Langleiðin: Bláfjallahryggur endilangur og Vífilsfell
Þessi leið er kölluð Langleiðin vegna þess að að þetta er lengsta og erfiðasta skilgreinda leiðin innan marka Kópavogs.
Hún liggur eftir endilöngum Bláfjallahrygg og auk þess er bæjarfjallið Vífilsfell toppað í leiðinni.
Nánari upplýsingar um gönguleið
Lengd: 14 km
Erfiðleiki: Krefjandi
Tími: 6 kls
Hækkun: 760 m
Undirlag: Melar, klettar, móberg, skriður og grýttir kaflar
Upphaf/endir: Grjótnáman norðan við Vífilsfell og við Ull og Ármannsskála á Bláfjallasvæðinu
Bílastæði: Bílastæði við grjótnámuna norðan við Vífilsfell og efsta bílastæðið á Bláfjallasvæðinu
Annað: Salerni á skíðasvæðinu þegar það er opið á veturna
Gönguleiðin
Gangan sjálf getur hafist á hvorum enda og má gjarnan fara eftir vindátt, en athugið að það bætist við hækkunina ef þið byrjið við Vífilsfell. Það eru nokkrir staðir á leiðinni sem geta valdið erfiðleikum í vetrarfærð og þarf ísöxi og fjallabrodda en frá júní og fram í lok september jafnvel október þá á þessi gönguleið að vera öllum fær sem á annað borð stunda fjallgöngur að einhverju ráði. Þetta er nokkuð löng leið og uppsöfnuð hækkun mikil en útsýnið er stórkostlegt þegar skyggni er gott. Hafa ber í huga að leiðin er frá A til B og því þarf að skilja eftir bíl á endastað eða gera aðrar ráðstafanir.