Hæðarhvarf 14. Beiðni um skil á lóð

Frá umhverfissviði, dags. 25.08.2026, lagt fram erindi varðandi skil á lóðinni Hæðarhvarfi 14.

Bæjarráð samþykkir með fimm atkvæðum framlagt erindi um skil á lóðinni að Hæðarhvarfi 14 og veitir heimild til að auglýsa lóðina aftur til úthlutunar í samræmi við 3. gr. reglna um úthlutun lóða í Kópavogsbæ.

Fundarhlé hófst kl. 8:33, fundi fram haldið kl. 9:17.

Bókun:

"Það er orðið verulega brýnt að vandkvæði við framkvæmd á úthlutun lóða í Vatnsendahvarfi fái úrlausn. Enn á ný er lóðarhafi að óska eftir skilum á lóðum og veit undirritaður til þess að fleiri lóðarhafar á svæðinu eru að meta stöðu sína. Greiðsla byggingarréttargjalds fór fram við samþykkt úthlutunar í maí 2025 og hafa atorkusamir Kópavogsbúar lagt inn fé, í mörgum tilfellum lánsfé sem ber háa vexti, til bæjarins án þess að fá neitt fyrir. Þessir Kópavogsbúar sjá nú sumir sem sinn besta kost að fara fram á skil lóðarinnar og fá þá eingöngu til baka greidda fjárhæð, vaxta- og verðbótalaust, meira en ári síðar.

Heimildum ber öllum saman um samskipta- og samráðsleysi bæjarins. Engar upplýsingar veittar, engin tilkynning um seinkun og engar upplýsingar um hvenær væri hægt að byggja. Vinnubrögðum bæjarins er iðulega lýst sem miklum vonbrigðum.

Frá því að málið var síðast til umfjöllunar bæjarráðs um miðbik júní virðist lítið hafa breyst og engin lausn í sjónmáli. Stíga þarf fast til jarðar og leysa þessa stöðu, sem og að meta hvort ekki sé rétt að bærinn biðji viðkomandi lóðarhafa afsökunar."

Jónas Már Torfason

María Ellen Steingrímsdóttir


Bókun:

"Miðflokkurinn lýsir enn á ný yfir áhyggjum sínum er snúa að framkvæmdum í Kópavogi. Hér er annarri lóð skilað í Vatnsendahvarfi á stuttum tíma og má vænta að enn fleiri lóðum verði skilað.

Þó efnahagsástandið spili inn í þá heyrum við í Miðflokknum frá mörgum óánægðum lóðarhöfum í tengslum við upplýsingagjöf og seinagang í stjórnsýslunni.

Miðflokkurinn vill enn á ný undirstrika mikilvægi óháðrar stjórnsýsluúttektar á umhverfissviði bæjarins og vill fá svör hvenær megi vænta umsagnar bæjarstjóra um hana."

Nína Berglind Sigurgeirsdóttir


Bókun:

"Meirihlutinn tekur undir mikilvægi þess að áætlanir standist og upplýsingagjöf til lóðarhafa sé skýr og regluleg um stöðu mála. Efnahagsumhverfið hefur breyst frá því að lóðum var úthlutað, vextir hafa hækkað og erfiðleikar við fjármögnun geta haft þau áhrif á ákvarðanir einstaklinga og fyrirtækja að einhverjir endurmeti áform sín og skili lóðum. Ekki er því rétt að rekja öll slík skil sjálfkrafa til stjórnsýslu eða framkvæmda Kópavogsbæjar."

Andri Steinn Hilmarsson

Orri Hlöðversson

Hjördís Ýr Johnson


Bókun:

"Áhyggjuraddir hafa heyrst í máli þessu í fleiri mánuði og hafa verið ræddar í bæjarstjórn og bæjarráði margsinnis. Núverandi staða efnahagsmála er auðsjáanlega ekki til þess fallin að hjálpa lóðarhöfum en þetta er í fyrsta sinn sem það er dregið fram sem ástæða fyrir óánægju lóðarhafa með framkvæmd úthlutunar, samskipti og upplýsingagjöf frá bænum, sem hefur verið viðvarandi um margra mánaða skeið."

Jónas Már Torfason

Nína Berglind Sigurgeirsdóttir

María Ellen Steingrímsdóttir