Vinnuskóli

Vinnuskólinn í Kópavogi býður 14 til 17 ára íbúum Kópavogs vinnu yfir sumartímann. Starfstími Vinnuskólans er frá maí til ágúst ár hvert.

Vinnuskólinn í Kópavogi hefur verið starfræktur frá árinu 1958. Unglingum er boðin fjölbreytt og skemmtileg störf þar sem markmið skólans  eru gleði, vinna, lærdómur.

Allir unglingar sem verða 14 ára á starfsári Vinnuskólans er boðið til náms og er þeim boðið það öll sumur til og með 17 ára aldurs.

Leggur skólinn mikið upp úr því að nám nemenda komi til með að veita þeim skemmtilega og ánægjulega innsýn inn í atvinnulífið. Áhersluatriði  í starfi  Vinnuskólans er að allir sýni starfsmönnum, nemendum jafnt sem öðrum íbúum og gestum Kópavogsbæjar kurteisi og virðingu.

Fréttir af starfi Vinnuskólans má nálgast á Fésbókarsíðu hans.

  • Hverjir geta sótt um í Vinnuskólanum?

    Allir unglingar sem búsettir eru í Kópavogi og verða 14-17 ára á árinu geta sótt um vinnu hjá Vinnuskólanum. Nemendur sem eru 16 til 17 ára sem sækja um hjá Vinnuskólanum geta óskað eftir því að fá vinnu hjá félögum og stofnunum í bænum og er þeim raðað inn á þá staði með hliðsjón af fyrri umsögnum í Vinnuskólanum.

  • Skrifstofa Vinnuskólans

    Skrifstofur Vinnuskólans eru í Fífuhvammi 20. Sími okkar er 441-9080 og tölvupóstur vinnuskoli@kopavogur.is. Skrifstofan er opin alla daga frá klukkan 8:00 til 16:00 nema föstudaga þegar henni er lokað klukkan 14:00. Skrifstofurnar opna frá og með 10. maí og síðasti starfsdagur er 31. ágúst.
    Þess á milli hefur verkefnastjóri Vinnuskólans skrifstofu á Umhverfissviði, Fannborg 2.

  • Skráning í Vinnuskólann

    Nemendur í Vinnuskólann í Kópavogi skrá sig til vinnu gegnum heimasíðu Kópavogs. Mikilvægt er að allar upplýsingar sem beðið er um komi fram við umsókn til náms. Þegar nær dregur því að nemandi hefji störf fá forráðamenn upplýsingar um mætingu nemanda í gegnum tölvupóst. Þar kemur einnig fram hvar, hvenær og hvaða starfsmaður tekur á móti nemanda.

  • Röðun í vinnuflokka

    Að jafnaði er farið eftir búsetu og aldri nemenda þegar raðað er í vinnuhópa. Þó getur það komið fyrir að nemendur á misjöfnum aldri raðist í hópa saman.

    Við reynum eftir fremsta megni að verða við beiðnum um að skipta um vinnutíma þar sem nemendur eiga erfiðara með að vinna á ákveðnum tímum. En við áskiljum okkur rétt til að hafna slíkri beiðni ef flokkstjóri lítur svo á að skipting hópa sé ójöfn eða breytingar hafi áhrif á vinnuframlag nemenda. Vinnuregla Vinnuskólans er að aldrei skuli vera fleiri en 15 nemendur undir umsjá eins flokkstjóra. Eru foreldrar beðnir um að hafa samband við flokkstjóra í þeim tilvikum sem óskað er eftir færslu í vinnushópum.

    Ekki er víst að nemendur séu í hópum með vinum eða bekkjafélögum þar sem eitt af markmiðum Vinnuskólans er að allir geti unnið með öllum.

  • Leyfi og veikindi

    Leyfi og veikindi skal tilkynna leiðbeinanda. Einungis er tekið við tilkynningum frá foreldrum eða forráðamönnum. Veikindi ber að tilkynna áður en vinna hefst dag hvern. Nauðsynlegt er að tilkynna veikindi alla daga sem þau standa yfir. Ekki er tekið mark á tilkynningum sem berast í tölvupósti eða öðrum textaskilaboðum.

    Veikindi teljast sem tapaðar vinnustundir og ekki er hægt að vinna þær upp.

  • Fræðsla

    Umhverfisfræðsla

    Umhverfisfræðsla er stór þáttur í starfi Vinnuskólans. Vinnuskólinn er einn af þremur vinnuskólum landsins sem er þátttakandi í verkefninu Skóli á grænni grein, sem er merki um markvisst starf í þágu umhverfis. Á hverju sumri hefur Vinnuskólinn ráðið til starfa umhverfisfulltrúa sem sér um fræðslu unglinga í þessum málefnum. Sem hluti af umhverfisfræðslu Vinnuskólans fer hluti nemenda á Selfjall til að hjálpa til við landgræðslu með Skógræktarfélagi Kópavogs.

    Jafningjafræðslan

    Í samstarfi við Hitt húsið hefur Vinnuskólinn boðið jafningjafræðurum að koma í heimsókn til hópa með nemendum á aldrinum 15 og 16 ára. Þeir koma í heimsókn í hvern hóp tvisvar sinnum yfir sumarið. Umræðuefnið fer eftir því hvað brennur á nemendum hverju sinni. 

  • Algengar spurningar og svör

    Hvað er Vinnuskólinn?

    Vinnuskóli Kópavogs er fyrir alla 14-17 ára unglinga í Kópavogi. Allir sem sækja um fá starf í skólanum

    Af hverju ætti ég að sækja um starf í Vinnuskólanum?

    Þátttaka í Vinnuskólanum er kjörið tækifæri fyrir unglinga til þess að öðlast reynslu af því að vinna sér inn laun á hvetjandi og jákvæðan hátt. Þar gefst unglingum færi á að taka þátt í að snyrta og hirða bæinn sinn, kynnast nýjum félögum og læra heilmikið um umhverfismál, mannleg samskipti og virðingu gagnvart vinnu.

    Hvað er ég að vinna lengi?

    Sumrinu er skipt í þrjú þriggja vikna tímabil hjá nemendum í 8., 10. bekk og 17 ára. Hver og einn getur valið allt að tvö tímabil og fá allir sem sóttu um áður en formlegur umsóknarfrestur rann út vinnu á þeim tímabilum sem óskað var eftir.

    Hjá 9. bekk er sumrinu skipt í fjögur tveggja vikna tímabil. Hver og einn getur valið allt að tvö tímabil og fá allir sem sóttu um áður en formlegur umsóknarfrestur rann út vinnu á þeim tímabilum sem óskað var eftir

    Tímabilin verða kynnt þegar nær dregur sumri.

    Fæ ég matarhlé?

    Já, matarhlé er á milli kl. 11:30-12:30. Auk þess eru tveir kaffitímar, annar kl. 10:00-10:15 og hinn eftir hádegi kl. 14:00-14:15.

    Hvenær fæ ég útborgað?

    Launatímabil Vinnuskólans eru ákveðin ár hvert í samráði við Launadeild Kópavogsbæjar.

    Hvað er þetta skattkort og hvað á ég að gera við það?

    Allir launþegar á Íslandi sem eiga hér fasta búsetu og hafa náð 16 ára aldri eiga rétt á svokölluðum persónuafslætti og er skattkortið til þess gert að halda utan um það. Árið 2016 voru öll skattkort gerð rafræn og eru nemendur beðnir um að senda beiðni um notkun skattkorts á tölvupóstfangið skattkort@kopavogur.is. Taka þarf fram ef verið er að nota persónuafslátt á öðrum vinnustað og þá hvernig nemandi vill að persónuafsláttur skiptist. Allir nemendur eldri en 16 ára þurfa að skila skattkorti.

    Þarf ég að borga hluta af laununum mínum í lífeyrissjóð?

    Börn byrja að greiða í lífeyrissjóð næstu mánaðamót eftir 16 ára afmælisdaginn.

    Hvert fara launin mín?

    Launin eru lögð inn á bankareikning unglinganna og þurfa því allar bankaupplýsingar að fylgja umsókn. Aðeins er hægt að nota bankareikning unglingsins.

    Hvert á ég að mæta?

    Almennt er unglingunum komið fyrir í hópum nálægt skólum, nema að aðrar óskir komi fram á umsókn viðkomandi. Allar upplýsingar eru sendar í tölvupósti nokkrum dögum áður en nemandi á að hefja störf.

    Get ég skipt um hóp?

    Engar breytingar eru gerðar á hópum fyrstu dagana. Síðan er það viðkomandi flokksstjóra að ákveða um það í sínum hópi. Flestir eru með tvo hópa og verður að gæta þess að það sé ekki ójafnvægi vegna fjölda í þeim. Flokkstjórum er heimilt að hafa mest 15 nemendur í nemendahóp.

    Hvað á ég að gera ef ég er veik(ur)? Fæ ég borgað fyrir daginn?

    Foreldrar verða að tilkynna forföll og veikinda barna sinna við viðkomandi flokksstjóra. Textaskilaboð (sms) eða fésbókarskilaboð eru ekki tekin gild. Veikindadagar eru ekki greiddir.

    Má ég reykja í vinnunni?

    Nei. Vinnuskóli Kópavogs er tóbakslaus vinnustaður

  • Tímabil 2017

    Nemendur í Vinnuskólanum geta valið sér þann tíma sem þeir vinna hjá Vinnuskólanum. Nemendur fæddir 2000, 2001 og 2003 geta valið tvö af þremur tímabilum en nemendur fæddir 2002 geta valið tvö af fjórum tímabilum.

    Tímabilin eru eftirfarandi:

    Nemendur fæddir 2000:

    Tímabil 1 - 22. maí til 15. júní
    Tímabil 2 - 19. júní til 13. júlí
    Tímabil 3 - 17. júlí til 11. ágúst

    Nemendur fæddir 2001 og 2003

    Tímabil 1 - 12. júní til 28. júní
    Tímabil 2 - 3. júlí til 19. júlí
    Tímabil 3 - 24. júlí til 10. ágúst

    Nemendur fæddir 2002

    Tímabil 1 - 12. júní til 23. júní
    Tímabil 2 - 26. júní til 7. júlí
    Tímabil 3 - 10. júlí til 21. júlí
    Tímabil 4 - 24. júlí til 4. ágúst

  • Launatímabil 2017

    Í vinnslu

  • Laun og vinnutími 2017

    Prenta gjaldskrá

    Laun Vinnuskólinn

    Fæðingarár
    Laun / Vinnustundir
    Fæddir 2000
    1324,6 kr. / 203,5 klst.
    Fæddir 2001
    807,7 kr. / 143 klst
    Fæddir 2002
    646,2 kr. / 107,25 klst.
    Fæddir 2003
    484,6 kr. / 71,5 klst.