Tillaga bæjarfulltrúa Vina Kópavogs, Pírata, Samfylkingar og Viðreisnar um vettvang fyrir samráð varðandi uppbyggingu og framkvæmd á miðbæjarsvæðinu

Frá bæjarfulltrúa Vina Kópavogs, Pírata, Samfylkingar og Viðreisnar, dags. 09.09.2025, lögð fram tillaga um samráðsvettvang bæjarins og framkvæmdaraðila við íbúa og aðra hagsmunaaðila á miðbæjarsvæðinu.

Fundarhlé hófst kl. 9:20, fundi fram haldið kl. 10:24

Bæjarráð hafnar tillögunni með þremur atkvæðum gegn atkvæðum Helgu Jónsdóttur og Maríu Ellenar Steingrímsdóttur

Bókun:

"Það sem minnihlutinn leggur til er þegar tryggt í uppbyggingarsamningi og formlegur vettvangur samskipta liggur fyrir. Þegar hafa verið tilnefndir einstaklingar í samskiptahóp á vegum Kópavogsbæjar og uppbyggingaraðila til að tryggja góða upplýsingagjöf á framkvæmdatímanum m.a. í upphafi og við lok hvers framkvæmdafasa. Hópurinn mun einnig svara spurningum sem varða hagsmuni íbúa og annarra á svæðinu. Þá hefur verið opnuð sérstök vefsíða þar sem íbúar geta kynnt sér stöðu framkvæmda, sent inn ábendingar og fylgst með íbúafundum. Markmið þeirrar vinnu er að tryggja gagnsæi og virkt samstarf.

Í gildi er deiliskipulag á miðbæjarsvæðinu sem unnið er eftir. Mikilvægt er að blanda ekki saman ólíkum stigum eins og gert er í tillögunni, annars vegar skipulagsferli og hins vegar uppbyggingu á grundvelli samþykkts skipulags.

Í skipulagsferlinu var athugasemdum Skipulagsstofnunar svarað og brugðist við þeim með fullnægjandi hætti. Það endurspeglast í því að deiliskipulagið var auglýst til gildistöku án nokkurra athugasemda.

Í greinargerð tillögunnar er vísað til viðhaldsframkvæmda í Geislagarðinum sem tengjast ekki miðbæjaruppbyggingunni fyrir utan að vera staðsett á sömu slóðum. Tekið verður sérstaklega á hnökrum í samskiptum vegna viðhaldsverkefna."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson


Bókun:

"Upplýsingavefsíða og þær aðgerðir sem lýst er í bókun meirihlutans þjónar alls ekki þeim tilgangi sem að er stefnt með tillögu okkar. Tillaga Skipulagsstofnunar, sem við gerðum að okkar, um vettvang samskipta milli Kópavogsbæjar, framkvæmdaraðila, íbúa og annarra hagsmunaaðila laut einmitt að framkvæmdunum sjálfum. Forsendan er sú að fyrirhugaðar framkvæmdir eru íþyngjandi umfram það sem þekkist. Hægt er að ná árangri, skilningi og samvinnu með vettvangi þar sem skipst er á upplýsingum, skoðunum og lausnum. Það sem framundan er kallar á virkt samtal milli Kópavogsbæjar, framkvæmdaraðila, íbúa og annarra hagsmunaaðila. Vefsíða og ábendingakerfi leggja ekki þann grunn sem þarf til að vinna með þeim sem verða fyrir íþyngjandi áhrifum í einkalífi sínu af deiliskipulagi sem bæjarstjórn samþykkti. Uppbyggingarsamningur bæjarins við einkaaðila vísar ábyrgð sem Kópavogsbær ber gagnvart íbúum á framkvæmdaraðila sem ekki fara með ábyrgð kjörinna fulltrúa."

María Ellen Steingrímsdóttir

Bergljót Kristinsdóttir

Helga Jónsdóttir

Sigurbjörg Erla Egilsdóttir


Bókun:

"Samskiptahópurinn er vettvangur fyrir virkt samtal milli Kópavogsbæjar, framkvæmdaraðila, íbúa og hagsmunaaðila. Að öðru leyti vísum við til fyrri bókunar."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson