags og Stefán Gunnar Thors frá VSÓ gerðu grein fyrir erindinu.

Lagt fram og kynnt. Umræður.

Frá bæjarstjóra, lögð fram uppfærð drög að viljayfirlýsingu um uppbyggingu lífsgæðakjarna.Bæjarráð frestaði málinu á fundi sínum þann 18.01.2024.

Bæjarráð samþykkir með fimm atkvæðum að vísa framlögðum drögum að viljayfirlýsingu um uppbyggingu lífsgæðakjarna til afgreiðslu bæjarstjórnar.

Bókun:

"Viljayfirlýsingin er um uppbyggingu sem hlýtur annars vegar að byggjast á því að skýrt sé að vatnsvernd sé í engu ógnað og hins vegar að samstaða sé hjá sveitarfélögum á höfuðborgarsvæðinu um að breyta vaxtarmörkum í svæðisskipulagi höfuðborgarsvæðisins. Þær forsendur þarf að skýra áður en lengra er haldið."

Helga Jónsdóttir

Bergljót Kristinsdóttir


Bókun:

"Vaxtarmörk höfuðborgarsvæðisins eru tilkomin vegna markmiða um aukna sjálfbærni - betri nýtingu á núverandi grunnkerfum samgangna, veitna og almannaþjónustu. Gert ráð fyrir að vaxtarmörkin dugi vel fram yfir skipulagstímabilið sem nær til ársins 2040."

Einar Örn Þorvarðarson

Sigurbjörg E. Egilsdóttir

Bókun:

"Á næstu 15 árum mun fjöldi Íslendinga yfir 65 ára aukast um 70%. Þessi breytta aldurssamsetning þjóðarinnar, þar sem fólk er heilbrigðara lengur en áður, kemur með áskorunum en um leið tækifærum. Uppbygging á íbúðum og hjúkrunarrýmum í Gunnarshólma miða að því að bjóða upp á fleiri og fjölbreyttari búsetumöguleika en nú eru til staðar og mæta ýmsum þeim áskorunum sem við stöndum frammi fyrir við öldrun þjóðar og húsnæðismálum á höfuðborgarsvæðinu.

Með viljayfirlýsingu þessari verður hafin vinna við að huga vandlega að umhverfis- og vatnsverndarmálum samhliða þeirri skipulagsvinnu sem þarf að fara fram."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Frá bæjarstjóra, lögð fram drög að viljayfirlýsingu um uppbyggingu lífsgæðakjarna.

Bæjarráð frestar málinu til næsta fundar.