Hamraborg - aðgengi fyrir hreyfihamlaða í tengslum við framkvæmdir

Fyrirspurn frá nefndarmanni um aðgengismál á framkvæmdartíma.

Hvenær má vænta þess að framkvæmdaraðili skili af sér löglegri tillögu til bæjarstjórnar sem hægt er að taka afstöðu til? Notendaráð leggur áherslu á mikilvægi þess að óvissu íbúa sé eytt.

Notendaráð vísar málinu til sviðsstjóra umhverfissviðs.

Erindi frá íbúum, dags. 6.4.2022 lagt fram til afgreiðslu.

Lagt var fram erindi íbúa með ósk um stuðning notendaráðs við að tryggja að ekki verði ráðist í framkvæmdir á svæðinu nema áður verði fundin lausn á aðgengis- og bílastæðamálum fatlaðs fólks á svæðinu.

Einnig var í erindinu sett fram hugmynd/ósk um uppkaup íbúða í Fannborginni. Notendaráð telur sig ekki hafa umboð til að fjalla um fasteignakaup, þannig að þeim hluta erindisins er vísað til bæjarritara til umsagnar.

Notendaráð hefur skilning á áhyggjum íbúa af aðgengi að heimili sínu á framkvæmdatíma.

Taka þarf af allan vafa um merkingu eftirfarandi klausu í bréfi Kópavogsbæjar til úrskurðarnefndar umhverfis- og auðlindamála þar sem segir:

“Kópavogsbær telur ekki vera fyrir hendi annmarka á framkvæmdartíma þó svo að einhverjar raskanir og ónæði muni fylgja framkvæmdum. Þá verður ekki séð að ef einhverjir annmarkar væru fyrir hendi á framkvæmdartíma gæti það eitt og sér leitt til ógildingar á deiliskipulaginu.?

Bæjarstjórn hefur tekið afgerandi afstöðu til málsins samanber bókun 1238. fundar frá 25.maí 2021, sem var ítrekuð 14.desember sama ár:

"Að gefnu tilefni áréttar bæjarstjórn að aðgengi íbúa að bílastæðum, þar með talið bílastæðum fyrir hreyfihamlaða, verður tryggt á framkvæmdatíma."

Aukinheldur skal það áréttað að byggingarfulltrúa er það skylt að tryggja aðgengi í samræmi við byggingarreglugerð.

Málið verður tekið aftur upp á næsta fundi notendaráðs, sem haldinn verður í maí.

Fyrirspurn frá nefndarmanni um aðgengismál í Hamraborg vegna fyrirhugaðra framkvæmda.

Bjarki Valberg kynnti tillögu um hvernig aðgengismálum í og við Hamarborg verðí háttað á framkvæmdartíma. Notendaráð þakkar Bjarka fyrir greinargóðar upplýsingar og telur nauðsynlegt að íbúar svæðisins fái samskonar kynningu.