Sorp og endurvinnsla
Með einfaldri flokkun á heimilinu stuðlum við að bjartari og umhverfisvænni framtíð.
Sorphirðudagatal
Sláðu inn heimilisfangið þitt til að sjá hvenær tunnurnar verða næst tæmdar við heimili þitt miðað við áætlun.
Heimilissorp í Kópavogi er hirt af fyrirtækinu Kubbi. Hirðutíðni allra úrgangsflokka er á tveggja vikna fresti.
Ef spurningar vakna eða eitthvað má betur fara, vinsamlegast sendið ábendingu eða hafið samband við Þjónustumiðstöð í síma 441 9000.
Djúpgámar eru útbúnir magnskynjurum og fylgja ekki áætlun sorphirðudagatalsins. Djúpgámar eru tæmdir af Íslenska Gámafélaginu.
Fyrirvari
Líta skal á sorphirðudagatalið sem viðmiðunardagatal. Veðurfar, veikindi, bilanir og aðrir ófyrirséðir þættir geta haft áhrif en almennt ætti ekki að skeika meiru en hálfum til einum degi á sorphirðu milli hverfa.
Flokkun í Kópavogi
Í Kópavogi er fjórflokkun sorps við hvert íbúðarhús. Sorptunnurnar eru fyrir pappa og pappír, plast, matarleifar og blandaðan úrgang.
Aðgengi og viðhald sorptunna
Aðgengi að og hreinsun á sorptunnum er á ábyrgð íbúa. Sé aðgengi hindrað verða tunnurnar ekki tæmdar.
Samkvæmt kafla 6.12 í byggingarreglugerð skulu sorptunnur vera í sorpgerði eða sorpskýli. Aðgengi að þeim þarf að vera greiðfært svo hægt sé að tæma tunnurnar án vandkvæða.
Á veturna þurfa húseigendur að hreinsa snjó frá sorpgeymslum og leiðinni að þeim innan lóðar.
Sorpílát sem losuð eru í Kópavogi eru í eigu bæjarins. Kópavogur sér um að viðhalda og endurnýja skemmd sorpílát. Ef tjón á íláti er hægt að rekja til slæmrar umgengni kann íbúi að þurfa að greiða fyrir endurnýjun þess. Það er á ábyrgð íbúa að hreinsa ílátin.
Ábendingar um bilaðar sorptunnur skal senda á thjonustumidstod@kopavogur.is eða hafa samband í síma 441-9000.
Séu sorpgeymslur eða gerði læst skal notast við lyklakerfi sveitarfélagsins.
Þar sem fara þarf um lokuð hlið eða hurðir getur sveitarfélagið farið fram á að hægt sé að halda þeim opnum meðan á losun stendur, til dæmis með krækjum eða öðrum búnaði.Það getur reynst sérlega erfitt að koma þungum tunnum upp tröppur. Þær geta einnig verið ástæða meiðsla starfsfólks sorphirðu. Skábrautir eru nauðsynlegar til að bæta aðgengi í tröppum.
Ef tröppur hindra aðgang að sorpílátum má kanna hvort önnur staðsetning sé möguleg.
Mikilvægt er að gæta þess að ekkert sé í gangvegi starfsfólks sorphirðu. Hindranir geta orsakað að sorpílát séu ekki tæmd.
Dæmi um hindranir eru:- Reiðhjól
- Bílar
- Barnavagnar
- Læsingar á geymslustað ílátanna
- Snjór
Það er mikilvægt að góð lýsing sé til staðar fyrir starfsfólk, sem og íbúa hússins.
Góð lýsing inni í ruslakompum eða þar sem sorpílát eru geymd skiptir miklu máli.
Það er mikilvægt að moka snjó úr gangvegi á losunardögum. Einnig er mikilvægt að sanda eða salta í hálku til að forðast slys starfsfólks.
Á losunardögum er betra að hundum sé haldið frá. Ef hundur er á lóð þarf að gæta þess að hann sé ekki í vegi starfsfólks við sorphirðu.
Opnar hurðir meðan á losun stendur auðvelda og flýta fyrir sorphirðu. Hurðapumpur og krókar sem halda hurðum opnum á meðan losun fer fram gerir vinnuna skilvirkari.
Samkvæmt samþykkt um meðhöndlun úrgangs í Kópavogi eiga allar tunnur hvers húss að vera geymdar á sama stað.
Gott undirlag flýtir fyrir sorphirðu. Það er mun auðveldara að draga tunnur eftir malbiki eða hellum heldur en grasi eða möl.
Of lítil lofthæð í aðkomuleiðum gerir starfsfólki erfitt fyrir og eykur álag.
Ef lofthæð er lág þar sem sorpílát eru geymd má kanna hvort önnur staðsetning sé möguleg.Efnisval við klæðningu, dyrakarma, gólf og veggi þarf að vera slitsterkt og gert þannig að það skemmist ekki vegna umgengni um sorpílátin.
Læsingar á sorpgeymslum þurfa að samræmast lyklakerfi sorphirðunnar í Kópavogi.
Nánari upplýsingar fást hjá Þjónustumiðstöð Kópavogs.
Í Kópavogi er notast við samræmt lyklakerfi fyrir læstar sorpgeymslur. Það er á ábyrgð húsfélags að sorpgeymsla sé aðgengileg sorphirðunni. Kópavogsbær tekur ekki við stökum lyklum frá húsfélögum. Talnalásar eru ekki samþykktir.
Samræmt kerfi er til sölu hjá Lásum neyðarþjónustu á Skemmuvegi 4.
Sorphirðugjöld
Útreikningur sorphirðugjalda byggir á tveimur þáttum: samsetningu sorpíláta við fasteignina og eignarhlutfalli viðkomandi íbúðar í húsinu. Sorphirðugjöld eru innheimt með fasteignagjöldum.