Bréf til bæjarstjórnar Kópavogs - aukaspurningar varðandi fyrirhugaðar breytingar á Traðar- og Fannborgarreitnum

Frá umhverfissviði, dags. 29.08.2025, lagt fram svar við erindi íbúa í Hamraborg 32, dags. 30. júní og 10. ágúst 2025, vegna fyrirhugaðra framkvæmda á Fannborgarreit og Traðarreit-vestri.

Lagt fram.

Bókun:

Því miður er margt jafnóljóst eftir svarið og fyrir. Svör stjórnsýslunnar við einstökum spurningum íbúanna hljóta að vekja viðbrögð okkar. Til dæmis

Sagt er: Í þéttbýli mega íbúar gera ráð fyrir að upp komi aðstæður, s.s. vegna framkvæmda sem valdi tímabundnu raski og óþægindum. Við framkvæmdir er reynt eftir fremsta megni að halda ónæði og raski í lágmarki. Þá er framkvæmdaraðilum skylt að fara eftir öllum gildandi lögum og reglum er varða framkvæmdir af þessu tagi.

Við hljótum að spyrja hvort íbúar sem eignuðust íbúðir í grónu hverfi í Hamraborg, Fannborg og nágrenni gátu fyrirfram gert ráð fyrir þeim stórkarlalegu sprengingum og framkvæmdum, sem standa eiga upp við húsveggi í miðju hverfisins um langt árabil? Svar okkar er NEI. Við teljum bæinn ganga langt yfir þau mörk í framkvæmdum sem nokkur hópur íbúa á að þurfa að sætta sig við og getur búið sig undir. Það er lögmætt markmið að byggja upp miðbæ en meðalhófsregla stjórnsýslulaganna takmarkar hvað hægt er að leggja miklar byrðar á afmarkaðan hóp íbúa til að ná því markmiði. Hér fer því fjarri að meðalhófs sé gætt.

Sagt er: Framkvæmdir af þessari stærðargráðu eru ekki óalgengar og hafa m.a. átt sér stað sambærilegar framkvæmdir í nágrannalöndum sem og nágrannasveitarfélögum. Í þéttbýli má almennt vænta þess að upp geti komið tímabil þar sem slíkt rask á sér stað. Við köllum eftir dæmunum um sambærilegar framkvæmdir í nágrannalöndum og nágrannasveitarfélögum sem vísað er til. Við könnumst ekki við nein slík dæmi og teljum óhjákvæmilegt að þekkja þau.

Helga Jónsdóttir

Einar Örn Þorvarðarson

Bergljót Kristinsdóttir

Sigurbjörg Erla Egilsdóttir

Bókun:

Áform um endurskipulag miðbæjarsvæðis nánar tiltekið Fannborgarreits hófst árið 2017 og eru í samræmi við sameiginlega stefnu sveitarfélaga á höfuðborgarsvæðinu sem kemur fram í svæðisskipulagi, samþykkt var í júní 2015. Gildandi skipulag tók gildi á síðasta kjörtímabili og eftir því er unnið. Með áherslu á betri nýtingu lands er óhjákvæmilegt að það verði rask í þéttbýli eins og á við um til dæmis Traðarreit eystri, Heklureitinn, Lýsisreitur á Granda og Hverfisgötu. Verkefni allra sem að Fannborgarverkefninu koma er að lágmarka óþægindi á framkvæmdatíma.

Ásdís Kristjánsdóttir

Orri Vignir Hlöðversson

Hjördís Ýr Johnson

Elísabet Sveinsdóttir

Orri Vignir Hlöðversson víkur af fundi kl. 10:25.

Hjördís Ýr Johnson tekur sæti formanns á fundinum.

Frá íbúum í Hamraborg 32, dags. 10.08.2025, lagt fram erindi þar sem óskað er eftir upplýsingum frá Kópavogsbæ vegna Traðar- og Fannborgarreits.

Fundarhlé hófst kl. 9:29, fundi fram haldið kl. 11:01

Umræður.

Bæjarráð samþykkir að vísa erindinu til umsagnar sviðsstjóra umhverfissviðs.


Bókun:

Við teljum það lítilsvirðandi gagnvart íbúum að réttmætum áhyggjum þeirra sé ekki svarað með eðlilegum málshraða. Ítrekaður dráttur á upplýsingagjöf og ófullnægjandi svör bera vitni um kerfisbundinn skort á gagnsæi og virðingu fyrir íbúum. Slíkt vinnulag er óásættanlegt í málefnum sem varða jafn mikilvæg hagsmunamál og skipulag í miðbæ Kópavogs. Við leggjum ríka áherslu á að öllum þeim spurningum sem fram hafa komið frá íbúum og hagsmunaaðilum verði svarað án frekari dráttar.

Helga Jónsdóttir Vinum Kópavogs

Jóhanna Pálsdóttir, Viðreisn

Sigurbjörg Erla Egilsdóttir Pírötum

Hákon Gunnarsson Samfylkingu


Bókun:

„Allt frá því að Kópavogsbær gerði hörmulegan kaupsamning við lóðarhafa á Fannborgarreit 2,4 og 6 þann 10. maí 2018 hafa skipulagsmál í miðbæ Kópavogs verið í algerum ólestri. Fyrsta hugmynd verktakans um framtíð miðbæjarins varð grunnur að framtíðarskipulagi miðbæjarins.

Síðan eru liðin meira en 7 ár. Ekkert samráðsferli hefur átt sér stað við ólíka hagsmunaaðila um mótun aðlaðandi miðbæjar í Kópavogi.

Upplýsingagjöf og samtal við íbúa hefur verið í algeru skötulíki. Bæjarstjóri hefur sagt að það hafi ekki verið tímabært að veita upplýsingar um fyrirætlanir bæjaryfirvalda þar sem ekki var vilji til að skapa „upplýsingaóreiðu“ eins og það var kallað. Þær spurningar sem lagðar eru fram á fundi bæjarráðs þann 21. ágúst af íbúum í Fannborg og Hamraborg eru þess eðlis að auðvelt er að veita þær upplýsingar, engin þessara spurninga getur valdið „upplýsingaóreiðu“. Kópavogsbær þarf að gerbreyta vinnulagi sínu varðandi uppbyggingu í miðbæ Kópavogs“

Hákon Gunnarsson Samfylkingu


Bókun:

Samkvæmt upplýsingum meirihlutans er svarið í vinnslu og mun berast á næstu dögum. Spurningarnar eru í mörgum liðum og beinast að mörgum ólíkum aðilum og því tekur tíma að safna saman svörum, sér í lagi yfir hásumarileyfistíma Íslendinga. Haldnir hafa verið upplýsingafundir þar sem farið var yfir hvernig upplýsingagjöf verður háttað á framkvæmdatíma. Þar kom meðal annars fram að upplýsingafundir verða fyrir hvern fasa framkvæmda, heimasíða með öllum helstu upplýsingum verður aðgengilega, skipaður verður samskiptahópur með fulltrúum Kópavogsbæjar og framkvæmdaaðila til að tryggja góða samskipti við íbúa á svæðinu. Þá er rétt að minna á að byggingarleyfi hefur ekki verið gefið út.

Hjördís Ýr Johnson

Andri S. Hilmarsson

Björg Baldursdóttir