Tillaga bæjarfulltrúa Viðreisnar, Samfylkingar, Vina Kópavogs og Pírata um boðun fundar með íbúum á Fannborgarreitnum

Tillaga:

Bæjarráð felur bæjarstjóra að boða án dráttar til fundar með íbúum á Fannborgarreitnum til að fara yfir stöðu skipulags svæðisins og áætlanir um framkvæmdir framundan. Áður en Kópavogsbær gengur frá uppbyggingarsamningi við framkvæmdaraðila þarf að hlusta á íbúa sem búa eiga við raskið sem fylgir framkvæmdum. Það er hlutverk Kópavogsbæjar að standa vörð um hagsmuni íbúa og tryggja þá í samningum við framkvæmdaraðila sem taka að sér uppbyggingu á þessu viðkvæma svæði.

Greinargerð:

Bæjarstjóri hefur svarað ítrekuðum óskum bæjarfulltrúa um fundi með íbúum og hagsmunaaðilum á miðbæjarreitnum þannig að ekki sé um neitt að tala fyrr en trúverðug og raunhæf áætlun liggi fyrir. Þá hefur hún lagt ríka áherslu á að tryggja aðgengismál allra íbúa meðan á framkvæmdum stendur. Nú þegar byggingaform hafa verið samþykkt í bæjarstjórn verður ekki undan því vikist að ræða við íbúa á framkvæmdasvæðinu. Hlusta þarf á þá og tryggja lögmæta hagsmuni þeirra í uppbyggingarsamningi, hvort heldur þeir lúta að aðgengi, hávaða, sprengingum eða öðrum áhyggjuefnum. Lýðræðislegt hlutverk, sem íbúar veita kjörnum fulltrúum í kosningum, verður aldrei framselt til einkaaðila með uppbyggingarsamningi. Ekki heldur samskipti og samráð við íbúa.

Bæjarráð frestar erindinu.