Kársnesskóli - niðurstaða Gerðardóms

Lagðar fram niðurstöður gerðardóms Kárnesskóla.

Lagt fram og kynnt.

Fundarhlé hófst kl. 9:43, fundi fram haldið kl. 9:54.

Bókun:

"Með þessari niðurstöðu fæst það staðfest að vanefndir verktakans voru stórfelldar og ítrekaðar en sýnir jafnframt ótvírætt fram á að Kópavogsbær átti ekki annarra kosta völ en að rifta verksamningi við verktakann. Af hálfu Kópavogsbæjar kom ekki til greina að taka áhættu með gæði húsnæðisins og sýndi bærinn ábyrgð með því að taka þá ákvörðun að rifta verksamningnum. Var sú erfiða ákvörðun tekin til að tryggja gæði skólabyggingarinnar, samfellt skólastarf og hagsmuni bæjarbúa.

Þetta er risastór áfangi fyrir Kópavogsbæ og fyrsta skrefið í því að fá tjónið bætt að fullu."

Ásdís Kristjánsdóttir

Orri V. Hlöðversson

Hjördís Ýr Johnson

Hanna C. Jóhannsdóttir

Helga Jónsdóttir

Bergljót Kristinsdóttir

Fundarhlé hófst kl. 10:58, fundi fram haldið kl. 11:47.


Bókun:

"Það kemur skýrt fram í niðurstöðu gerðardóms að málsaðilar hafi ekki rækt þær skyldur sem koma fram í ákvæðum verksamningsins um úrlausn ágreiningsefna. Þar með var ekki reynt til þrautar að leysa úr ágreiningi á fyrri stigum með þeim úrræðum sem samið var um, með hagsmuni verksins að leiðarljósi. Það hefði Kópavogsbær átt að gera um leið og ljóst var að húsið lægi undir skemmdum til að takmarka tjónið. Mikilvægt er að Kópavogsbær dragi lærdóm af verkframkvæmdinni í heild sinni."

Theódóra S Þorsteinsdóttir


Bókun:

Niðurstaða gerðardóms er afgerandi og Kópavogsbæ í hag. Segir orðrétt í dómsniðurstöðu: „ Í skilningi 3. mgr. 12. gr. verksamnings aðila var hér um að ræða bæði stórfelldar og ítrekaðar vanefndir af hálfu varnaraðila, sem samkvæmt gögnum málsins sýndi ítrekað vilja- og getuleysi til að bæta úr viðvarandi skorti á mannaafla og bæta úr gæðafrávikunum, þótt honum hafi ítrekað verið gefinn kostur á því og krafinn um það. Í því ljósi metur gerðardómurinn það svo að sóknaraðili hafi ekki getað náð fram viðunandi niðurstöðu með öðrum og vægari vanefndaúrræðum og að tilgangslaust hafi verið fyrir sóknaraðila að setja varnaraðila frest þann til úrbóta sem um ræðir í 3. mgr. 12. gr. verksamningsins.“

Niðurstaða dómsins staðfestir án vafa að samstarf við verktakann var fullreynt, tilgangslaust að gefa frekari frest til úrbóta og eina rétta í stöðunni að slíta samstarfinu til að verja bæjarfélagið frekara tjóni og tryggja að skólastarf geti hafist sem fyrst í nýju húsi sem stenst gæðakröfur bæjarins.

Ásdís Kristjánsdóttir

Orri V. Hlöðversson

Hjördís Ýr Johnson

Hanna C. Jóhannsdóttir


Bókun:

"Í dómnum segir orðrétt „Það er mat gerðardómsins að málsaðilar hafi ekki rækt þær skyldur sem í ofangreindu felast og þar með ekki reynt til þrautar að leysa úr ágreiningsmálinu með þeim úrræðum sem þeim stóðu til boða með hagsmuni verksins að leiðarljósi.“ Þó að mat dómsins sé að riftun hafi verið lögmæt eftir langt tímabil af ágreiningi þá er ljóst af niðurstöðunni að grípa hefði mátt fyrr inn í til að leysa úr ágreiningi og koma í veg fyrir eins alvarlegt tjón og nú er orðið. Kópavogsbær þarf að draga lærdóm af þessu máli í heild sinni."

Theódóra S. Þorsteinsdóttir


Bókun:

"Bæjarfulltrúi Theódóra Þorsteinsdóttir hafnaði riftun á samningi við verktaka. Niðurstaða gerðardóms leiðir í ljós að öll ákvæði samnings til að leysa úr ágreiningi voru fullreynd og því eina rétta að rifta samningi á þeim tímapunkti sem það var gert. Kópavogsbær mun draga lærdóm af þessu máli eins og öðrum málum."

Ásdís Kristjánsdóttir

Orri V. Hlöðversson

Hjördís Ýr Johnson

Hanna C. Jóhannsdóttir


Bókun:

"Á þeim tímapunkti þegar samningnum var rift var framkvæmdin komin í óefni. Gerðardómur er alveg skýr um að Kópavogsbær vanrækti skyldur sínar samkvæmt verksamningi. Grípa hefði átt inn í miklu fyrr með vanefndarúrræðum sem samningur kveður á um. Rétt eins og dómarar tilgreindu í gerðardómi.

Undirrituð hefur meira og minna greitt atkvæði gegn eða setið hjá í þessu ferli frá upphafi vegna ýmissa efasemda og óskýrra gagna. Þá óskaði undirrituð eftir áhættumati sem leiddi í ljós helstu áhættu- og óvissuþættir verksins væru KLT (Krosslímdar timbureiningar) og eftirfylgd á framkvæmda á framkvæmdatíma."

Theódóra S. Þorsteinsdóttir