Fjárhagsaðstoð
Ef þú átt erfitt með að standa undir framfærslu geturðu sótt um fjárhagsaðstoð hjá Kópavogsbæ. Markmið fjárhagsaðstoðar er að tryggja að íbúar geti séð fyrir sér og sínum þegar tekjur duga ekki til framfærslu.
Félagsráðgjafi á vakt svarar fyrirspurnum, veitir ráðgjöf og aðstoðar við að bóka viðtal.
Umsóknarferlið og skilyrði
Til að geta fengið fjárhagsaðstoð þarf umsækjandi að:
- Vera 18 ára eða eldri.
- Vera með lögheimili í Kópavogi.
- Vera með tekjur og eignir undir ákveðnum viðmiðunarmörkum.
Áður en sótt er um fjárhagsaðstoð þarf að kanna rétt til annarra greiðslna, til dæmis frá:
- Vinnumálastofnun
- Sjúkratryggingum Íslands
- Tryggingastofnun
- Lífeyrissjóðum
- Stéttarfélagi
Sótt er um fjárhagsaðstoð rafrænt á Ísland.is.
Hvaða gögnum þarf að skila?
Í umsóknarferlinu færðu upplýsingar um hvaða gögn þarf að skila inn.
Almennt þarf að leggja fram upplýsingar um:
- Tekjur.
- Eignir.
- Húsnæðisaðstæður.
- Rétt til greiðslna frá öðrum aðilum.
Ef þú ert ekki með rafræn skilríki er einnig hægt að sækja um í Þjónustuveri velferðarsviðs Kópavogsbæjar á Digranesvegi 1.
Umsókn fer í úrvinnslu hjá starfsmanni velferðarsviðs Kópavogs. Þegar öll gögn hafa borist hefur starfsfólk allt að 10 virka daga til að afgreiða umsóknina.
Ef umsókn er synjað er hægt að kæra ákvörðunina til velferðarráðs Kópavogs innan fjögurra vikna frá því að niðurstaða berst.
Fjárhæð fjárhagsaðstoðar fer eftir tekjum og aðstæðum umsækjanda.
Hámarksfjárhæð getur verið allt að:
- 267.305 kr. á mánuði fyrir einstakling.
- 427.688 kr. á mánuði fyrir hjón eða sambúðarfólk.
Aðstoðin er veitt óháð barnafjölda. Gert er ráð fyrir að barnabætur, meðlög, barnalífeyrir og umönnunargreiðslur mæti kostnaði vegna barna.
Tekjur umsækjanda koma til frádráttar við útreikning fjárhæðarinnar. Fjárhagsaðstoð til framfærslu er skattskyld.
Fjárhagsaðstoð er yfirleitt veitt sem styrkur til framfærslu.
Í sumum tilvikum getur aðstoð verið veitt sem lán, til dæmis ef umsækjandi bíður eftir greiðslum frá öðrum kerfum, svo sem frá Tryggingastofnun, Vinnumálastofnun eða lífeyrissjóðum.
Umsókn um fjárhagsaðstoð gildir fyrir þann mánuð sem sótt er um. Ef þörf er á áframhaldandi aðstoð þarf að sækja um aftur mánaðarlega, vanalega á tímabilinu 20.–25. hvers mánaðar.
Sérstök aðstoð
Heimildargreiðslur vegna sérstakra aðstæðna.
Í sumum aðstæðum er hægt að fá viðbótaraðstoð ef upp koma sérstakar félagslegar eða fjárhagslegar aðstæður. Slík aðstoð er metin í hverju tilviki fyrir sig og getur verið veitt sem styrkur eða lán.
Sótt er um aðstoðina í gegnum umsókn um fjárhagsaðstoð eða í samráði við ráðgjafa á velferðarsviði.
Félagsráðgjafi veitir ráðgjöf.
Hægt er að sækja um eftirfarandi aðstoð:
● Námsaðstoð
● Húsbúnaðaraðstoð
● Útfararstyrki
● Greiðslur vegna sérfræðiaðstoðar
● Aðstoð vegna fyrirframgreiðslu húsaleigu
● Aðstoð vegna sérstakra erfiðleika
● Sérstaka aðstoð til foreldra vegna barna
● Aðstoð vegna endurhæfingar
● Jólastyrki