Samkomulag ríkis og SSH um uppbyggingu á samgönguinnviðum á höfuðborgarsvæðinu - seinni umræða

Frá SSH, lagt fram til samþykktar samkomulag ríkis og SSH um uppbyggingu samgönguinnviða á höfuðborgarsvæðinu 2019-2033 ásamt fylgigögnum.

Bæjarstjórn samþykkir með 10 atkvæðum samkomulag ríkis og SSH um uppbyggingu samgönguinnviða á höfuðborgarsvæðinu. Sigurbjörg Erla Egilsdóttir greiddi ekki atkvæði.

Sigurbjörg Erla Egilsdóttir lagði fram eftirfarandi bókun:

"Markmið samkomulagsins eru góð, uppbygging innviða sem stuðlar að aukinni notkun virkra ferðamáta er eitt mikilvægasta verkefnið sem við stöndum frammi fyrir. Það varðar bæði loftslagið, lýðheilsu og lífsgæði íbúa á höfuðborgarsvæðinu. Margt er þó enn óútfært í samkomulaginu og óljóst hvað samþykki þess felur í sér, enda höfðu bæjarfulltrúar enga aðkomu að gerð þess og leynd ríkir um feril þess og áherslur þeirra sem komu að því. Opnara ferli hefði gefið fleirum tækifæri á aðkomu, sem hefði líklega leitt til betri afurðar ásamt því að auka traust, bæði til samkomulagsins og stjórnmála í heild. Mikilvægt er að útfærsla "sérstakrar fjármögnunar"! í samkomulaginu verði opnari og aðgengilegri en samningaferlið var. Gert er ráð fyrir að þessi hluti fjármögnunarinnar geti verið með ýmsum hætti eftir því hver vilji Alþingis kann að vera, að því gefnu að það samræmist markmiðum samkomulagsins. Mestu máli skiptir að í þeirri útfærslu verði ekki vegið að þeim tekjulægstu í samfélaginu né að friðhelgi einkalífs.

Sigurbjörg Erla Egilsdóttir"

Undirritaðir bæjarfulltrúar lögðu fram eftirfarandi bókun:

"Undirrituð styðja samkomulag ríkis og sveitafélaga á höfuðborgarsvæðinu sem mun hraða nauðsynlegum framkvæmdum á öllu höfuðborgarsvæðinu. Markmiðið er að stuðla að auknum lífsgæðum með skilvirkum samgöngubótum. Tekið er undir það sjónarmið sem kemur fram í samkomulaginu að álögur verði ekki umfram almennan ávinning notanda af þessari hröðun uppbyggingar. Það vekur sérstaklega ánægju að vegna þessa samkomulags að lúkning Arnarnesvegar er áætluð fyrir árslok 2021 samkvæmt tillögu að nýrri samgönguáætlun. Áhersla verður lögð á að íbúar Kópavogs verði upplýstir í ferlinu öllu sem framundan er.

Theódóra Þorsteinsdóttir, Birkir Jón Jónsson, Ármann Kr. Ólafsson, Karen Halldórsdóttir, Hjördís Ýr Johnson, Guðmundur Geirdal, Jón Finnbogason, Einar Örn Þorvarðarson"

Bæjarstjóri kynnir samkomulag ríkis og SSH um uppbyggingu á samgönguinnviðum á höfuðborgarsvæðinu.

Umhverfis- og samgöngunefnd þakkar Ármanni Kr. Ólafssyni, bæjarstjóra, fyrir kynninguna.

Lagt fram og kynnt.

Indriði Stefánsson bókar að samkomulagið er gert án þess að umhverfis- og samgöngunefnd hafi haft tækifæri til þess að fjalla um það áður og uppfylla þar með sitt hlutverk til stefnumótunar. Fyrirhuguð gjaldtaka kemur ílla niður á stórum hluta höfuðborgarsvæðisins.

Andri Steinn Hilmarsson bókar að samkomulagið markar tímamót í samgöngum í samstarfi sveitarfélaga og ríkisins. Uppbygging almenningssamgangna byggir á áralangri vinnu sérfræðinga með aðkomu íbúa og kjörinna fulltrúa. Margt er enn óútfært í samkomulaginu sem snýr að stefnumótun samgangna í Kópavogi til framtíðar.

Frá SSH, lagt fram til samþykktar samkomulag ríkis og SSH um uppbyggingu samgönguinnviða á höfuðborgarsvæðinu 2019-2033 ásamt fylgigögnum.

Bæjarstjórn vísar afgreiðslu málsins til næsta fundar bæjarstjórnar með 11 atkvæðum.