Ósk um samþykki fyrir tímabundinni lántöku

Frá fjármálastjóra, lögð fram umsögn um erindi Sorpu frá 24. febrúar þar sem lögð var fram ósk um samþykki fyrir tímabundinni lántöku til loka árs 2020 sem stjórn Sorpu samþykkti í formi viðauka við fjárhagsáætlun félagsins á fundi sínum þann 17. febrúar sl. og vísaði til afgreiðslu eigendasveitarfélaga. Bæjarráð frestaði málinu til næsta fundar á fundi sínum þann 27. febrúar sl.

Bæjarstjórn samþykkir með 11 atkvæðum beiðni stjórnar Sorpu bs. um tímabundna lántöku félagsins.

Bókun:

"Hér liggur fyrir tillaga frá stjórn Sorpu um að Kópavogsbær gangist í ábyrgð fyrir hlut sveitarfélagsins í 600 milljóna króna yfirdráttarheimild. Upphæðin kemur til viðbótar við þær 1.400 milljóna króna sem þegar er búið að ábyrgjast nýverið til þess að tryggja gjaldfærni fyrirtækisins. Í ljósi þess að fjárhagsáætlanir hafa ekki staðist og enn hafa ekki komið endurskoðaðar rekstraráætlanir þá óska undirrituð eftir því að endurskoðaðar rekstraráætlanir fyrir fyrir Gas-og jarðgerðarstöðina verði lagðar fram eins fljótt og auðið er. Að auki verði umhverfisáætlanir lagðar fram sem sýna hvernig moltu- og metan framleiðslan muni nýtast til framtíðar.

Hjördís Ýr Johnson, Theódóra S. Þorsteinsdóttir, Einar Ö. Þorvarðarson, Sigurbjörg Erla Egilsdóttir Bergljót Kristinsdóttir og Pétur H. Sigurðsson."

Bókun:

"Afar hratt hefur sigið á ógæfuhliðina í rekstri SORPU á stuttum tíma. Rekstur fyrirtækisins er þess eðlis að ekki kemur til greina að láta hann stöðvast og því ekki hægt annað en að samþykkja ósk SORPU um auknar lánaheimildir upp á 600 milljónir króna. Í eigendastefnu SORPU og í stofnsamningi fyrirtækisins kemur fram að “stjórn SORPU samþykkir árlegar fjárhags- og starfsáætlanir sem framkvæmdastjóri ber ábyrgð á að undirbúa. Jafnframt segir “stjórn SORPU hefur reglubundið eftirlit með að framkvæmdastjóri fylgi fjárhags og starfsáætlun eftir. Stjórn SORPU annast um að nægilegt eftirlit sé haft með bókhaldi og meðferð fjármuna fyrirtækisins.

Hér hefur ekki tekist vel til.

Framkvæmdastjórinn hefur verið látinn taka pokann sinn en ekkert fararsnið er á stjórninni.

Pétur Hrafn Sigurðsson bæjarfulltrúi Samfylkingarinnar

Bergljót Kristinsdóttir bæjarfulltrúi Samfylkingarinnar

Sigurbjörg Erla Egilsdóttir bæjarfulltrúi Pírata"

Bókun:

"Stjórn Sorpu bs. boðaði til fundar með öllum bæjarfulltrúum á höfuðborgarsvæðinu, mánudaginn 24. feb. sl., til að kynna stöðu og næstu skref í málefnum byggðasamlagsins. Stjórn byggðasamlagsins, framkvæmdastjóri og fjármálalegur ráðgjafi upplýstu um stöðuna og kynntu gögn þar að lútandi og áform um viðbrögð við lausafjárvanda Sorpu bs. Þar kom m.a. fram að unnið er að áætlun um greiningu á vanda fyrirtækisins og leiðir að úrbótum. Sú úttekt mun liggja fyrir í vor.



Þá mætti á fund bæjarráðs Birgir Björn Sigurjónsson fyrrum fjármálastjóri Reykjavíkurborgar og fór yfir þá vinnu og greiningu sem hann ásamt Helga Þór Ingasyni og Haraldi Flosa Tryggvasyni hafa unnið á fjárhagsstöðu Sorpu. Sú vinna stendur yfir og er umrædd fjármögnun liður í þeirri endurskipulagningu.

Margrét Friðriksdóttir, Ármann Kr. Ólafsson, Karen E. Halldórsdóttir, Hjördís Ýr Johnson, Guðmundur Gísli Geirdal og Birkir Jón Jónsson."

Frá fjármálastjóra, lögð fram umsögn um erindi Sorpu frá 24. febrúar þar sem lögð var fram ósk um samþykki fyrir tímabundinni lántöku til loka árs 2020 sem stjórn Sorpu samþykkti í formi viðauka við fjárhagsáætlun félagsins á fundi sínum þann 17. febrúar sl. og vísaði til afgreiðslu eigendasveitarfélaga. Bæjarráð frestaði málinu til næsta fundar á fundi sínum þann 27. febrúar sl.

Bæjarráð samþykkir að vísa erindinu til afgreiðslu bæjarstjórnar.

Frá Sorpu, dags. 24. febrúar, lögð fram ósk um samþykki fyrir tímabundinni lántöku til loka árs 2020 sem stjórn Sorpu samþykkti í formi viðauka við fjárhagsáætlun félagsins á fundi sínum þann 17. febrúar sl. og vísaði til afgreiðslu eigendasveitarfélaga.

Bæjarráð frestar málinu til næsta fundar.