Útboð framkvæmda við Fagralund og Kópavogsvöll

Frá sviðsstjóra umhverfissviðs, dags. 22. maí, lagt fram erindi er varðar gervigras á Kópavogsvöll og völl við Fagralund.

Bæjarráð samþykkir eirindið með fimm atkvæðum.

Frá sviðsstjóra stjórnsýslusviðs, menntasviðs og umhverfissviðs, dags. 18.apríl, lögð fram greinargerð um gervigras á Kópavogsvöll og tillögur m.a. um að lagt verði gervigras á Kópavogsvöll næsta vor og að keppnis- og æfingaaðstaða frjálsra íþrótta verði byggð upp á kastsvæði vestan áhorfendastúku Kópavogsvallar.

Pétur Hrafn Sigurðsson lagði fram eftirfarandi afgreiðslutillögu:

"Ég óska eftir frestun á ákvörðun á málinu í eina viku milli bæjarráðsfunda og að upplýsingar verði lagðar fram á næsta bæjarráðsfundi um hvort þurfi viðauka við núverandi fjárhagsáætlun og þá hver sú upphæð gæti verið.

Pétur Hrafn Sigurðsson"

Tillaga um frestun var felld með þremur atkvæðum þeirra Theódóru Þorsteinsdóttur, Karenar Halldórsdóttur og Guðmundar Geirdal en Pétur Hrafn Sigurðsson og Kristinn Dagur Gissurarson greiddu atkvæði með tillögunni.

Hlé var gert á fundi kl. 8:45. Fundi var fram haldið kl. 8:55.

Framlögð tillaga um gervigras á Kópavogsvöll, uppbyggingu keppnis- og æfingasvæðis fyrir frjálsrar íþróttir og endurnýjun gervigrass á Fagralundi var samþykkt með fimm atkvæðum.

Fulltrúar minnihluta lögðu fram eftirfarandi bókun:

"Við styðjum fyrirhugaða uppbyggingu á gervigrasvelli á Kópavogsvelli. Við lýsum hinsvegar vonbrigðum með að ekki skuli hafa verið fallist á frestunartillögu um eina viku. Það að fá upplýsingar um áætlaðan kostnað sem til fellur á þessu ári er í samræmi við ábyrga fjármálastjórnun.

Pétur Hrafn Sigurðsson, Kristinn Dagur Gissurarson, Margrét Júlía Rafnsdóttir"

Fulltrúar meirihluta lögðu fram eftirfarandi bókun:

"Fyrir liggur ítarleg kostnaðaráætlun tveggja verkfræðistofa þar sem farið er yfir alla verkþætti við framkvæmdir við Smárann og Fagralund þar sem ólíkir valkostir voru bornir saman. Jafnframt er ljóst að í fjárhagsáætlun þessa árs er gert ráð fyrir viðhaldsframkvæmdum á gervigrasvelli við Fagralund. Samþykkt bæjarráðs byggir á þessari vinnu og ljóst að framkvæmdir næsta árs þarf að taka inn í fjárhagsáætlun fyrir árið 2019.

Thedóra Þorsteinsdóttir, Ármann Kr. Ólafsson, Karen Halldórsdóttir, Guðmundur Geirdal"

Staða málsins kynnt. Bæjarráð í morgun: Greinargerð sviðsstjóra stjórnsýslusviðs, menntasviðs og umhverfissviðs, dags. 18.apríl, um gervigras á Kópavogsvöll og tillögur m.a. um að lagt verði gervigras á Kópavogsvöll næsta vor og að keppnis- og æfingaaðstaða frjálsra íþrótta verði byggð upp á kastsvæði vestan áhorfendastúku Kópavogsvallar lögð fram .

Framlögð tillaga um gervigras á Kópavogsvöll, uppbyggingu keppnis- og æfingasvæðis fyrir frjálsrar íþróttir og endurnýjun gervigrass á Fagralundi var samþykkt með fimm atkvæðum.

Starfsmenn menntasviðs gerðu grein fyrir þeirri vinnu sem fram hefur farið á undanförnum vikum varðandi endurbætur á aðstöðu fyrir knattspyrnudeild og frjálsíþróttadeild Breiðabliks og niðurstöðu þessa máls á fundi bæjarráðs fyrr í dag.

Frá starfshópi sviðsstjóra stjórnsýslu-, mennta- og umhverfissviðs, dags. 6. mars, lögð fram umsögn til bæjarráðs um erindi Breiðabliks um ósk um að nýr gervigrasvöllur verði byggður vestan við Fífuna. Helstu tillögur eru að gervigras í Fagralundi verði endurnýjað og upphitað, gervigrasvöllur við Kór verði flóðlýstur og hitakerfi tengt og við endurnýjun Kópavogsvallar verði lagt mat á kosti þess að leggja gervigras á völlinn.

Hlé var gert kl. 9:15. Fundi var fram haldið kl. 9:18.

Fulltrúar meirihluta Sjálfstæðisflokks og Bjartrar framtíðar lögðu fram eftirfarandi tillögu:

"Fyrir liggur umsögn starfsmanna Kópavogsbæjar þar sem fram kemur að Kópavogsvöllur, sem er frá árinu 1974, er kominn á tíma og þarfnast endurnýjunar. Á grundvelli upplýsinga sem kemur fram í umsögninni óskar bæjarráð eftir nánari greiningu á kostum og göllum þess að leggja gervigras á Kópavogsvöll. Komi til þess að völlurinn verði lagður gervigrasi við þá endurnýjun hefur vetraraðstaða iðkenda Breiðabliks verið bætt með sambærilegum hætti og með byggingu nýs vallar vestan við Fífu. Þá er sá kostur jafnframt hagkvæmur fyrir Kópavogsbæ þar sem stofn- og rekstrarkostnaður við Kópavogsvöll sparast.



Með vísað til niðurstöðu úttektar VSÓ á aðstöðu Breiðabliks, sem unnin var fyrir Kópavogsbæ, þá er afar brýnt að bæta aðstöðu iðkenda félagsins. Bæjarráð leggur því til nánari greiningu á kostum og göllum þess að leggja völlin gervigrasi. Niðurstaða þeirrar vinnu skal liggja fyrir í apríl mánuði. Haft verði samráð við Breiðablik um þessa greinargerð.

Theódóra Þorsteinsdóttir, Ármann Kr. Ólafsson, Karen Halldórsdóttir, Hjördís Ýr Johnson"

Fulltrúar Samfylkingar og Framsóknarflokks lögðu fram eftirfarandi tillögu ásamt greinargerð:

"Undirritaðir leggja til að bæjarráð samþykki breytingu á fjárhagsáætlun Kópavogsbæjar fyrir árið 2018. Breytingin felur í sér að veita þeim 140 milljónum, sem eru í fjárhagsáætlun Kópavogsbæjar til endurnýjunar á gervigrasvelli við Fagralund, til byggingar á nýjum upphituðum og upplýstum gervigrasvelli vestanmegin við Fífuna samkvæmt þeirri tillögu sem Breiðablik hefur lagt fram.

Pétur Hrafn Sigurðsson, Birkir Jón Jónsson"

Arnþór Sigurðsson lagði fram eftirfarandi bókun:

"Það er brýnt að leita leiða til þessa að Knattspyrnudeild Breiðabliks geti nýtt þau mannvirki sem fyrir eru fyrir iðkun í Kór, Fargralundi og með lagningu gervigrass á Kópavogsvöll.

Það skýtur hinsvegar skökku við og kemur verulega á óvart að stjórn Breiðabliks vilji byggja nýjan völl vestan við Fífuna og koma þannig í veg fyrir þann möguleika að byggja frjálsíþróttahús sunnan megin við Fífuna eins og Frjálsíþróttadeild Breiðabliks hefur kynnt og óskað eftir að verð byggt enda aðstaða frjálsra íþrótta innahúss afar bágborin svo vægt sé til orða tekið.

Arnþór Sigurðsson"

Tillaga meirihluta bæjarráðs var samþykkt með þremur samhljóða atkvæðum. Pétur Hrafn Sigurðsson og Birkir Jón Jónsson greiddu ekki atkvæði. Arnþór Sigurðsson, áheyrnarfulltrúi, óskaði fært til bókar að hann styddi tillögu meirihlutans.

Ármann Kr. Ólafsson, bæjarstjóri, lagði til að afgreiðslu á tillögu minnihlutans verði frestað og lagði fram eftirfarandi bókun:

"Ekki er tímabært að taka afstöðu til þessarar tillögu.

Ármann Kr. Ólafsson"

Hlé var gert á fundi kl. 9:38. Fundi var fram haldið kl. 9:42.

Pétur Hrafn Sigurðsson og Birkir Jón Jónsson lögðu fram eftirfarandi bókun:

"Lýsum yfir óánægju með vinnubrögð meirihlutans í málinu. Vilji Breiðabliks liggur skýrt fyrir og hér er verið að reka hreina tafapólitík. Það liggur á að leysa málið svo hægt verði að koma aðstöðumálum knattspyrnudeildar Breiðabliks í þokkalegt horf fyrir næsta vetur.

Pétur Hrafn Sigurðsson, Birkir Jón Jónsson"

Hlé var gert á fundi kl. 9:45. Fundi var fram haldið kl. 10:05.

Fulltrúar meirihluta Sjálfstæðisflokks og Bjartrar framtíðar lögðu fram eftirfarandi bókun:

"Þrátt fyrir að 140 m.kr yrðu færðar til í fjárhagsáætlun þá myndi sú upphæð ekki duga til að gera nýjan, upphitaðan gervigrasvöll með flóðlýsingu. Mikilvægt er að skoða alla valkosti til hlítar til að tryggja vandaða ákvarðanatöku enda hvíla þær skyldur á bæjarfulltrúum. Málið hefur verið unnið hratt frá því að erindi Breiðabliks lá fyrir þann 15. febrúar og munu niðurstöður liggja fyrir í apríl mánuði. Tillaga meirihlutans sýnir ábyrgð og mikinn vilja til samráðs við Breiðablik um leið og tilgangurinn er að ná fram bestu niðurstöðu.

Theódóra Þorsteinsdóttir, Ármann Kr. Ólafsson, Karen Halldórsdóttir, Hjördís Ýr Johnson"

Afgreiðslu á tillögu minnihlutans var frestað, þrír greiddu atkvæði með frestun, þau Theódóra Þorsteinsdóttir, Karen Halldórsdóttir og Hjördís Ýr Johnson gegn atkvæðum Péturs Hrafns Sigurðssonar og Birkis Jóns Jónssonar.

Frá Sveini Gíslasyni, formanni Aðalstjórnar Breiðabliks, dags. 8. febrúar, lagt fram minnisblað um gervigrasvöll við Fífuna.

Bæjarráð vísar erindinu til starfshóps sviðsstjóra stjórnsýslu-, mennta- og umhverfissviðs til úrvinnslu. Bæjarráð óskar eftir að starfshópurinn skili af sér í mars mánuði.

Frá Breiðablik, lögð fram formleg beiðni Breiðabliks um gervigras við Fífuna.

Bæjarráð samþykkir að vísa erindinu til bæjarstjóra til úrvinnslu.