Nýbýlavegur 1. Breytt deiliskipulag.

Lögð fram til kynningar tillaga að uppbyggingu íbúðarhúsa á lóð við Nýbýlaveg 1. Tillagan er frumhönnun á reit en hugmyndir á eftir að vinna frekar. Hún felur í sér að byggð verði tvö 5-6 hæða hús, með uppbroti þar sem efri hæðir eru inndregnar. Miðað er við að kjallari fyrir bíla og geymslur verði undir húsunum. Skv. tillögunni er áætlað byggingarmagn 5.500-6.500 m² og áætlaður íbúðafjöldi 55 íbúðir en nánar á eftir að útfæra fyrirkomulag og fjölda íbúða. Í tillögu að fyrirkomulagi er gert ráð fyrir að aðkoma að lóðinni sé frá Nýbýlavegi.

Sólveig H. Jóhannsdóttir verkefnastjóri frá Klasa, Ingvi Jónasson framkvæmdastjóri Klasa og Yngvi Karl Sigurjónsson arkitekt frá Yrki gerðu grein fyrir erindinu.

Fundarhlé kl. 17:18 og fundi framhaldið kl. 18:11

Lagt fram og kynnt.

Bókun:

„Skipulags- og umhverfisráð leggur áherslu á að einungis komi til greina að vegtenging nýrrar byggðar verði frá Nýbýlavegi. Þá þarf sérstaklega að huga að umfangi og hæð húsbygginga í tengslum við nærliggjandi byggð.

Ráðið leggur til að haldinn verði íbúafundur þar sem farið verður yfir tillögur að útfærslu byggðar.“

Hjördís Ýr Johnson, Kristinn Dagur Gissurarson, Andri Steinn Hilmarsson og Gunnar Sær Ragnarsson.

Bókun:

„Það skiptir miklu máli að sú ásýnd sem blasir við þeim sem koma að Kópavogi að norðan sé aðlaðandi og bæjarfélaginu til sóma. Nýbýlavegur 1 er lóð sem er þetta aðgangshlið. Samkvæmt gildandi deiliskipulagi er gert ráð fyrir ráð fyrir húsi á 1 hæð og heimild fyrir kjallara. Grunnflötur húss fyrir utan kjallara megi vera 560 m² og hámarks flatarmál húss 1000 m². Aðkoma að lóðinni er frá Nýbýlavegi. Samkvæmt þeim hugmyndum að uppbyggingu sem hér eru kynntar er áætlað byggingarmagn íbúðarhúsnæðis 5.500-6.500 m² og áætlaður íbúðafjöldi 55. Nýjar íbúðabyggingar taka ekki mið af byggðinni sem fyrir er í Lundi. Undirrituð telja málið i alla staði vanbúið til þess að skipulagslýsing verði kynnt. Nauðsynlegt er að kalla formlega eftir afstöðu Vegagerðarinnar sem veghaldara á Nýbýlavegi enda þarf hún að samþykkja framkvæmdaleyfi. Íbúar mótmæla þeirri miklu aukningu byggingarmagns sem horft er til og þeir óskuðu formlega eftir samtali við bæinn 2023, enda eiga þeir mikilla hagsmuna að gæta. Við tökum undir þá kröfu. Málið hefur ekki fengið fullnægjandi undirbúning ef íbúum í Lundi er ekki gefinn kostur á eðlilegu samráði.“

Hákon Gunnarsson, Helga Jónsdóttir, Leó Snær Pétursson og Indriði Ingi Stefánsson.

Bókun:

„Bókun minnihlutans ætti að eiga heima við 4. dagskrárlið fundarins, sem vel að merkja var frestað. Aðkoma lóðarinnar og breytt landnotkun á lóðinni að Nýbýlavegi 1 fellur undir breytt aðalskipulag en samkvæmt núverandi aðalskipulagi er gert ráð fyrir að þar rísi bensínstöð.

Meirihlutinn telur það ekki til ama að fá inn fyrir skipulags- og umhverfisráð - til kynningar - hugmyndir lóðarhafa um uppbyggingu á lóðinni en er ekki hluti af formlegri deiliskipulagsvinnu þar sem hugmyndirnar falla ekki undir núverandi landnotkun lóðarinnar. Kynningin var því aðeins á hugmyndastigi ráðsmönnum og öðrum íbúum bæjarins til upplýsingar.

Óformlegir fundir hafa farið fram með íbúum í Lundi vegna Nýbýlavegar 1. Við vísum í fyrri bókun varðandi framhald skipulagsvinnu og samráðs við íbúa.“

Hjördís Ýr Johnson, Kristinn Dagur Gissurarson, Andri Steinn Hilmarsson og Gunnar Sær Ragnarsson.

Lagt fram erindi lóðarhafa um upphaf skipulagsvinnu vegna breytinga á aðalskipulagi og deiliskipulagi dags. 27. nóvember 2024. Í breytingunum felst að á lóðinni verði íbúðarhús í stað þjónustustöðvar/bensínstöðvar sem gert er ráð fyrir í gildandi deiliskipulagi. Erindinu fylgir minnisblað um vegtengingar frá VSÓ ráðgjöf dags. 6. nóvember 2024.

Sólveig Jóhannsdóttir skipulagsfræðingur, Smári Ólafsson samgönguverkfræðingur frá VSÓ og Yngvi Karl Sigurjónsson arkitekt hjá Yrki gerðu grein fyrir erindinu.

Skipulagsráð samþykkti með fimm atkvæðum Hjördísar Ý. Johnson, Kristins D. Gissurarsonar, Andra S. Hilmarssonar, Gunnars S. Ragnarssonar og Hákonar Gunnarssonar gegn atkvæðum Theódóru S. Þorsteinsdóttur og Helgu Jónsdóttur að hafin verði vinna við gerð breytingar á aðalskipulagi og deiliskipulagi fyrir ofangreinda lóð.

Bókun:

„Undirrituð telur að sömu forsendur eigi við og komu fram í erindi frá Vegagerðinni 2017 um ómögulegt aðgengi frá Nýbýlavegi. Áður en samtal um framtíðarþróun lóðarinnar á sér stað þyrfti að fá staðfestingu á aðgengi inn á lóðina.“

Theodóra S. Þorsteinsdóttir

Bókun:

„Undirrituð telur mikilvægt að framkvæmdaraðili sem óskar heimildar til að vinna sjálfur að gerð deiliskipulags leggi fyrir skýrar hugmyndir um útfærslu. Jafnframt er óskað staðfestingar Vegagerðarinnar sem veghaldara á því að vegtengingar lóðarinnar við Nýbýlaveg séu ásættanlegar.“

Helga Jónsdóttir.