Fyrirspurn bæjarstjóra vegna bókunar á 3177. fundi bæjarráðs

Lögð fram fyrirspurn bæjarstjóra í tengslum við bókun bæjarfulltrúa á 3177. fundi bæjarráðs um stöðu gæðamála hjá Kópavogsbæ.

Umræður.

Fundarhlé hófst kl. 10:25, fundi fram haldið kl. 10:54

Bókun:

"Er varðar tilvitnun bæjarfulltrúa er ljóst að hún á rætur að rekja til minnisblaðs gæðastjóra en ekki til niðurstöðu BSI í úttektarskýrslu þeirra. Mikilvægt er að gæta nákvæmni þegar um beina tilvitnun er að ræða.



Í úttektarskýrslu BSI kemur eftirfarandi fram,

„Mælt er með áframhaldandi vottun fyrir ykkur að því gefnu að samþykkt verði fullnægjandi útbótaáætlun fyrir „lítil frábrigði“ sem er að finna í niðurstöðum þessarar skýrslu. Árangur á framkvæmd þeirra útbóta verður tekin út í næstu úttekt. Ykkur ber að greina orsök og innleiða úrbætur og umbætur til að lagfæra frábrigði fyrir næstu BSI úttekta er varða skírteinið sem frábrigðin eru skráð á.“

Ljóst er að niðurstaðan er að gæðakerfi Kópavogsbæjar uppfyllir kröfur og úttektarviðmið BSI líkt og kemur fram í úttektarskýrslunni."

Ásdís Kristjánsdóttir

Orri V. Hlöðversson

Hjördís Ýr Johnson

Elísabet B. Sveinsdóttir


Bókun:

"Undirritaðri þykir miður að bæjarstjóri finni ekki í gagnagátt jafn mikilvæg gögn og minnisblað til stjórnenda stjórnsýslu Kópavogsbæjar þar sem texti úr bókun kemur orðrétt fram. Umrætt minnisblað var eina gagnið sem var lagt fram í bæjarráði þann 12. janúar 2023 undir yfirskriftinni „Frá gæðastjóra, dags. 9.janúar 2023, lagðar fram niðurstöur á ISO 9001 vottunarúttekt sem fram fór 5-7. desember 2022“. Því hafnar undirrituð að um ónákvæmni í texta sé að ræða.

Það má minna á að gæðastjórnun snýst m.a. um að tryggja gæði í þjónustunni, takast á við og minnka áhættu og bæta skilvirkni í vinnubrögðum.

Staðan í dag er sú að stjórnendur hafa ekki skilað skýrslu til bæjarstjórnar fyrir tímabilið 2023/2024, áhættumat er ekki komið, innri úttektir liggja niðri, endurskoðun markmiða og mælingar hafa lítið verið skráðar. Eins og kemur fram í nýjum gögnum gæðastjóra þá sinna stjórnendur frábrigðum og umbótum í stjórnsýslunni lítið, sem er að mati undirritaðrar alvarlegt mál."

Theódóra S. Þorsteinsdóttir


Bókun:

"Bæjarfulltrúi fullyrðir að tilvitnunin sé tekin upp úr niðurstöðu úttektarfyrirtækisins og því eðlilegt að bæjarstjóri leitaði í úttektarskýrslunni. Tilvitnunina er ekki að finna þar."

Ásdís Kristjánsdóttir

Orri V. Hlöðversson

Hjördís Ýr Johnson

Elísabet B. Sveinsdóttir

Bókun:

"Undirrituð byggir sína bókun á þeim gögnum sem lögð voru fram í bæjarráði. Minnisblað gæðastjóra fjallar um niðurstöðu vottunarúttektar og er eina gagnið sem bæjarfulltrúar hafa undir höndum. Tilvitnunina er að finna þar."

Theódóra S. Þorsteinsdóttir