Barnvænt sveitarfélag
Kópavogsbær hefur innleitt Barnasáttmála Sameinuðu þjóðanna inn í stjórnsýslu og starfsemi sveitarfélagsins.
Í tengslum við innleiðinguna hafa fjölmörg verkefni litið dagsins ljós svo sem Okkar skóli, Barnaþing, samráð í skipulagsmálum og mælaborð barna.
Kópavogur fékk viðurkenningu UNICEF árið 2021 sem Barnvænt sveitarfélag. Viðurkenningin var endurnýjuð vorið 2024.
Hvað er barnvænt sveitarfélag?
Barnvænt sveitafélag er samfélag sem stýrt er af sveitar- eða bæjarstjórn með það að markmiði að bæta aðstæður barna og tryggja að ávallt sé tekið tillit til réttinda þeirra. Börn koma að ýmissi ákvarðanatöku er varða þeirra málefni.
Hugmyndafræði barnvænna sveitarfélaga byggir á alþjóðlegu verkefni UNICEF. Fjölmörg sveitarfélög víðsvegar um heiminn hafa innleitt þessa hugmyndafræði.
Barnasáttmáli Sameinuðu þjóðanna
Barnasáttmáli Sameinuðu þjóðanna varð að lögum árið 1990. Allar þjóðir heims, að undanskildum Bandaríkjunum, hafa samþykkt sáttmálann sem samanstendur af 54 greinum um réttindi barna.
Barnasáttmálinn var lögfestur á Íslandi 2013.
Barnasáttmálinn var fullgiltur fyrir Íslands hönd árið 1992. Fullgilding sáttmálans felur í sér að Ísland er skuldbundið af þjóðarétti til að virða og uppfylla ákvæði sáttmálans.
Í tengslum við innleiðingu Barnasáttmála Sameinuðu þjóðanna í Kópavogi hefur verið þróað mælaborð. Það er safn mælinga úr rannsóknum á velferð og stöðu barna og ungmenna í Kópavogi.
Mælingarnar eru 83 talsins en auk yfirlits yfir einstakar mælingarnar hefur verið reiknuð vísitala barnvæns sveitarfélags á grundvelli mælinganna.Á hverju ári er haldið Barnaþing Kópavogs sem skipað er fulltrúum barna úr öllum grunnskólum Kópavogs og fulltrúum úr ungmennaráði. Barnaþing er haldið í kjölfar skólaþinga í grunnskólum bæjarins.
Barnaþing fjallar um tillögur af skólaþingum og forgangsraðar tillögum sem sendar eru út í kosningu í grunnskólum. Á vorin eru þær tillögur sem börnin kjósa mikilvægastar kynntar fyrir bæjarstjórn.Í réttindaskólum, frístund og félagsmiðstöðvum er unnið eftir hugmyndafræði sem byggir á Barnasáttmálanum. Við innleiðingu er byggt upp lýðræðislegt umhverfi sem styður börn í því að verða virkir þátttakendur í samfélaginu.
Okkar skóli snýst um að leik- og grunnskólar fá úthlutað fjármagni sem börnin ráðstafa sjálf. Það er mismunandi milli skóla hvernig aðferðafræði er beitt í því að safna hugmyndum og velja á milli þeirra.