Bæjarráð - 3202. fundur frá 30.01.2025

Fundargerð í 16 liðum.

Lagt fram.

Bókun vegna 9. liðar fundargerðar bæjarráðs.

,,Það er Kópavogsbæ til vansa að senda mál af þessari stærðargráðu til svæðisskipulagsnefndar án þess að kalla fyrst eftir ráðgjöf frá viðeigandi sérfræðingum. Þess í stað fylgja einungis gögn sem fjárfestar og sérhagsmunaaðilar hafa látið útbúa.

Meirihlutinn hefur nú ítrekað hafnað því að afla frekari upplýsinga, þvert á fagleg vinnubrögð og almenna skynsemi. Þessi nálgun dregur úr trúverðugleika skipulagsferlisins og veikir grundvöll upplýstrar ákvarðanatöku. Þeir sem fara með valdið í þessu máli virðast óttast að óháð sjónarmið komi í ljós. Hvað er það sem má ekki skoða?

Við í minnihlutanum teljum það grundvallarskyldu bæjarfulltrúa að tryggja vandaða og gagnsæja undirbúningsvinnu áður en skipulagslýsing er send áfram til svæðisskipulagsnefndar. Það felur í sér að afla álits sérfræðinga, gera nauðsynlegt áhættumat frá sjónarhóli Kópavogsbæjar og tryggja að skipulagslýsingin sé byggð á traustum gögnum, frekar en einhliða upplýsingum frá fjárfestum."

Sigurbjörg Erla Egilsdóttir

Theodóra S. Þorsteinsdóttir

Bergljót Kristinsdóttir

Helga Jónsdóttir

Helga Þórólfsdóttir


,,Grundvallarforsenda fyrir uppbyggingu í Gunnarshólma er að vatnsvernd verði tryggð. Að mati meirihlutans er eðlilegt að kallað verði eftir umsögnum frá ólíkum hagsmunaaðilum og sérfræðingum á vettvangi svæðisskipulagsnefndar. Þær umsagnir munu jafnframt fylgja ef og þegar málið kemur aftur fyrir bæjarstjórn Kópavogs. Þetta hefur ítrekað komið fram í máli og bókunum meirihlutans og verður enginn afsláttur gefinn af þessum sjónarmiðum í vinnunni framundan."

Ásdís Kristjánsdóttir

Orri Hlöðversson

Andri Steinn Hilmarsson

Björg Baldursdóttir

Hanna Carla Jóhannsdóttir

2401538 - Gunnarshólmi. Breytt svæðisskipulag. Vaxtarmörk.

Á fundi bæjarráðs þann 23.01.2025 var lögð fram svohljóðandi tillaga undir máli nr. 7 í fundargerð skipulags- og umhverfisnefndar:

"Undirrituð óskar eftir umsögn frá eftirfarandi aðilum er varðar Gunnarshólma (breytt svæðisskipulag) úr fundargerð skipulags-og umhverfisráðs.

Veðurstofu Íslands

Svæðisskipulagsstjóra Höfuðborgarsvæðisins

Skipulagsfulltrúa Kópavogsbæjar

Theódóra S. Þorsteinsdóttir.

Bæjarráð samþykkir að frestar tillögunni til næsta fundar með þremur atkvæðum gegn atkvæðum Theódóru S. Þorsteinsdóttur og Kolbeins Reginssonar.

Fundarhlé hófst kl. 9:21, fundi fram haldið kl. 10:19

Bæjarráð hafnar tillögunni með þremur atkvæðum, gegn atkvæðum Theódóru S. Þorsteinsdóttur og Kolbeins Reginssonar.

Bókun:

"Aftur hafnar meirihluti Sjálfstæðisflokks og Framsóknarflokks bæjarfulltrúa um umsögn í máli þar sem óskað er eftir sjónarmiðum áður en ákvörðun er tekin. Með því að hafna ósk um umsögn frá ólíkum aðilum er meirihlutinn að stuðla að því að málið fari til umfjöllunar einungis með gögn frá sérhagsmunaaðilum."

Bergljót Kristinsdóttir

Theódóra S. Þorsteinsdóttir

Sigurbjörg E. Egilsdóttir

Kolbeinn Reginsson

Bókun:

"Bókun minnihlutans lýsir vanþekkingu á skipulagsferlinu. Til þess að kalla megi eftir umsögnum hagaðila þarf málið að fara fyrir svæðisskipulagsnefnd og samþykkja þarf að auglýsa skipulagslýsinguna. Aðkoma sérfræðinga, hagaðila og almennings er tryggð í auglýsingaferlinu lögum samkvæmt. Það felur í sér víðtækari og upplýstari umræðu sem styður við vandaða ákvörðunartöku í málinu."

Ásdís Kristjánsdóttir

Hjördís Ýr Johnson

Andri Steinn Hilmarsson

Björg Baldursdóttir

Bókun:

"Undirrituð vísa ásöknum um vanþekkingu á bug og eru fullkomlega meðvituð um að formleg aðkoma hagaðila, sérfræðinga og almennings sé tryggð í auglýsingaferlinu, í samræmi við lög og reglur um skipulagsmál.

Hins vegar telja undirrituð eðlilegt og ábyrgðarfullt að afla upplýsinga og sjónarmiða áður en málið fer til afgreiðslu í svæðisskipulagsnefnd. Slíkt stuðlar að vandaðri ákvarðanatöku og tryggir að við, sem sitjum í bæjarstjórn, höfum nægjanleg gögn til að meta áhrif tillögunnar áður en hún er send í formlegt ferli. Það er hvorki fordæmislaust né óeðlilegt að óska eftir faglegri ráðgjöf áður en formleg umsagnarferli hefjast.

Ef markmiðið er að taka upplýsta og vel rökstudda ákvörðun, ættum við að fagna frekari gögnum og sjónarmiðum, fremur en að líta á þau sem óþarfa inngrip í ferlið.

Nýverið voru nýjar siðareglur límdar upp á vegg í bæjarstjórnarsalnum. Í fyrstu grein segir að bæjarfulltrúar starfi í þágu allra Kópavogsbúa með opnu samtali, virku upplýsingaflæði og hlusti á ólík sjónarmið. Undirrituð sakna þess að meirihlutinn virði nýjar siðareglur. "

Bergljót Kristinsdóttir

Theódóra S. Þorsteinsdóttir

Sigurbjörg E. Egilsdóttir

Kolbeinn Reginsson

Bókun:

"Það eru vonbrigði að sjá nálgun minnihlutans á þetta mál. Kópavogsbær er að fylgja lögbundnu skipulagsferli sem tryggir aðkomu ólíkra sjónarmiða eins og rakið er betur í fyrri bókun meirihlutans."

Ásdís Kristjánsdóttir

Hjördís Ýr Johnson

Andri Steinn Hilmarsson

Björg Baldursdóttir