Þóknun áheyrnarfulltrúa í nefndum og ráðum

Frá bæjarstjóra, dags. 6. janúar 2025, lögð fram tillaga að þóknun áheyrnarfulltrúa í nefndum og ráðum Kópavogsbæjar.

Bæjarstjórn samþykkir tillögu bæjarstjóra um þóknun áheyrnarfulltrúa í nefndum og ráðum bæjarins með 8 atkvæðum gegn atkvæðum Theódóru S. Þorsteinsdóttur og Bergljótar Kristinsdóttur og hjásetu Sigurbjargar E. Egilsdóttur.


Viðaukatillaga 1 við erindi nr. 7 frá fundi bæjarráðs nr. 3200 frá 9. janúar, um þóknun áheyrnarfulltrúa í nefndum og ráðum:

Undirrituð leggur til að laun bæjarstjóra og þóknun nefndarfulltrúa í nefndum og ráðum fari í heildarendurskoðun með lækkun í huga.



Greinargerð: Þegar laun nefndarfulltrúa voru hækkuð á sínum tíma var gert ráð fyrir auknu starfshlutfalli í ráðum til þess að sinna aukinni vinnuskyldu í tengslum við stefnumótun Kópavogsbæjar. Það hefur ekki raungerst.

Það er óskiljanlegt að bæjarstjóri leggi hér einungis til að lækka þóknun áheyrnarfulltrúa í nefndum og ráðum Kópavogsbæjar, stöður sem tilheyra eingöngu minnihlutanum.

Engin rök fylgja tillögu bæjarstjóra sem réttlætir slíka lækkun. Þvert á móti þá mun vinna þeirra og ábyrgð aukast þar sem tillögu - og bókanaréttur sem búið er að taka af áheyrnarfulltrúum í nefndum og ráðum mun færast inn í bæjarráð. Óhjákvæmilegt er að aukin vinna fylgi því að koma tillögum og bókunum til fulltrúa sinna í bæjarráði og nýta sína fagþekkingu úr nefndarstörfum til þess að fylgja eftir málum á öðrum vettvangi en í viðkomandi nefnd.

Theódóra S. Þorsteinsdóttir

Bæjarstjórn hafnar viðaukatillögunni með 6 atkvæðum gegn atkvæðum Theódóru S. Þorsteinsdóttur og Sigurbjargar E. Egilsdóttur og hjásetu Kolbeins Reginssonar, Thelmu Árnadóttur og Bergljótar Kristinsdóttur.


Viðaukatillaga 2:

Meirihlutinn leggur til að bæjarritara verið falið að gera samanburð við önnur sambærileg sveitarfélög á launum bæjarstjóra og nefndarmanna. Sá samanburður ætti að liggja fyrir áður en frekari umræður fara fram um hugsanlega endurskoðun og er nauðsynlegur til að tryggja að kjör séu í samræmi við ábyrgð og umfang verkefna.

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Elísabet Sveinsdóttir

Björg Baldursdóttir

Bæjarstórn samþykkir viðaukatillöguna með 6 atkvæðum og hjásetu Theódóru S. Þorsteinsdóttur, Sigurbjargar E. Egilsdóttur, Kolbeins Reginssonar, Thelmu B. Árnadóttur og Bergljótar Kristinsdóttur.


Bókun:

Tillagan um lækkun launa áheyrnarfulltrúa byggir á niðurstöðu vinnufunda bæjarfulltrúa við endurskoðun bæjarmálasamþykktar. Áheyrnarfulltrúar í nefndum og ráðum gegna mikilvægu hlutverki en staða þeirra er ólík stöðu aðalfulltrúa, bæði hvað varðar ábyrgð og valdsvið. Áheyrnarfulltrúar hafa ekki sömu skyldur til ákvörðunartöku og bera ekki sömu lagalegu og stjórnsýslulegu ábyrgð og aðalfulltrúar. Þóknanir og laun eiga að endurspegla eðli, umfang og ábyrgð starfsins og að mati meirihlutans er því eðlilegt að samþykkja þær breytingar sem hér eru lagðar til.

Tillagan er hógvær og gerir ráð fyrir að áheyrnarfulltrúar í bæjarráði haldi 100% af launum aðalmanna, í ráðum hafi þeir 90% af launum aðalmanna og í öðrum nefndum 65% af launum aðalmanna. Í sveitarfélögum sem eru sambærileg Kópavogsbæ að umfangi er almennt viðhöfð sú regla að ekki séu áheyrnarfulltrúar í nefndum.

Rétt er að halda til haga að kostnaður við nefndakerfi Kópavogsbæjar hefur lækkað umtalsvert á kjörtímabilinu. Þar munar mestu um fækkun nefndafunda, þar sem greitt er fyrir setinn fund án þess að verkefnum nefndanna hafi verið breytt, og jafnframt afsöluðu bæjarfulltrúar og bæjarstjóri sér launahækkun fyrr á kjörtímabilinu.

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Elísabet Sveinsdóttir

Björg Baldursdóttir

Frá bæjarstjóra, dags. 6. janúar 2025, lögð fram tillaga að þóknun áheyrnarfulltrúa í nefndum og ráðum Kópavogsbæjar.

Bæjarráðs samþykkir með fiórum atkvæðum og hjásetu Jóhönnu Pálsdóttur að vísa málinu til afgreiðslu bæjarstjórnar.