Skipulags- og umhverfisráð - 12. fundur frá 18.08.2025

Fundargerð í átta liðum.

Lagt fram.

Fundargerð í átta liðum.

Lagt fram.

Bókun undir liðum 2, 3 og 4 í fundargerð umhverfis- og skipulagsráðs:

„Á fundi bæjarráðs 8. maí 2025 fól meirihlutinn bæjarstjóra að undirbúa málssókn gegn ríkinu. Málssókn til að fá hnekkt úrskurði innviðaráðuneytisins um ógildingu lóðaúthlutana við Roðahvarf. Á fundinum bókuðu fulltrúar Vina Kópavogs, Viðreisnar, Samfylkingar og Pírata kröfu um að bæjarráð, sem hefur lögbundið eftirlit með stjórnsýslunni, fengi öll gögn málsins á næsta fundi, þ.m.t. fundargerðir og minnispunkta frá störfum úthlutunarnefndar. Bæjarstjóri hefur á mánuðunum sem síðan eru liðnir hvorki lagt gögn málsins né upplýsingar um málssókn fyrir bæjarráð. Í þessu máli skiptir öllu að fá niðurstöðu sem fyrst. Varhugavert er fyrir Kópavogsbæ að virða að vettugi úrskurð innviðaráðuneytisins og halda áfram eins og ekkert hafi í skorist í samskiptum við þá sem byggja rétt sinn á úthlutun sem æðri stjórnvöld hafa ógilt. Það er ámælisvert að bæjarstjóri dragi að fá lyktir í málið og ekki síður að hún leggi ekki fyrir bæjarráðið gögn, sem það á skilyrðislausan rétt til.

Jafnframt vekjum við athygli á bókun fulltrúa undirritaðra framboða undir tilvitnuðum málum í umhverfis- og skipulagsráði.“

Helga Jónsdóttir Vinum Kópavogs

Jóhanna Pálsdóttir, Viðreisn

Sigurbjörg Erla Egilsdóttir Pírötum

Hákon Gunnarsson Samfylkingu


Bókun:

Á fundi skipulags- og umhverfisráðs var staðfest að framsett byggingaráform samræmdust deiliskipulagi.

Meirihlutinn ítrekar að ákvörðun um að höfða mál vegna úrskurðar innviðaráðuneytisins var tekin að undangengnu áliti lögmanns bæjarins þar sem bent var á verulega annmarka á úrskurðinum. Vinna við málshöfðunina er í hefðbundnu ferli. Með málshöfðun er ekki verið að „virða að vettugi“ úrskurð ráðuneytisins heldur að nýta þann rétt sem sveitarfélagið hefur til að fá úrlausn dómstóla í málinu.

Meirihlutinn leggur áherslu á að bæjarráð verði upplýst með gagnsæjum hætti um framgang málsins en hafnar alfarið ásökunum um að upplýsingum hafi verið haldið frá bæjarráði.

Hjördís Ýr Johnson

Andri Steinn Hilmarsson

Björg Baldursdóttir


Bókun:

Fulltrúar framboðanna sem standa utan meirihlutasamstarfs eru endurtekið leyndir upplýsingum sem bæjarráð á að fá til meðferðar og ákvörðunar.  Ekki þarf frekari vitnanna við en að engin vitneskja var í okkar hópi um athugasemdir við lóðaúthlutanir í Roðahvarfi fyrr en úrskurður innviðaráðuneytisins var lagður fram eins og þruma úr heiðskíru lofti með minnisblaði, sem bæjarstjóri hafði aflað hjá aðkeyptum lögmanni.  Beiðni okkar um upplýsingar um málið kom fram á fundinum 8. maí.  Engin viðbrögð hafa borist og bæjarstjóri hefur ekkert upplýst um undirbúning dómsmáls sem átti að fá flýtimeðferð.

Helga Jónsdóttir Vinum Kópavogs

Jóhanna Pálsdóttir, Viðreisn

Sigurbjörg Erla Egilsdóttir Pírötum

Hákon Gunnarsson Samfylkingu