Úthlutun Vatnsendahvarfs. 1. áfangi

Frá lögfræðideild, lögð fram tillaga að úthlutun lóða í fyrsta áfanga Vatnsendahvarfs.

Bæjarstjórn samþykkir með sex atkvæðum og hjásetu Theódóru S. Þorsteinsdóttur, Sigurbjargar E. Egilsdóttur, Helgu Jónsdóttur, Telmu Árnadóttur og Bergljótar Kristinsdóttur framlagða tillögu að úthlutun lóða í 1. áfanga Vatnsendahvarfs.

Frá lögfræðideild, lögð fram tillaga að úthlutun lóða í fyrsta áfanga Vatnsendahvarfs.

Bæjarráð samþykkir með þremur atkvæðum og hjásetu Theódóru S. Þorsteinsdóttur og Helgu Jónsdóttur að vísa málinu til afgreiðslu bæjarstjórnar.

Fundarhlé hófst kl. 10:53, fundi fram haldið kl. 11:18.

Bókun:

"Í Roðahvarfi er nú úthlutað byggingarrétti á 184 íbúðum á sex fjölbýlishúsalóðum. Þetta er fyrsta úthlutun Kópavogbæjar á byggingarlóðum í áratug. Með aðferð meirihlutans við sölu á byggingarrétti þurfa væntanlegir íbúðareigendur að greiða 12 til 16 milljónir króna fyrir hverja einstaka íbúð auk lögboðinna gjalda til bæjarins fyrir utan sjálfan byggingarkostnaðinn við íbúðina. Þessi úthlutun er enn ein staðfesting á að meirihlutinn virðir að vettugi skuldbindingar bæjarfélagsins lögum samkvæmt sem og í húsnæðisáætlun Kópavogsbæjar, aðalskipulagi Kópavogsbæjar og svæðisskipulagi höfuðborgarsvæðisins um framboð á húsnæði á viðráðanlegu verði til að fullnægja búsetuþörfum allra félagshópa. Það er miður að engri lóð sé úthlutað til óhagnaðardrifinna byggingarfélaga sem byggja íbúðir fyrir þá sem ekki hafa efni á ofurkjörum Kópavogsbæjar."

Sigurbjörg Erla Egilsdóttir

Theódóra S. Þorsteinsdóttir

Helga Jónsdóttir

Bergljót Kristinsdóttir


Bókun:

"Það er ánægjulegt að sjá þann mikla áhuga sem var á lóðum í þessari úthlutun en um er að ræða 20 fjölbýlishús á sex lóðum. Með þessu er verið að auka við framboð íbúða á almennum húsnæðismarkaði sem mikið hefur verið kallað eftir. Það er rangt að meirihlutinn sé að virða að vettugi skuldbindingar sveitarfélagsins í húsnæðismálum og er fyrirkomulag þessarar lóðaúthlutunar lögum samkvæmt."

Ásdís Kristjánsdóttir

Orri V. Hlöðversson

Hjördís Ýr Johnson

Andri S. Hilmarsson

Frá bæjarlögmanni, lagðir fram úthlutunarskilmálar vegna úthlutunar lóða í 1. áfanga Vatnsendahvarfs, Roðahvarf nr. 2-36 og 1-21. Bæjarráð frestaði málinu þann 7. mars sl.

Frá bæjarlögmanni, lagðir fram úthlutunarskilmálar vegna úthlutunar lóða í 1. áfanga Vatnsendahvarfs, Roðahvarf nr. 2-36 og 1-21. Bæjarráð frestaði málinu þann 7. mars sl.

Bæjarfulltrúar Vina Kópavogs, Viðreisnar, Samfylkingar og Pírata leggja fram eftirfarandi tillögu:

,,Bæjarstjórn samþykkir að fela bæjarlögmanni að vinna tillögu til breytingar á framlögðum úthlutunarskilmálum og tryggja þannig framboð á lóðum til að mæta þörfum þeirra 35% skattgreiðenda í sveitarfélaginu sem eru undir tekju- og eignamörkum samkvæmt húsnæðisáætlun Kópavogsbæjar 2020 til 2027. Innan þess hundraðshluta hafi Kópavogsbær kauprétt á allt að 5% fyrir félagslegt leiguhúsnæði á föstu verðlagi bundnu byggingarvísitölu.

Í Vatnsendahvarfinu verður fyrsta almenna úthlutun íbúðahúsalóða í Kópavogi frá því að húsnæðisáætlunin var gerð og í þessum fyrsta áfanga eru fjölbýlishúsalóðir sem henta vel til að ná þessum markmiðum."

Bæjarstjórn hafnar tillögu minnihlutans með sex atkvæðum gegn atkvæðum Erlendar Geirdals, Theodóru S. Þorsteinsdóttir, Helgu Jónsdóttur, Sigurbjargar Erlu Erlendsdóttur og Kolbeins Reginssonar.

Bókun:

,,Kópavogsbær er að stíga mikilvæg skref með úthlutun í nýju hverfi fyrir ólíka hópa samfélagsins sem tryggir félagslega blöndun.

Í skipulagsskilmálum er gert ráð fyrir fjölbreyttu framboði; fjölbýlishúsum, einbýlishúsum, par- og raðhúsum auk búsetukjarna fyrir fatlað fólk. Í úthlutunarskilmálunum birtast einnig markmið aðalskipulagsins um félagslega blöndun, m.a. með áskilnaði Kópavogsbæjar til þess að krefjast forkaupsréttar á allt að 4,5% byggðra íbúða undir félagslegt húsnæði. Við trúum því að þessir skipulagsskilmálar bjóði upp á að ólíkir þjóðfélagshópar eigi kost á að eignast húsnæði í hverfinu þar með talið fyrstu kaupendur og þeir sem falla undir skilmála hlutdeildarlána.

Meiri- og minnihluta greinir á um leiðir að því markmiði að sem flestir geti eignast þak yfir höfuðið. Meirihlutanum hugnast ekki að 35% af nýjum lóðum verði niðurgreiddar. Þá er ljóst að sú stefna minnihlutans hefði verulega neikvæð áhrif á bæjarsjóð sem þyrfti að mæta með skattahækkunum eða niðurskurði á þjónustu á íbúa. Okkar hlutverk er að standa vörð um hagsmuni bæjarins þegar verið er að úthluta takmörkuðum auðlindum og hámarka það verð sem við fáum fyrir lóðirnar. Þær tekjur skila sér til bæjarsjóðs og nýtast þannig öllum Kópavogsbúum hvort sem er í formi bættrar þjónustu eða lægri skatta."

Elísabet Sveinsdóttir, Sigrún Hulda Jónsdóttir, Orri Hlöðversson, Hanna Carla Jóhannsdóttir, Bergur Þorri Benjamínsson og Ásdís Kristjánsdóttir.

Fundarhlé kl. 18:50 Fundi framhaldið 19:06

Bókun:

,,Félagsleg blöndun verður ekki tryggð með markaðalausnum meirihlutans og markaðurinn tryggir ekki félagslegt réttlæti eins og fram kom þegar innviðaráðherra kynnti húsnæðisstefnu ríkisstjórnarinnar. Tillaga minnihlutans felur ekki í sér að 35% lóðanna verði niðurgreiddar. Hún felur hins vegar í sér að íbúar og fyrirtæki í Kópavogi geti nýtt þær lausnir og þann fjárhagslega stuðning sem byggjendum undir tekju- og eignamörkum standa til boða af hálfu ríkisins. Það er ósmekklegt og rangt að tala um niðurgreiðslur í því efni."

Erlendur Geirdal, Theodóra S. Þorsteinsdóttir, Helga Jónsdóttir, Sigurbjörg Erla Erlendsdóttir og Kolbeinn Reginsson.

Niðurstaða:

Bæjarstjórn samþykkir með 6 atkvæðum úthlutunarskilmála vegna úthlutunar lóða í 1. áfanga Vatnsendahvarfs, Roðahvarf nr. 2-36 og 1-21. Bæjarfulltrúar Erlendur Geirdal, Theodóra S. Þorsteinsdóttir, Helg Jónsdóttr, Sigurbjörg Erla Erlendsdóttir og Kolbeinn Reginsson greiða atkvæði á móti.

Frá bæjarlögmanni, lagðir fram úthlutunarskilmálar vegna úthlutunar lóða í 1. áfanga Vatnsendahvarfs, Roðahvarf nr. 2-36 og 1-21. Bæjarráð frestaði málinu þann 7. mars sl.

Bæjarráð samþykkir með 3 atkvæðum gegn atkvæðum Theódóru S. Þorsteinsdóttur og Helgu Jónsdóttur að vísa málinu til afgreiðslu bæjarstjórnar.

Fundarhlé hófst kl. 11:35, fundi fram haldið kl. 12:17.

Bókun:

"Framlögð drög að úthlutunarskilmálum uppfylla ekki skyldur Kópavogsbæjar í húsnæðismálum. Kjörnir fulltrúar eiga að starfa á grundvelli laga og samkvæmt stefnumarkandi samþykktum bæjarstjórnar. Samkvæmt lögum um húsnæðismál eru helstu verkefni sveitarfélaga á því sviði að: 1) greina húsnæðisþörf, 2) gera áætlun um hvernig þörfinni skal mætt og 3) tryggja framboð á lóðum til að mæta þeim áætlunum. Yfirlýsingar sem Kópavogsbær hefur gefið og lúta sérstaklega að húsnæðismálum eru eftirfarandi samkvæmt minnisblaði bæjarlögmanns, dags. 12. mars 2024.

Meðal markmiða í Svæðisskipulagi höfuðborgarsvæðisins, sem og Aðalskipulagi Kópavogs 2019-2040, er fjölbreyttur húsnæðismarkaður sem uppfyllir þarfir íbúa. Huga verði sérstaklega að framboði á húsnæði á viðráðanlegu verði.

Í húsnæðisáætlun Kópavogsbæjar er greining á þörfum ólíkra hópa og þar kemur fram að 35% skattgreiðenda Kópavogsbæjar séu undir tekju- og eignamörkum. Því þyrfti að skipuleggja uppbyggingu með þeim hætti að þriðjungur húsnæðis henti þessum íbúum bæjarins.

Í húsnæðisáætlun Kópavogs kemur fram hvernig sveitarfélagið ætli að mæta húsnæðisþörf heimila, bæði til skemmri og lengri tíma. Í áætluninni segir að markmið Kópavogsbæjar sé að leitast við að tryggja fjölbreytt framboð húsagerða og búsetukosta fyrir alla félagshópa. Allir geti orðið sér úti um fullnægjandi og öruggt húsnæði á viðráðanlegu verði. Þá er m.a. í forgangi að auka framboð á litlum og ódýrum fasteignum, auðvelda fyrstu kaup og fjölga íbúðakostum, m.a. með samstarfi við byggingaraðila um uppbyggingu minni íbúða sem sveitarfélagið hefði forkaupsrétt að.

Bæjarstjórn Kópavogs ákvað haustið 2018 að innleiða Heimsmarkmið Sameinuðu þjóðanna með því að gera 36 yfirmarkmið að leiðarljósi við alla stefnumótun. Markmið 11.1 snýr að húsnæðismálum og segir meðal annars að eigi síðar en árið 2030 geti allir orðið sér úti um fullnægjandi og öruggt húsnæði á viðráðanlegu verði.

Í sameiginlegu átaki ríkis og sveitarfélaga var undirritaður rammasamningur til þess m.a.að mæta þeim hópi sem hefur átt erfitt með að komast inn á húsnæðismarkaðinn bæði fyrstu kaupendum og tekju- og eignalægri hópnum. Þar er gert ráð fyrir að 30% nýrra íbúða verði hagkvæmar íbúðir á viðráðanlegu verði, sem byggðar eru með stofnframlögum frá ríki og sveitarfélögum eða uppfylla skilyrði um hlutdeildarlán.

Sú tillaga að úthlutunarskilmálum, sem hér liggur fyrir, tekur ekkert mið af ofangreindum yfirlýsingum sem byggjast á þeirri reynslu að markaðurinn hefur ekki getað leyst þær fjölbreyttu þarfir, sem ungir, tekjulágir, námsmenn og fleiri hópar samfélagsins hafa. Kópavogsbær hefur ekki staðið að almennri lóðaúthlutun í 9 ár og nú er tækifærið til að leiðrétta þá skekkju, sem orðið hefur með uppbyggingu fjárfesta á þróunarreitum þar sem arðsemiskrafa er leiðarljósið."

Bergljót Kristinsdóttir

Theódóra S. Þorsteinsdóttir

Sigurbjörg E. Egilsdóttir

Helga Jónsdóttir

Bókun:

"Í þessari fyrstu úthlutun, af nokkrum, í Vatnsendahvarfi er verið að úthluta alls 184 íbúðum á sex fjölbýlishúsalóðum. Skipulag hverfisins gerir ráð fyrir fjölbreyttu framboði; fjölbýlishúsum, einbýlishúsum, par- og raðhúsum auk búsetukjarna fyrir fatlað fólk. Í úthlutunarskilmálunum birtast einnig markmið aðalskipulagsins um félagslega blöndun, m.a. með áskilnaði Kópavogsbæjar til þess að krefjast forkaupsréttar á allt að 4,5% byggðra íbúða undir félagslegt húsnæði.

Meiri- og minnihluta greinir á um leiðir að því marki hvernig sem flestir geti eignast þak yfir höfuðið. Eins og kemur fram í bókun minnihlutans hugnast þeim að handstýra úthlutuninni og niðurgreiða húsnæði með lóðaúthlutunum til óhagnaðardrifinna leigufélaga. Ekki er gerð grein fyrir því, í bókun minnihlutans, hver áhrifin yrðu af slíkum lóðaúthlutunum á fjárhag sveitarfélagsins, en hætt er við að það myndi birtast í niðurskurði á þjónustu til bæjarbúa, auknum álögum eða lántökum."

Ásdís Kristjánsdóttir

Orri V. Hlöðversson

Elísabet B. Sveinsdóttir

Andri S. Hilmarsson

Frá bæjarlögmanni, lagðir fram úthlutunarskilmálar vegna úthlutunar lóða í 1. áfanga Vatnsendahvarfs, Roðahvarf nr. 2-36 og 1-21.

Fundarhlé hófst kl. 10:56, fundi fram haldið kl. 11:45.

Bæjarráð frestar málinu.