Hjúkrunarrými fyrir yngra fólk

Frá sviðsstjóra velferðarsviðs, dags. 20.05.2021, lagt fram minnisblað varðandi hjúkrunarrými fyrir einstaklinga yngri en 67 ára.

Lagt fram.

Bókun:

"Undirritaðri þykir mjög miður að ekki sé hægt að stofna í Boðaþingi sértæka deild fyrir yngra fólk með færnisskerðingu sem þarf á umfangsmikilli þjónustu að halda. Skýringin virðist vera flækjustig laga, reglna og samningsgerðar ríkis og sveitarfélagsins um hlutverk og greiðslur þeirra á milli. Það að ekki sé hægt að bíða eftir því kemur í veg fyrir að hægt sé að opna slíkt úrræði.

Samkvæmt upplýsingum frá Sjúkratryggingum Íslands frá árinu 2018 búa 139 einstaklingar yngri en 67 ára á hjúkrunarheimilum. Af þeim eru 20 sem búa á sérhæfðum hjúkrunardeildum í Mörk og Skógarbæ í Reykjavík sem ætlaðar eru yngi fólki sem þarf umfangsmikla þjónustu. Því er óskiljanlegt að ekki sé hægt að opna sambærilega deild í Boðaþingi.

Undirrituð telur jafnframt nauðsynlegt að endurhugsa hugmyndafræðina á bak við hjúkrunarheimilin og þjónustu við eldri borgara í átt til fjölbreyttari búsetuúrræða."

Theódóra S. Þorsteinsdóttir

Bókun:

"Ég tek undir þessa bókun."

Pétur H. Sigurðsson

Á fundi velferðarráðs þann 23. mars sl. kom fram vilji ráðsins til að hvetja heilbrigðisráðherra til að stofna hjúkrunarheimili fyrir yngra fólk og koma þannig til móts við hóp yngri sjúklinga en gert er ráð fyrir á almennum hjúkrunarheimilum. Minnisblað sviðsstjóra dags. 15. apríl lagt fram.

Velferðarráð bókaði eftirfarandi og fól sviðsstjóra að koma á framfæri til heilbrigðisráðherra:

Á undanförnum árum hafa óskir borist til velferðarsviðs frá ungu fólki í Kópavogi um sólarhringsþjónustu vegna lömunar og eða mikillar færniskerðingar þar sem þjónustuþörf fyrir umönnun og hjúkrun er fyrirliggjandi. Óskir þessa unga fólks eiga það sammerkt að ekkert þeirra getur hugsað sér að fá þjónustu með mun eldra fólki á hjúkrunarheimilum, þrátt fyrir að slík þjónusta veiti aðgang að sérhæfðri þjónustu, veiti húsnæðisöryggi og tryggi um leið ákveðið félagslegt öryggi.

Velferðarráð Kópavogs telur brýnt að koma því áliti á framfæri við heilbrigðisráðherra að afar nauðsynlegt sé að huga að breytingum hvað varðar þjónustu ríkisins við ofangreindan hóp, þ.e. að gert sér ráð fyrir hjúkrunardeildum á hjúkrunarheimilum sem beinlínis gera ráð fyrir þjónustu við unga langtímasjúklinga. Slíkt fyrirkomulag, með nauðsynlegum breytingum á mönnun og fyrirkomulagi deildanna, mundi gerbreyta þjónustu við þennan aldurshóp frá því sem nú er. Þar með væri tekið tillit til félagslegra og tilfinningalegra þátta þessara einstaklinga, um leið og almenn og sértæk þjónusta væri tryggð. Velferðarsvið Kópavogs vill gjarnan fylgja þessari bókun eftir með viðtali við ráðherra, þar sem frekari upplýsingar væru látnar í té, sé þess óskað.